1Caldeo runacuna causanajuj Babilonia llactata llaquichina cashcamandaca, Mandaj Diosca, profeta Jeremiasmanmi cashna nishpa villarca:
2“Llactacunapi yachanajuchun villaichilla.
Banderacunatapash, na pacashpa, ricunallacunapi churashpa, cashna nishpa villaichilla:
‘Babilonia llactaca, ñami mishai tucushca.
Bel shuti rurashcalla diosca, yangapimi churai tucushca.
Merodac shuti rurashcalla diospash, ñutui tucushcamari.
Rumicunahuan rurashca dioscunapash,
yanga dioscunapash, ñutui tucushcamari.
3Ashtahuan janaj llactamanda gentecunami, chai llactata llaquichingapa rirca.
Paicunami chai llactataca, tucuilla tucuchinga.
Chaipica, runacunapash, animalcunapash na ashtahuan causangachu.
Tucuicunami pacajushpa rinajurca’ nichiyari” nircami.
4Mandaj Diosca, cashnatapashmi nin: “Chai punllacunamanga, Israelcunapash, Judá llactamanda runacunapash tandanajushpami shamunga. Paicunaca, paicunata Mandaj Diosta mascashpami, huacashpa shamunajunga.
5Sion shuti puebloman tigrangapa munashpami, maitata rina capanchi” nishpa, chai ñanda catishpa rinajunga. Paicunaca: “Cunanga, causaita causaicaman, Mandaj Dioshuan shuj mushujta ari niringapa jacuchi, ninajungami.
6Ñuca agllashca gentecunaca, llama chingashcashnami purinajurca. Paicunataca, michijcunallatami pandachishpa urcucunapi jichushpa saquirca. Shinamandami, shuj urcumanda, caishuj lomaman yalishpa purinajushpallata, paicunapaj corraltapash cungarca.
7Paicunata fiñajcuna tuparishpa huañuchishpami cashna ninajurca: Paicunata huañuchinaca imapash na canllu. Paicunallatami, juchata rurashpa, ali cashcatalla ruraj Mandaj Diostaca na cazunajurca. Paicunapaj ñaupa taitacunata yarishpa causanajushca Mandaj Diostami fiñachinajurca” ninajurcami.
8“Babilonia llactamandaca pacajushpa richilla.
Caldeo gentecunapaj llactamandaca llujshishpa calpaichilla.
Jari llamacuna, ñaupashpa calpanshna calpaichilla.
9Ñucami, ashtahuan janajmandaca, Babilonia llactata llaquichingapa, ashtahuan shinlli runacunata cachamugrini.
Chashna shamushpami, chai llactataca mishashpa quichunga.
Paicunapaj flechacunahuanga, shujtallapash na pandashpami, huañuchinajunga” ninmi.
10Mandaj Diosca, cashnatapashmi nin:
“Caldeo gentecunapaj llactapi, tucui imatalla charishcataca quichushpami apanga.
Paicunata, na ushangacamanmi tucuita apanga.
11Babilonia llacta runacunalla,
ñuca llactata tucuchishpaca, ninandami cushijurcanguichi.
Llullu jihuaman huagra yaicushcashnami fahuanajurcanguichi.
Caballocuna huacanajunshnami caparinajurcanguichi.
12Shinamandami cangunapaj llactaca, ninanda pingai tucurca.
Shinallata, canguna causanajushca llactami, ninanda rimai tucushpa pingai tucurca.
Chai llactaca, tucui llactacunamanda yali llaquichi tucushcami saquiringa.
Imapash illaj, chaquishca, jichushca pambami tucunga.
13Mandaj Dios ninanda fiñarishpa llaquichijpimi, chaipica pipash na causanga.
Ashtahuangarin, tucui chai llactatami llaquichishpa tucuchinga.
Shinamandami Babilonia llactata tucui yalijcunaca, na alicachishpa ricunajunga.
Llaquita apashcata ricushpami asinajunga” ninmi.
14Babilonia llactahuan macanajungapa shamushcacunaca, muyundi shayarichilla.
Arcocunahuan macanajujcunaca, flechacunataca ama llaquishpa cacharichilla.
Chai gentecunaca, Mandaj Diosta fiñachishpami, juchata ruranajurca.
15Macanajui callaringapa, tucuicuna ninanda caparichi.
Paicunaca, mishai tucurcami.
Babilonia pueblo muyundi jatun pircapash, ucumanda callari rumicunandimi tucurirca.
Mandaj Dios paicunata llaquichina punllami chayashca.
