ÉXODO 14 - Quichua Imbabura 2016

Israelcuna, Puca Cuchata chimbashcamanda

1Mandaj Diosca, Moisesmanmi cashna nirca:

2“Israelcunataca cashna ningui: ‘Baal-zefón shuti pueblo chimbapurapi mama cuchahuan, Migdol shuti pueblohuan chaupipi tiyajuj Pi-hahirot pueblo chimbapuraman tigrashpa carpacunata shayachishpa saquiringuichi.

3Faraonga, Israelcunataca: Cai llactapillatami jichushca pambami, vichashcashna purinajunga yajungami.

4Ñucami, cangunata catishpa richun Faraonbaj shunguta shinlliyachisha. Faraondapash, paipaj tucui macanajuj runacunatapash Ñuca tucuchijpimi, Israelcunaca ninanda alicachihuanga. Shinallata Egiptopi causajcunaca, Ñucalla Mandaj Dios cajtapashmi yachanga’ ningui” nijurcami. Shina nijpimi paicunaca tucuita chashna ruranajurca.

5Egipto llactata jatun mandajmanmi, Israelcuna pacajushpa rinajujta villashca carca. Shina villajpimi Faraonbash, cati mandajcunapash, Israelcunata fiñashpa cashna ninajurca: “Ñucanchipajta ruranajuj Israelcuna saquishpa richunga, ¿imashpata saquishcanchiyari?” ninajurcami.

6Shinamandami Faraonga, paipaj carretata caballocunapi huatashpa, gentecunatapash pushashpa rirca.

7Shinallata, sucta patsaj ashtahuan ali carretacunata, Egiptomanda tucui carretacunata, chai carretacunapi purij macanajuj runacunata mandajcunatapashmi tandachishpa rirca.

8Egipto llactata jatun mandaj Faraonbaj shungutaca, Mandaj Diosllata shinlliyachijpimi Faraonga, Israelcunata catishpa rijurca. Ashtahuangarin Israelcunaca, Diospaj ninan ushaihuan llujchijpimi llujshishpa rinajurca.

9Egiptopi causajcunaca, tucuilla caballocunandi, Faraonbaj carretacunandi, caballopi tiyarishpa macanajuj runacunandi, paipaj tucuilla macanajuj runacunandimi catinajurca. Israelcunataca, Baal-zefón shuti pueblo chimbapurapi, Pi-hahirot shuti puebloman chayanapi, mama cucha manñapi, carpacunata shayachishpa tiyanajujtami japigrirca.

10Faraón ña chayajujpi, Israelcuna vichai ricushpaca, Egiptopi causajcuna paicunapaj huashata catimunajujtami ricurca. Chaimandami Israelcunaca, ninandapacha manllarishpa, Mandaj Diosta caparishpa mañanajurca.

11Moisestapash cashnami ninajurca:

“Jichushca pambapi ñucanchi huañuchun llujchimungapaca Egiptopica, huañushcata pambana utujucunaca, ¿nachu tiyarca? ¿Imashpata ñucanchitaca, Egiptomanda llujchimushpa cashna llaquipi churashcangui?

12¿Nachu cashna tucunataca, Egiptopi cashpallata cashna ninajurcanchi?: ‘Egiptopi causajcunapajta rurashpa causachun ñucanchitaca saquilla. Jichushca pambapi huañungapa randica, Egiptopi causajcunapajta rurashpa causanami ashtahuan ali canga’ nircanchimi” ninajurcami.

13Shina nijpimi Moisesca, Israelcunataca cashna nirca:

“Na manllashpami shinlli shayarina canguichi. Mandaj Dios cangunata, cunan imashna quishpichijtami ricugringuichi. Cunan ricunajunguichi, chai Egipto runacunataca, cangunapaj tucui causaipi ña na ashtahuanga ricunachu canguichi.

14Mandaj Diosmi, cangunamandaca macanajunga. Cangunaca, imatapash na manllanachu canguichi” nircami.

15Mandaj Diosca, Moisestaca cashnami nijurca:

“¿Imashpata Ñucata caparijungui? Israelcunataca, caimanda llujshishpa rinami canguichi nigrilla.

16Canga, cambaj vara caspita vichai churashpa, mama cucha jahuaman cambaj maquita chutashpa, ishcaipi chaupingui. Shina rurajpimi Israelcunaca, mama cucha chaquishca chaupita yalinajunga.

