Psalms 62 - Quichua Imbabura 2016

Taita Dios tucuimanda pacashpa charijushcamandaCandajcunata mandaj Jedutún candachijuchun, David rurashca Salmomi.

1Taita Diospillami samai ushani.

Paillami, ñucataca quishpichihuan.

2Paillami, jatun rumishna, ñucataca pacahuan.

Pai shinllichijpimi, na urmasha.

3Cangunaca, ¿ima punllacamanda, llaquichinata yariajlla causagringuichi?

Cangunaca, ¿pirca urmashpa llapijshna tucuchingapachu causanajunguichi?

4Mandanata quichungapallami, yariashpa causanguichi.

Llullashpallami cushijunguichi.

Shimihuanga alicachishpapash, shungupica, na alitami yarinajunguichi. Selah

5Ñucaca, Taita Diospillami samani.

Paitallami shuyashpa causani.

6Paillami, jatun rumishna, ñucataca pacahuan.

Pai shinllichijpimi na pandarishpa urmasha.

7Taita Diosmi, quishpichishpa ñucataca jatumbi churahuan.

Taita Diosmi, ñucapaj jatun rumishna cashpa pacahuan.

8Pai agllashca gentecunaca,

Paitalla shuyashpami causana canguichi.

Paipaj ñaupajpica,

Paitallami tucui shunguhuan mañana canguichi.

Taita Diosmi, ñucanchitaca huacaichishpa charijunga. Selah

9Cai pachapi causaj runacunaca, ashatalla causashpa tucurinallami.

Paicunata tucuillata tandachishpa pezajpica,

imallapash na cangachu.

10Shujcunata llaquichinataca na yarinachu canguichi.

Shuhuanatapash na yarinachu canguichi.

Imata ninanda charishcahuambash, na cushijunachu canguichi.

11Taita Diostaca cashna nijtami uyarcani,

chaitaca, ishcaicamanmi cashna nirca:

“Ñucami ninan ushaita charij Taita Dios cani,

12Ninan juyaita charij, canda mandaj Taita Diosmi cani.

Canmi, gentecuna imashna causashcatapash ricushpa cungui” nijtami uyarcani.