ISAÍAS 51 - Quichua Imbabura 2016

Sion pueblopi causajcuna cushijuchun rimashca shimicunami

1“Alitalla rurashpa causajcuna uyahuaichi.

Mandaj Diosta mascajcuna, uyahuaichi.

Jatun rumimanda faquishpa, cangunata mirachishcataca yarinami canguichi.

Chai rumita maimanda apamushca pushtutapash yarinami canguichi.

2Cangunapaj ñaupa taita Abrahamdapash,

cangunapaj mama Saratapash yarinami canguichi.

Ashtahuangarin Abrahamga, pailla rucuyajujpipash, cayashpami bendiciashpa, ashtacata mirachircani.

3Mandaj Diosca, Sion pueblopi causajcunataca tucuipimi yanapasha.

Jichushca pambacunatapash, chaquishca pambacunatapash, alimanmi tigrachisha.

Imapash illaj pambacunatapash, yuracuna junda juyailla Mandaj Diospaj pambamanmi tigrachisha.

Chaipica, ninanda cushijushpami, Ñucataca alicachishpa candanajunga.

4Ñuca agllashca gentecunalla, Ñucata uyahuaichi.

Ñuca agllashca llactalla, Ñucata uyahuaichi.

Ñucami mandashca shimicunata cusha.

Alitalla rurashpa causachumbash, Ñucami michatashna churasha.

5Tucuita Ñuca mishana punllapash, ñami chayamujun.

Ñuca ushaihuan quishpichina punllapash, ñami chayamujun.

Ñucapaj ninan ushaihuanmi, llactacunapi causajcunataca mandajusha.

Mama cucha manñapi tiyaj llactacunapash, Ñuca mandachunmi shuyanajun.

Ñuca ninan ushaihuan shamunatami, yariajlla causanajun.

6Jahua pachata vichai ricuichiyari.

Cai pachatapash, urai ricuichiyari.

Jahua pachaca, cushnishnami chinganga.

Alpapash, churajuna maucayajshnami tucuringa.

Cai pachapi causajcunapash, chashnallatami tucuringa.

Ashtahuangarin, causaita causachunmi quishpichisha.

Ñuca alitalla rurashpa mandanaca, napacha tucuringachu.

7Alitalla rurashpa causanata yachajcunapash, Ñucatami uyana canguichi.

Ñuca mandashcataca, cangunapaj shungupimi charina canguichi.

Shuj gentecuna rimashpa pingaichinataca, na manllanachu canguichi.

Paicuna na alicachishpa rimajpipash, na llaquirinachu canguichi.

8Paicunaca, churajunata polilla micujpishnami, tucurinajunga.

Milmata juru micujpishnami, chinganajunga.

Ashtahuangarin, Ñuca ali cashcatalla ruranaca causaita causaicamanmi tiyajunga.

Shinallata quishpirinapash, causaita causaicamanmi tiyajunga” ninmi.

9Mandaj Dioslla, Cambaj ninan ushaihuan ricurimupailla.

Ñaupa huatacunashnallata, ninan ushaihuan shayaripailla.

Ñaupa punllacunapica, ¿nachu Canllata Rahab shuti llactataca, tucuchircangui?

¿Nachu chai jatun dragondaca, Canllata huañuchircangui?

10Mama cucha yacutapash, ¿nachu Canllata chaquichircangui?

Can agllashcacuna yalichunga, ¿nachu Canllata mama cuchata chaquichishpa, ñanda rurarcangui?

11Mandaj Dios quishpichishcacunaca, tigramungapachami.

Paicunaca, ninanda cushijushpa candashpami, Sion puebloman tigramunajunga.

Paicunaca, ima llaquipash illaj cashpami, ninan cushijuihuan causanajunga.

12“Ñucami, cangunamanga cushijuita carani.

¿Cangunaca, huañunalla gentecunatarachu manllanguichi?

Paicunaca, jupashna chinganallacunami.

13Cangunaman causaita caraj Mandaj Dios Ñucami, jahua pachatapash, cai pachatapash churarcani.

Shina tucuita ruraj Diostachu ¿cungarcanguichi?

Cangunata llaquichijcuna ninanda fiñarishpa tucuchingapa shayarinajujpica,

punllandimi manllashpa causarcanguichi.

Cangunata ninanda fiñashpa llaquichij runaca, ¿maipitayari?

14Prezui tucushca llaquihuan causajcunaca, uchami cacharichi tucunga.

Paicunaca, chai prezuna ucupica na huañungachu.

Paicunapaca, micunapash na illangachu.

15Mandaj Dios Ñucami, mama cucha yacutapash, caiman chaiman cuyuchishpa jatarichij cani.

Cambaj Taita Diosmi cani.

Ñuca shutica, tucuita Mandaj Diosmi.

16Canguna rimai ushachunmi, ushaita curcani.

Ñuca ninan ushaihuanmi, cangunataca huacaichircani.

Jahua pachatapash, cai pachatapash Ñucami churarcani.

Shinallata, Sión pueblopi causajcunataca:

‘Ñuca agllashcacunami canguichi’ ninmi” ningui nirca.

17Jerusalen pueblolla, rijcharishpa jatariyari.

Candaca, Mandaj Dios ninanda llaquichijpimi, vinota ufiashpa machashcashna saquirishcangui.

Chai vinotaca, machangacamanmi tucuillata ufiashcangui.

18Chai pueblopi huacharishcacunaca,

shujllapash aliguta pushangapaca, na tiyanllu.

Can viñachishca, tucuilla churicunamandaca, shujllapash, maquimanda aisashpa pushangapaca, na tiyanllu.

19Cai ishcai llaquicunami, candaca japirca:

Llaquichishpa tucuchi tucunapash,

jatun macanajuicunapi yarjaihuan huañunapashmi japirca.

¿Pita candaca llaquingayari?

¿Pita candaca cushichingayari?

20Cambaj churicunaca, ushai illajcunami saquirirca.

Ñangunapi shaijushca, huañunallami sirinajurca.

Tarugata linllipi japijpishnami, saquirirca.

Canda Mandaj Taita Dios ninanda fiñarishpa llaquichijpimi, chashna tucurca.

21Machashpalla, llaquicunahuanlla causaj huarmishna, Jerusalen pueblolla, caitami uyana cangui:

22Canda Mandaj Jatun Diosca,

Paipaj agllashcacunamanda randi shayarij, cambaj Taita Diosmi.

Paica, cashnami nin:

“Mandaj Dios Ñuca ninanda llaquichijpi, vinota ufiashpa machashcashna causanamandaca, ñami anchuchircani.

Machangacaman vinota ufiajshna llaquicunahuan causanataca, cutinga na ricunguichu.

23Chai llaquicunataca, canda ninanda fiñajcunamanmi curcani.

Paicunaca: ‘Ñucanchi sarushpa yalingapa alpapi shitarichi’ ninajurcami.

Shina nijpimi cangunataca, ñan alpatashna sarushpa yalinajurca” ninmi.