1 CORINTIOS 9 - Quichua Imbabura 2016

Apostolcunaca, imagutapash japinatami charin

1¿Nachu apóstol cani? ¿Nachu imatapash rurai ushanalla cani? ¿Nachu ñucanchi Apunchi Jesustapash ricurcani? ¿Nachu cangunaca, ñuca villajpi Apunchi Jesusta catinajunguichi?

2Shujcunapaca, na apóstol cashpapash, cangunapajca apostolpachami cani. Apostolpacha cashcataca cangunami, Apunchi Jesusta crishpa ricuchinajunguichi.

3Ñucata juchachijcunatami, cashna nishpa tigrachini:

4¿Nachu ñucanchipash ufiaita, micuita ushanalla canchi?

5Caishuj apostolcunashna, Apunchi Jesuspaj huauquicunashna, Cefas shuti huauquishna, ¿nachu ñucanchipash, crij huarmita cazarashpa pushamui ushanalla canchi?

6Na cashpaca, ñucapash, Bernabepash, culquita japingapaca ¿imatapash shujta rurashpachu causana canchi?

7Macanajuj runa cangapaca,¿maijanda paipaj culquita cushpa yachajungapa ringa? ¿Maijanda uvata tarpujpi fucushcataca, na micunga? Na cashpaca, ¿maijanda llamacunata michishpa purijpash, chai llamacunamanda lechetaca na ufianga?

8Caitaca, ¿ñucallachu chashna nijuni? ¿Nachu mandashca shimipipash chashnallata nijun?

9Moisés mandashca shimipica: “Trillajuj huagrataca, ama shimita huatanguichu” nishpa quilcashcami tiyajun. Taita Diosca, ¿huagracunata llaquishpallachu chashna nijushcanga?

10Nachu, ¿ñucanchimanda chashna nijushcanga? Chaitaca, ñucanchipaj ali cachunmi quilcashca. Yapujpash, fucujpi japishapacha yashpami yapujun. Trillajpash, granota japishapacha yashpami trillajun.

11Cangunapurapica, Diospaj shimitami ñucanchica tarpurcanchi. Shina cashpaca, cangunamanda imagutapash japinaca, ¿yapachu canga?

12Shujcunapash, cangunamanda japinajujpica, ¿nachu ñucanchicarin japinata charinchi?

Ashtahuangarin, Cristomanda ali villanata villana ama jarcarichunmi, imatapash na mañarcanchi. Shina cashpami, tucui ima llaquitapash apanajunchilla.

13Diospajta rurajcunapash, ¿nachu Diospaj huasiman apamushcata micunajun? Shinallata, Diosman carashpa altarpi rupachijcunapash, ¿nachu chai altarmandallata micunajun?

14Shinallatami Apunchi Jesuspash, quishpirinamanda villajcunataca, chaita rurashcamandallata micushpa causachun mandashca.

15Chashna cajpipash, ñucaca imatapash na mañashcanichu. Canguna ñucaman imatapash carachun yashpaca na quilcanichu. Ñuca chashna rurashpa cushijujtaca, nara pipash na alicachishpa rimajpillatami huañungapa munani.

16Quishpirinamanda villajushpaca, imamanda jariyanatapash na charinichu. Chaitaca villanapachami cani. Quishpirinamanda na villashpaca, ¡aij imachari tucuiman!

17Ñuca tucui munaihuan villajushpaca, japinata charinipachami. Ashtahuangarin, na tucui munaihuan villajushpapash, Dios ñucaman mingashcataca pactachinapachami cani.

18Ali villanata villajushpaca, ¿ima japinatata charini? Cristomanda ali villanata villashcamandaca, imatapash na mañajunichu. Ali villanata villashcamanda japinata charishpapash, na imatapash mañashpa llaquichijunichu.

19Ashtacacuna quishpirichunmi, na pipaj gañan cashpapash, tucuicunapaj gañanshna tucushcani.

20Judiocuna quishpirichunmi, judiocunahuan cashpaca, paicunashnallata purini. Mandashcata cazujcunahuan cashpaca (Chaita na cazuj cashpapash), mandashcata cazujcuna quishpirichunmi, mandashcata cazujcunashnallata purini.

21Mandashcata na cazujcunahuan cashpaca, mandashcata na cazujcunapash quishpirichunmi, mandashcataca na cazunshnallata purini. (Shina cashpapash, Taita Dios mandashcataca na saquishpami, Cristo mandashcata pactachijuni).

22Chairalla crijcunahuan cashpaca, paicunapash quishpirichunmi, chairalla crijshnalla purini. Tucuicuna quishpirishcanman yashpami, tucuita rurashpa, tucui gentecuna imashna causajta catini.

23Quishpirinamanda villashcamanda japingapami chashna rurashpa catijuni.

24Pugllaj pambapi mishangapa calpajcunaca, tucuillami calpanajun. Shina cashpapash, maijan mishajlla japinataca, ¿nachu yachanguichi? Cangunapash japigringapaca, calpashpa mishajshnami causana canguichi.

25Imapi mishangapa munashpapash, na alita ruranamandaca jarcarinmi. Paicunaca ismushpa tucurinalla coronata japingapallami chashna ruranajun. Ashtahuangarin ñucanchica, na tucurinalla coronata japingapami ali causana canchi.

26Shina cajpimi, ñucapash na yangata calpajshna calpajuni. Shinallata macanajushpapash, na huairata huajtajshna yangata huajtajunichu.

27Ashtahuangarin, ñuca cuerpotaca macashpa cazuchinshnami, Diospajta rurachun churani. Shujcunaman villashca jahuaca, ama ñucara yangapi saquiringapami chashna rurajuni.