1 SAMUEL 15 - Quichua Imbabura 2016

Diosta na cazujpimi, Saultaca ama ashtahuan mandachun llujchishca

1Chai jipami Samuelca, Saultaca cashna nirca: “Mandaj Diosmi, pai agllashca Israelcunata jatun mandaj cachun, aceiteta talishpa canda javichun cachahuarca. Shina cashcamanda cunanga, Mandaj Diospaj Shimicunata ali uyangui.

2Tucuita Mandaj Diosca, cashnami nirca: ‘Amalec gentecuna, Israelcunata, Egiptomanda vichai shamunajujpi, ñambi jarcashpa llaquichishcamandaca, Ñucami randi llaquichigrini.

3Shina cashcamanda, amalec gentecunataca huañuchigri. Paicuna tucui imatalla charishcacunataca, na llaquishpa, tucuillata tucuchingui. Jaricunata, huarmicunata, huahuacunata, chuchujuj huahuacunata, huagracunata, llamacunata, camellocunata, burrucunatapash, tucuilla huañuchingui’ ninmi” nijurcami.

4Shina nijpimi Saulca, Telaim shuti puebloman tandanajuchun cayashpa, chaquilla rij ishcai patsaj huaranga runacunatapash, Judá llactamanda chunga huaranga runacunatapash yuparca.

5Chai jipami Saulca, amalec runacunapaj puebloman rishpa, pacalla chapanajuchun, pugru pambapi churarca.

6Shinallata, chaipi causaj ceneo gentecunatami, Saulca cashna nirca: “Cangunapash, paicunahuan ama huañungapaca, amalec gentecunamanda llujshishpa richi. Cangunaca, Israelcuna, Egiptomanda shamunajujpica, llaquishpami tucuicunaman alita rurarcanguichi” nircami. Shina nijpimi ceneo gentecunaca, chaimanda llujshishpa rinajurca.

7Chai jipami Saulca, amalec gentecunataca, Havila shuti llactamandaca, Shur shuti llactaman chayangacaman catishpa huañuchirca. Shur shuti llactaca, Egiptomandaca, indi llujshimujmanmi carca.

8Amalec gentecunata jatun mandaj Agag shuti runataca, causajtami japirca. Ashtahuangarin, gentecunataca espadahuanmi huañuchirca.

9Saulpash, Israel runacunapash, Agag shuti runataca na huañuchircachu. Shinallata, ali llamacunata, racu huagracunata, tucui ali animalcunata, jari llamacunata, tucui imalla ali cajtaca, na tucuchingapa munarcachu. Tucui imapapash na alicunatallami, tucuchirca.

10Mandaj Diosca, Samueltaca cashnami nirca:

11“Jatun mandaj cachun Saulta churashcamandaca, ninandapachami llaquirini. Ñucata catinata saquishpami, ñuca Shimicunataca na pactachirca” nircami. Shina nijpimi, Samuelca ninanda llaquirishpa, Mandaj Diostaca tucui tuta ninanda mañajurca.

12Chai jipami Samuelca, nara ali punllayajpillata jatarishpa, tutamandata Saulhuan tuparingapa rirca. Samuel chaiman chayajpimi, cashna ninajurca: “Saulca, ñami Carmel shuti puebloman rirca. Ricui, paica yarina shuj rumi pircata shayachishpami, chaita muyushpa Gilgal shuti puebloman ña urai rirca” ninajurcami.

13Samuel, Saulpajman chayajpimi, Saulca cashna nirca: “Candaca, Mandaj Diosllata bendiciapachun. Mandaj Diospaj Shimitaca ñami pactachircani” nircami.

14Shina nijpimi Samuelca, cashna nirca: “Shina cashpaca, ¿imashpata llamacuna, huagracuna huacanajujta uyajuni?” nircami.

15Shina nijpimi Saulca cashna nirca: “Amalec gentecunapaj ashtahuan ali llamacunata, huagracunatami, macanajunata ali yachaj runacunaca na huañuchishpa apamushca. Canda Mandaj Diosman carashpa huañuchingapami apamushca. Ashtahuangarin shujcunataca, tucuillatami tucuchircanchi” nircami.

16Shina nijpimi Samuelca, Saultaca: “Cunan tuta, imatalla Mandaj Dios villashcatami canman villagrini” nijpimi, Saulca: “Villahuailla” nirca.

17Shina nijpimi Samuelca cashna nirca: “Canga, yangalla runami cani yajujpipash, ¿nachu candaca Israel ayllucunata mandaj cachun churarca? Mandaj Diosmi candaca, Israel llactata jatun mandaj cachun agllashpa churarca.

18Shina cajpimi Mandaj Diosca, candaca: ‘Juchata ruraj amalec runacunataca, huañuchishpa tucuchigri’ nishpa cacharca.

19¿Imashpata Mandaj Diostaca na cazurcangui? Ashtahuangarin paicuna imatalla charishcacunata apamushpami, Mandaj Diospaj ñaupajpica na alita rurashcangui” nircami.

