JEREMÍAS 39 - Quichua Imbabura 2016

Jerusalenbi causajcunatami mishashca(2 Rey. 24:20—25:21; 2 Crón. 36:17-21; Jer. 52:3-30)

1Judá llactata jatun mandaj Sedequías runa ña iscun huatata mandajujpi, chai huatapaj chunga quillapimi, Babilonia llactata jatun mandaj Nabucodonosor runaca, paipaj macanajuj runacunahuan shamushpa, Jerusalendaca chaupipi churarca.

2Shinallata, Sedequías runa ña chunga shuj huatata mandajujpimi, Jerusalén pueblo muyundi jatun pircataca faquinajurca.

3Shina rurashpami, Babilonia llactata jatun mandaj churashca cati mandajcunaca, Jerusalenman yaicushpa, carpacunata chaipi shayachishpa shuyanajurca. Chai mandajcunaca: Nergal-sarezer, Samgar-nebo mandajcunapash, Rabsaris nishca Sarsequim shuti mandajpashmi carca. Shinallata, Rabmag nishca Nergal-sarezer mandajpash, Babilonia llactata jatun mandaj churashca tucui cati mandajcunami chaipi carca.

4Chaita ricushpami, Judá llactata jatun mandaj Sedequías runapash, paipaj macanajuj runacunapash, pueblomanda tuta llujshishpa, jatun mandajpaj sisacuna tarpushca alpata yalishpa, jatun pircacuna chaupipi tiyaj punguta llujshishpa rinajurca. Chashnami, Arabá shuti jatun pambaman, jatun mandajca rijurca.

5Ashtahuangarin caldeo macanajuj runacuna catishpami, Sedequías runataca, Jericó shuti jatun pambapi japigrirca. Chaipaj jipaca, Hamat shuti llactapi tiyaj Ribla shuti pueblomanmi, Babilonia llactata jatun mandaj Nabucodonosor runapajman pusharca. Chaipimi, Sedequiastaca imashna llaquichinata villarca.

6Babilonia llactata jatun mandaj Nabucodonosorca, Ribla shuti pueblopimi Sedequías runapaj churicunatapash, Judá llactapi alicachi tucushca runacunatapash, tucuicunatami, tucuicunapaj ñaupajpi cungata cuchushpa huañuchichun mandarca.

7Jatun mandaj Sedequías runataca, ishcandi ñavita llujchishpami, Babilonia llactaman apangapa, grillocunahuan chaquipi, maquipi huatanajurca.

8Shinallata, caldeo macanajuj runacunaca, mandana huasitapash, Jerusalén pueblopi tiyaj huasicunatapash rupachishpami, muyundi jatun pircacunatapash urmachinajurca.

9Macanajuj runacunata mandaj Nabuzaradán runaca, Jerusalenbi huaquin puchushcacunatapash, japi tucushcacunatapash, tucuicunatami, Babilonia llactaman aparca.

10Shina cashpapash, macanajuj runacunata mandaj Nabuzaradán runaca, huajchacunataca, Judá llactapillata saquishpami, alpacunata, uva chagracunata paicunamanga cararca.

Nabucodonosor runami, Jeremiasta ali ricuriashca

11Babilonia llactata mandaj Nabucodonosor runaca, Nabuzaradán runataca, Jeremiasta ricuchun nishpami, cashna mandashca carca:

12“Jeremiastaca, ali ricuriangui. Paitaca, na llaquichinachu cangui. Ashtahuangarin, pai imata mañashcatami rurana cangui” nishcami carca.

13Shinamandami, Nabuzaradán runaca, Rabsaris nishca Nabusazbán shuti runatapash, Rabmag nishca Nergal-sarezer shuti cati mandajtapash, Babilonia llactata jatun mandaj churashca tucui cati mandajcunata cacharca.

14Paicunami, prezuna huasi patiomanda Jeremiasta llujchishpa, Gedalías shuti runapaj huasiman apanajurca. Shinami Jeremiasca, Judá llacta gentecunahuan causajurca. Gedalías shuti runaca, Ahicam shuti runapaj churimi carca. Ahicam shuti runaca, Safán shuti runapaj churimi carca.

Taita Diosca, Ebed-melec runataca quishpichishami nishcamanda

15Prezuna huasi patiopi tiyajujpimi, Mandaj Diosca Jeremiastaca, cashna nishpa mandarca:

16“Etiopía llactamanda Ebed-melec shuti runapajman rishpa, cashna nigri: Tucuita Mandaj, Israelcunapaj Taita Diosca, cashnami nin: ‘Ñucaca cai pueblotaca, ima alitapash na rurashpa, llaquicunata cachamushami nishcatami pactachigrini. Chai llaqui punllacuna chayamuntaca, canga ricunguimi.

17Ashtahuangarin chai punllapica, Ñucami, candaca quishpichisha. Canga, can ninanda manllashca runacunapaj maquipica, na churai tucunguichu’ ninmi Mandaj Diosca.

18Shinallata: ‘Candaca quishpichishapachami, napacha huañuchi tucunguichu. Ñucata cazushpa causajushcamandami, candaca quishpichisha’ ninmi Mandaj Diosca nigri” nijurcami.