Paicunataca, imashna paicuna llaquichishcashnami llaquichina canguichi.
16Babilonia llactapica tarpuj runatapash, granota tandachij runatapash huañuchinami canguichi.
Tucuchij espadapaj ñaupajmandaca, tucuicunami paicunapaj puebloman tigranajunga.
Tucuicunami, paicunapaj llactaman pacajushpa calpanajunga.
17Israelcunaca, llama chingashcashnami. Paicunataca, leongunami caita chaita calpachirca. Pundaca, Asiria llactata jatun mandajmi llaquichishpa tucuchirca. Chaimanda puchushcacunataca, Babilonia llactata jatun mandaj Nabucodonosor runami, tucuilla ñutushpa tucuchirca.
18Shinamandami tucuita Mandaj, Israelcunapaj Taita Diosca, cashna nin: “Babilonia llactata jatun mandajtaca, paipaj llactandimi, Asiria llactata jatun mandajtashnallata llaquichigrini.
19Paita llaquichishpami, Israelcunataca paicuna causashca pushtumanllata tigrachimusha. Shina tigrachimujpimi, Ñuca llamacunaca, Carmelo, Basán, Efraín, Galaad shuti urcu alpacunapi, paicunaca na munangacaman micushpa causanajunga.
20Shinamandami chai punllacunapica, Israel gentecuna ima na alita rurashcata mascajpipash, na ricuringa. Judá llactapi causajcuna juchata rurashcapash, na tariringachu. Ñucallata, paicunapaj juchacunata perdonajpimi, chashna canga” ninmi Mandaj Diosca.
21Mandaj Diosca, cashnatapashmi nin:
“Merataim shuti llactapi causajcunahuan macanajungapa vichai richilla.
Pecod shuti llactapi causajcunata huañuchingapa richilla.
Chai pueblocunapi causajcunataca, catiriyashpa huañuchinguichilla.
Ñuca imashna mandashcashnallata, llaquichishpa tucuchigrichilla.
22Cai llactapica, jatun macanajuimi tiyan.
Ninan llaquicunami tiyan.
23¡Shuj llactacunata, martillohuan tacajshna llaquichij llactaca, llaquinayaitamari tucurishca!
¡Babilonia llactaca, chashnamari shuj llactacunapash manllarijta tucurishca!
24¡Babilonia llactalla!
Ñucallata urmachun saquijpimi, urmarcangui.
Chaitaca, canga na yacharcanguichu.
Mandaj Dios Ñucata na cazushcamandami, chashna tucurcangui.
25Mandaj Dios Ñucami, tucui llaquichinacunahuan, candaca llaquichircani.
Tucuita Mandaj Dios Ñucami, caldeo gentecunapaj llactapi llaquicuna tiyachun cachamurcani.
26Tucui llactacunamanda shamushpa, paihuan macanajuichi.
Pai imatalla charishcacunata alichishcamanda, tucuilla quichushpa apaichi.
Tucui imalla tiyashcata tucuchishpa, rumi mundundalla saquichi.
27Maltun shicucunata, huañuchina pushtuman apashpa huañuchinshnami tucuchina canguichi.
¡Aij, paicunalla! Paicunata ninanda llaquichina punllacunami chayamushca” ninmi.
28Babilonia llactamanda pacajushpa shamujcunaca: “Ñucanchita Mandaj Diospaj huasita urmachishcamandaca, Diosllatami Babilonia llactapi causajcunataca ninanda llaquichirca” nishpa cushijushpa, Sion shuti pueblopi villanajujtami uyani.
29“Babilonia llactapi causajcunahuan macanajuchun,
flechacunahuan ali macanajunata yachajcunata tandachimuichi.
Chai pueblo muyundipi carpacunata shayachishpa shuyaichi.
Pacajushpa richunga, shujllatapash na saquinachu canguichi.
Paicuna llaquichishcashnami, llaquichina canguichi.
Imatalla rurashcatapash, chashnallatami rurana canguichi.
Paicunaca, Israelcunapaj jucha illaj Mandaj Diostami ninanda fiñachirca.
30Shinamandami, chaira viñaicunapash plazacunapi huañushca sirinajunga.
Chai punllapica, macanajuj runacunapashmi, huañushpa tucuringa” ninmi Mandaj Diosca.
31Tucuita Mandaj, jatun Diosca cashnatapashmi nin:
“Pitapash na cazuj llactalla, Ñucami candaca llaquichigrini.
Canda, llaquichina punllacunami chayamushca.