17Ñucami, Egiptopi causajcunapaj shungutaca, cangunata catichun shinlliyachisha. Faraondapash, paipaj tucui macanajuj runacunatapash, paipaj carretacunapi purij runacunatapash, caballocunapi tiyarij runacunatapash Ñuca tucuchijpimi ninanda alicachinajunga.

18Shina rurajpimi Ñucataca, Mandaj Dios cashcata, Egiptopi causaj runacunaca yachanga. Faraondapash, paipaj carretacunanatapash, caballocunapi tiyarij macanajuj runacunatapash tucuchijpimi, Ñucataca ninanda alicachinajunga” nijurcami.

19Shina cajpimi, tandanajushca rinajuj Israelcunapaj ñaupajpi rijushca Taita Diospaj angelca, paicunapaj huashaman yalishpa catijurca. Shinallata, paicunapaj ñaupajpi rijushca pilarshnalla shayajuj fuyupash anchurishpami, paicunapaj huashaman yalirca.

20Chai fuyuca, Egiptomanda macanajuj runacuna catinajujpi, tandanajushca Israelcuna rinajuj chaupipimi rijurca. Egipto llacta macanajuj runacunataca, fuyupash, yana tutapashmi jarcajurca. Ashtahuangarin Israelcunataca, tuta cajpipash punchayachishpami pushajurca. Chai tutapica, Egipto llacta macanajuj runacunaca, Israelcunataca na japigri usharcachu.

21Moisesca, paipaj maquitaca mama cucha yacu jahuamanmi chutarca. Chashna chutajpimi Mandaj Diosca tucui chai tutapica, indi llujshimujmanda shinlli huairahuan mama cuchata chaupirca. Shina chaupijpi mama cucha chaquijpimi, yacuca caiman chaiman saquirirca.

22Shina cajpimi Israelcunaca, mama cucha chaquishca chaupita yalinajurca. Yacuca alimambash, lluquimambash patashna cajpimi chashna yalinajurca.

23Egiptomanda macanajuj runacunaca, Faraonbaj tucuilla caballocunandi, paipaj carretacunandi, caballopi tiyarishca paipaj gentecunandimi, paicunapaj huashata catishpa mama cucha chaupicaman yaicunajurca.

24Tutamanda ña pacarimujujpica, cashnami tucurca: Mandaj Diosca, pilarshnalla ninamanda, pilarshnalla fuyumandami, Egiptomanda macanajuj runacunataca ricurca. Shina ricushpami, Egipto macanajuj runacunataca muspachishpa pandachijurca.

25Paicunapaj carretacunapaj pirurucunata anchuchishpami, paicunataca ninandapacha muspachijurca. Chaimandami Egiptomanda macanajuj runacunaca cashna ninajurca:

“Israelcunapaj ñaupajmandaca, pacajushpa calpashunchi. Mandaj Diosmi, paicunamandaca, ñucanchihuanga macanajujun” ninajurcami.

26Mandaj Diosca, Moisestaca cashnami nirca:

“Cambaj maquita mama cucha jahuaman chutai. Egipto runacunata, paicunapaj carretacunata, paicunapaj caballocunata, yacu quilpachunmi chashna rurana cangui” nircami.

27Shina nijpimi Moisesca, paipaj maquita mama cucha jahuaman chutarca. Ña punllayajujpimi, mama cuchaca ninan shinllitapacha shamushpa quilparijurca. Shina quilparijujpimi, Egiptomanda macanajuj runacuna calpanajushpaca, mama cucha yacuhuan tuparinajurca. Chashnami Mandaj Diosca, Egiptomanda macanajuj runacunataca mama cucha chaupipi tucuchirca.

28Yacu tigramushpami, carretacunatapash, caballocunatapash, Israelcunata mama cuchaman catinajushpa rinajuj, Faraonbaj tucuilla macanajuj runacunatapash quilparca. Paicunapuramandaca shujllapash na saquirircachu.

29Israelcunaca, mama cucha chaquishca chaupitami yalinajurca. Yacucunaca, alimambash, lluquimambash patashna cajpimi chashna yalirca.

30Chashnami Mandaj Diosca, chai punllapica Israelcunataca, Egiptomanda macanajuj runacunapaj maquimanda quishpichirca. Israelcunaca, Egiptomanda macanajuj runacunataca, mama cucha manñapi huañushca sirinajujtami ricunajurca.

31Israelcunaca, Egiptomanda macanajuj runacunata, Mandaj Diospaj ninan ushaihuan chashna llaquichishcata ricushpami, Mandaj Diosta manllaihuan crishpa, Moisestapash crinajurca.