20Shina nijpimi Saulca, Samueltaca cashna nijurca: “Ashtahuangarin Mandaj Dios rimashca Shimitaca alimi pactachircani. Chaimandami, Mandaj Dios mandashpa cachajpi rishpa, amalec gentecunata jatun mandaj Agag shuti runataca apamurcani. Shinallata, amalec gentecunatapash tucuillatami huañuchircani.

21Ashtahuangarin macanajunata yachaj runacunami, tucuchinajuchun Dios mandashca, punda huacharishca llamacunata, huagracunata apamurca. Chaicunataca, canda Mandaj Taita Diosman, Gilgal pueblopi cushpa huañuchingapami charinajun” nijurcami.

22Shina nijpimi Samuelca, cashna nijurca: “Mandaj Diosca, ¿Paiman cushpa tucuillata rupachishcahuan, animalcunata cushpa huañuchishcahuanllu, Pai mandashca Shimicunata pactachijpishna cushijunga? Ashtahuangarin, Paita cazushpa causanami, animalcunata cushpa huañuchinatapash ashtahuan yali ali canga. Shinallata, jari llamacunapaj virata cunapaj randica, paita ali uyanami ashtahuan ali canga.

23Paita na cazushpa causanaca, brujurishpa juchata rurajshnallatami ricurin. Shinlli shungu canapash, rurashca diosta mañashpa causanashnallatami. Chashna rurashpami, Mandaj Diospaj Shimitaca yangapi churarcangui. Chaimandami Diospash, candaca yangapi churashpa, jatun mandaj cashcamandaca anchuchirca” nijurcami.

24Shina nijpimi Saulca, Samueltaca cashna nirca: “Shina cashpaca, juchatami rurapashcani. Mandaj Dios mandashcatapash, can imatalla nishcatapash na cazushcanichu. Gentecunata manllaimandami, paicuna imata mañashcata rurachun saquircani. Cunanga, ñuca juchataca perdonashpa,

25Mandaj Diosta alicachishpa mañangapa, ñucahuan tigrapashunlla” nircami.

26Shina nijpimi Samuelca, Saultaca cashna nirca: “Canhuanga na tigrashachu. Canga, Mandaj Diospaj Shimita yangapi churashpami, na cazurcangui. Chaimandami, Mandaj Diospash, candaca yangapi churashpa, Israel llactata jatun mandaj cashcamandaca anchuchirca” nircami.

27Chai jipami, Samuel tigrashpa ri callarijujpi, Saulca, Samuelpaj jahualla churajuna ura pundamanda charirca. Chashna charijpimi, chai churajuna pundaca liquirirca.

28Shinamandami Samuelca, Saultaca cashna nirca: “Cunanga, Mandaj Diosca can chashna liquishcashnami, Israel llactata can mandanataca quichurca. Chai mandanataca, cambaj cumbapurallata, canda yali ashtahuan ali runamanmi cushca.

29Ninan ushaita charij, Israelcunapaj Diosca na llullashpami, Pai imata nishcatapash tucuita pactachinga. Paica na runacunashna canchu, Paica Dios cashpami, na llullashpa tucuita pactachinga” nircami.

30Shina nijpimi Saulca, cashna nirca: “Ñucaca, juchatami rurashcani. Shina cajpipash, ñuca llactapuracunata mandaj rucucunapaj ñaupajpi, Israelcunapaj ñaupajpica ama na alipica churahuanguichu nipanimi. Cunanga, canda Mandaj Taita Diosta alicachishpa mañangapa, ñucahuan tigrapashun” nircami.

31Shina nijpimi, Samuelca, Saulta catishpa rirca. Chaipimi Saulca, Mandaj Diosta ninanda alicachijurca.

32Chai jipami, Samuelca: “Amalec gentecunata jatun mandaj Agag shuti runata, caiman pushamuichi” nirca. Agag runaca cushijushpami: “Llaquinayaita huañuchi tucunamandaca, quishpirishcanimi” yashpa quimirijurca.

33Ashtahuangarin Samuelca, cashnami nirca: “Canga, cambaj espadahuan huahuacunata huañuchishpami, ashtaca huarmicunata, huahua illajta saquircangui. Chashnallatami cambaj mamapash, huahua illaj saquiringa” nishpami, Agag shuti runataca, Mandaj Diospaj ñaupajpi, Gilgal shuti pueblopi huañuchishpa, asha asha fitirca.

34Chai jipami Samuelca, Ramá shuti puebloman tigrajpi, Saulpash, Gabaa shuti pueblopi, paipaj huasiman vichai rirca.

35Samuelca, pai huañuna punllacamanmi Saultaca, cutinga na ricurca. Samuelca, Saulmandaca huacaillami causarca. Mandaj Diospash, Israel llactata jatun mandaj cachun Saulta churashcamandaca, ninandapachami llaquirirca.