32Pitapash na cazuj runaca, nitijashpa urmangami.
Paitaca, pipash na jatarichingachu.
Paipaj pueblocunapipash, ninatami japichisha.
Tucui muyundi llactacunatapashmi rupachisha” ninmi.
33Tucuita Mandaj Diosca, cashnatapashmi nin: “Israelcunapash, Judá llactapi causajcunapash, llaquichi tucushpami causanajurca. Paicunata prezu apajcunaca, na cacharingapa munashpami charinajurca.
34Ashtahuangarin paicunata Quishpichij, ninan ushaita charij, tucuita Mandaj Dios Ñucami, paicunahuan cani. Paicunataca, quishpichishpami, paicunapaj llactaman pushashpa samachisha. Babilonia llactapi causajcunataca, ninandami llaquichisha” ninmi.
35Mandaj Diosca, cashnatapashmi nin:
“Babilonia llactapi causaj caldeo runacunamanga, jatun macanajuitami cachamusha.
Paicunata mandajcunamambash, cati mandajcunamambash, yuyaita cuj runacunamambashmi chashnallata llaquita cachamusha.
36Espadahuan shamushpami, yachajcunatapash llaquichinga.
Espadahuan shamushpami, ninan shinlli runacunatapash llaquichishpa tucuchinga.
37Espadahuan shamushpaca, paicunapaj caballocunatapash, carretacunatapashmi tucuchinga.
Espadahuan shamushpaca, paicunahuan causanajuj gentecunatapashmi llaquichinga.
Paicunaca, huarmicunashnami manllanajunga.
Espadahuan yaicushpami, paicuna tucui imatalla charishcatapash quichushpa apanajunga.
38Yacupash tucuillami chaquishpa tucuringa.
Chai llactapica, rurashcalla dioscuna junda cashcamandami, chashna llaquichi tucunga.
Shinallata, imamambash rijchaj rurashcalla dioscunatalla yariaj causanajushpami, juizu chingashcashna tucunajunga.
39Shinamandami Babilonia llactapica, jichushca pambapi causaj chacal animalcunalla causanajunga. Avestruz animalcunapaj huahuacunallami, chaipica causanajunga. Ashtahuangarin chaipica, pipash na cutinga causangachu” ninmi.
40Mandaj Diosca, cashnami nin: “Taita Dios Ñucaca, imashnami Sodoma shuti, Gomorra shuti pueblocunata, quimirialla tiyaj caishuj pueblocunandi tucuchircani, chashnallatami Babilonia pueblopica, pillapash ama causachun tucuchisha.
41Janaj llactamanda gentecunami shamunajun.
Cai pacha manña llactacunamandaca, ashtaca gentecuna,
ashtaca jatun mandajcunami shamunajunga.
42Paicunaca, arcohuambash, lanzahuambash macanajunata alipacha yachajcunami.
Paicunaca, pitapash na llaquishpami huañuchinga.
Paicuna caparishcapash, mama cucha yacu jatarinshnami uyaringa.
Babilonia llactapi causajcunalla.
Chai runacunami cangunahuan macanajungapaca, caballocunapi tiyarishpa shamunajunga.
43Chai villashcataca, Babilonia llactata jatun mandajmi uyarca.
Chaita uyashpami, paica ninandapacha llaquirirca.
Huahuata ungugrijuj huarmishnami llaquita apajurca.
44Jatun pircahuan jarcashca pueblota llaquichingapaca, Jordán huaicu sachamanda león llujshimujshnami, vichai shamunga. Ñallami chaimandaca calpachigrini. Ñuca agllashca runatami, chashna mingasha. ¿Pita Ñucashna ushaita charij tiyanga? Ñucahuanga, ¿pita chimbapurai ushangayari? Ñuca llaquichijujpica, ¿pita jarcai ushangayari?” ninmi.
45Shina cashcamanda, Babilonia llactata fiñashpa, Mandaj Dios imata rurangapa munashcata, caldeo runacunata fiñashpa imashna llaquichingapa yarijushcataca uyaichiyari. Paicunapaj ashtahuan uchilla huahuacunacamanmi apashpa rinajunga. Paicunapaj huasicunatapash tucuillami tucuchinga.
46Babilonia llactata mishashpa caparinajujpica, alpa mamapashmi cuyurca. Chai ninanda caparinajushcapash, tucui llactacunacamanmi uyarirca.
Who We AreWhat We EelieveWhat We Do
2025 by iamachristian.org,Inc All rights reserved.
