1Israelcunaca, Egiptomanda llujchimuj, Jatun Mandaj Diostami uyana canguichi. Paica cangunata ninanda fiñashpami llaquichigrijun. Cunanga Paimi cashna nijun:
2“Cai pachapi causajpuramandaca, cangunatallami Ñucapajlla causanajuchun agllarcani.
Shina cashcamandami, canguna na cazushpa juchata rurashcamandaca llaquichigrini.
3Randimanda imata rurangapapash, shujlla yuyaita charishpaca,
¿nachu tandanajushpa ishcandi puringalla?
4Sachapi causaj leonbash,
¿micuna tiyajpita huacashpachu purijunga?
Maltun leonbash, ¿pai causajuj utujupi micuna tiyajpita huacajungachu?
5¿Alasyu animalcunaca, tugllata na churajpillata, japi tucungallachu?
Pambapi churashca tugllapash, ¿imatapash na churajpillata, japingallachu?
6Llajtapi causajcunapash, ¿nachu cachuta huacachijpi, manllarishpa caparinga?
¿Mandaj Dios na llaquichijpica, llactapi causajcunapash manllaringallachu?
7Mandaj Diosca, Paipaj profetacunatami, ima llaqui tiyanatapash villachun pundata cachamun.
8León huacajujta uyashpaca, ¿pita na manllangayari?
Mandaj Jatun Dios rimajpica, ¿pita na villangapa ringayari?
Samaria llactata llaquichinata villashcamanda9Asdod shuti pueblopi mandajcunaman,
Egipto llactapi mandashpa tiyanajuj huasicunapipash, cashna nishpa villagrichi:
‘Samaria urcupi tandanajushpami,
chai llactapi causajcuna, na alita rurashpa ninanda llaquichinajujtaca ricuna canguichi’ ninmi.
10Paicunaca, imatallapash alita ruranataca na yachanllu.
Shujcunata macashpa quichumushcatallami,
paicuna mandashpa tiyana huasicunapipash jundachinajun” ninmi Mandaj Diosca.
11Shina cashcamandami Mandaj Diosca, paicunataca cashna nirca:
“Cangunata fiñajcunami, cai llactataca muyundi shayarimunajun.
Paicunaca, cambaj shinlli torretapash tucuilla urmachishpami,
canguna mandashpa tiyajuna huasicunamandapash, tucuilla shuhuashpa apanga” ninmi.
12Mandaj Diosca, cashnatapashmi nirca:
“Samaria pueblopi causaj Israelcunaca, ñutulla tiyarinacunapi, samashpa sirinacunapimi samanajunga.
Paicunaca, leonbaj shimimanda llamata cacharichingapa rishpa,
ishcai chaquita, na cashpaca rinri pundatalla quichushcashnami ashalla quishpiringa” nircami.
13Tucuita Mandaj Diosca, cashnatapashmi nirca:
“Uyaichi, Jacobpaj miraicunata llaquichinata villagrichi.
14Israelcuna, Ñucata na cazushcamanda llaquichijui punllapica,
Bet-el shuti pueblopi tiyaj altarcunatapashmi tucuchisha.
Chai altar, chuscundi pundacunapi tiyanajuj cachucunatapash faquishpami, alpapi shitasha.
15Shinallata tamia punllacunapi, rupai punllacunapi, pacajuna huasicunatapash faquishpami shitasha.
Marfilhuan huasichishca huasicunatapash ñutushpami tucuchisha.
Mandana jatun huasicunatapashmi, tucuchishpa saquisha” nircami Mandaj Diosca.
Who We AreWhat We EelieveWhat We Do
2025 by iamachristian.org,Inc All rights reserved.
