1Huahuacuna, taita yachachishcataca uyanami canguichi.
Aliguta yarishpa causanata yachangapami, aliguta uyana canguichi.
2Ali yachajunatami, cangunamanga yachachijuni.
Ñuca mandashcataca, na saquinachu canguichi.
3Ñucapash, ñuca taitapaj churillatami carcani.
Ñuca mamapajca, shujlla juyashca churimi carcani.
4Ñuca taitaca, cashna nishpami yachachin carca:
“Ñuca yachachishca yuyaicunataca, cambaj shungupi charingui.
Ñuca mandashcacunata cazushpaca causanguimi.
5Ali yachanatapash, ali yuyaitapash japingui.
Ñuca shimihuan yachachishca yuyaicunataca,
ama cunganguichu, ama saquinguichu.
6Chaicunata na saquijpica, cai ali yachanami candapash huacaichinga.
Can juyajpica, candapash huacaichingami.
7Tucuimanda yalica, ali yachanatami ashtahuan munana cangui.
Tucui imata charinacunamanda yalica, ali yuyaitami japina cangui.
8Ali yachanata can jatunyachijpica, candapash jatunyachingami.
Ali yachanata chasquijpica, candapash jatumbimi churanga.
9Cambaj umapipash, juyailla ricurijujtami churachinga.
Juyailla ricurijuj coronatami caranga” nishpami yachachin carca.
10Ñuca huahualla, ñuca yachachishcacunata uyashpa chasquinami cangui.
Shina cajpimi, can causana huatacunapash ashtahuan miranga.
11Candaca, aliguta yachajuna ñambimi pushashcani.
Alitalla rurashpa purina ñangunapimi pushashcani.
12Chai ñambi can purijujpica, imapash na jarcangachu.
Calpashpa rijushpapash, na nitijanguichu.
13Ali yuyaita ñuca cushcataca, ama saquinguichu.
Chaita aliguta alichijpimi, canmanga causaita caranga.
14Diosta na manllajcuna purina ñandaca, ama puringuichu.
Na alicunapaj ñandapash, ama ringuichu.
15Chai ñandaca na rinachu cangui.
Chai ñanmandaca anchurishpami, chaitaca na purina cangui.
16Paicunaca, imatapash na alita rurashpami cushijunajun.
Pitapash na pandachi ushashpaca, puñuitapash na tarinllu.
17Na alita ruranatallami, micunatashna munanajun.
Na alita ruranatallami vinotashna ufianajun.
18Ashtahuangarin, alitalla rurashpa causajcunapajca, yurajlla punllayamujuj michashnami.
Ashtahuan ashtahuan punllayamushpa, alipacha punchayachij michashnami.
19Diosta na manllajcunapaj ñanga, yana tutashnami.
Paicunaca, imapi nitijarijtapash na yachanllu.
20Ñuca huahualla,
ñuca yachachishcacunataca aligutapacha uyahuangui.
Ñuca cushca yuyaicunataca, aligutami uyana cangui.
21Cai yachachishcacunaca, cambaj ñaupajmandapash ama anchurichun.
Cambaj shungu ucupipash, alichishpa charingui.
22Caicunata yachajungapa munajcunaca, ali causaitami charinga.
Ali causaita charingapa jambimi canga.
23Tucuimanda yalica, cambaj shungutami aliguta huacaichina cangui.
Shungumandami causaica llujshijun.
24Cambaj shimihuan, jatun na alita rimanataca saquinami cangui.
Cambaj shimihuan, na alicunata rimanataca saquinami cangui.
25Cambaj ñavihuambash, aliguta ricushpa catingui.
Imata cashpapash, ñaupajman ricushpa catingui.
26Can saruna chaqui ñandapash, imashna cajta ali ricungui.
Cambaj causaitapash, canllatami aliguta ricuna cangui.
27Alimambash, lluquimambash ama anchuringuichu.
Cambaj causaipica, ima na alimandapash anchurinami cangui.
Who We AreWhat We EelieveWhat We Do
2025 by iamachristian.org,Inc All rights reserved.
