MARCOS 9 - Quichua Imbabura 2016

1Cashnatapashmi paicunamanga nijurca:

“Na llullashpami cangunataca cashna nini: Taita Dios, Paipaj ninan ushaihuan mandajuj llactataca, caipi shayanajujmanda maijangunaca, nara huañushpallatami ricunguichi” nirca.

Jesusca, punchapamba tucushpami ricurishca(Mat. 17:1-13; Luc. 9:28-36)

2Jesusca, sucta punlla jipami, Pedrotapash, Jacobotapash, Juandapash, paicunatalla pushashpa jahua urcuman rirca. Chaipimi paicunapaj ñaupajpi punchapamba tucushpa ricurirca.

3Pai churajushcapash, yura yura rasushna punchapamba tucushpami ricurirca. Cai pachapica, pipash na chashna yuraj yurajtaca tajshaj tiyanllu.

4Chaipimi, Eliaspash, Moisespash, Jesushuan parlanajuj ricurirca.

5Shina ricushpami Pedroca, Jesusta cashna nirca:

“Yachachij ñucanchicarin alipajmari caipi cashcanchi. Cunanga, quimsa chugllatami ruragrinchi. Shujtaca canman, shujtaca Moisesman, shujtaca Eliasmanmi ruragrinchi” nirca.

6Paicunaca ninanda manllarishca cashpami, Pedroca imata nijurishcatapash na yacharca.

7Shina nijujhuanmi, fuyu llandushpa paicunataca, ñapash quilparca. Chai fuyu ucumandaca cashna rimajmi uyarirca:

“Caimi, Ñuca juyashca Churigu. Paitami uyana canguichi” nircami.

8Shina nijhuan, ricunajushpaca, pitapash na ashtahuan ricurcachu, ashtahuangarin, Jesustaca, Pailla cajtami ricunajurca.

9Chai urcumanda urai shamunajushpami Jesusca cashna nirca:

“Runa Aichayuj tucushca Ñuca, huañushcacunapaj chaupimanda causaringacaman canguna ricushcataca, pimambash nara villanachu canguichi” nircami.

10Shinamandami, pimambash na villashpa, paicunapuralla nirinajushpaca:

“‘Huañushcacunapaj chaupimanda causarinaca’ ¿imata canga?” ninajurca.

11Shinamandami:

“Mandashca Shimita yachachijcunaca, ¿imashpata: ‘Eliasrami punda shamunapacha’ ninajun?” nishpa, Jesustaca tapunajurca.

12Shina tapujpimi Jesusca cashna nirca: “Eliasca, punda shamunapachami. Pai shamushpami, cutin tucuita alichinga. Runa Aichayuj tucushca Ñucata ninanda llaquichishpa, yangapi churashcami canga nishpaca ¿imashpata quilcashca tiyajun?

13Ashtahuangarin, cangunaman cashna nishpami villani: Eliasca ñamari shamurca. Paicuna munashcata rurashpami, chai quilcashcapi paimanda ima nijushcataca pactachirca” nijurcami.

Aya jundashca huambratami Jesusca alichishca(Mat. 17:14-21; Luc. 9:37-43)

14Paipaj yachajujcuna maipi cashcaman chayamushpaca, ashtaca gentecuna chaupipi churashca shayanajujtami ricurca. Chaipica, mandashca Shimita yachachijcuna, paicunahuan fiñanajushpa rimarinajujtami ricurca.

15Chai tucuilla gentecunaca, Jesús shamujujta ricushpami, ninanda cushijushpa tuparingapa calpashpaca, “¿alillachu shamujupangui?” ninajurca.

16Jesús, Paipaj yachajujcunata tapushpami:

“¿Imatata paicunahuanga nirinajunguichi?” nirca.

17Chaipimi, ashtaca gentecunamanda shuj runaca, Jesusta cashna nirca:

“Yachachij, Ñuca churigutami upayachij aya jundashca cajpi, cambajman apamuparcani.

18Chai aya japimushpami, ninanda chujchuchishpa, babasta shitachimujpi, quirucunatapash caniripan. Shina cashpami, ninanda tulluyashpa catijupan. Shina cajpimi: ‘Ayata llujchipaichi’ nishpa, cambaj yachajujcunapajman apamurcani. Ashtahuangarin paicunaca, na llujchi usharcachu” nijurcami.

19Shina nijpimi Jesusca cashna nirca:

“¡Na crij gentecunamanda miraicuna! ¿Ima punllacamanda cangunahuanga cashna cashayari? ¿Ima punllacamanda cangunahuanga cashna llaquilla cashayari? Chai huambrataca, caiman apamugrichi” nirca.

20Shina apamujpimi, Jesusta chai aya ricushpaca, chai huambrataca alpapi shitarca. Shina cashpami, chai huambraca ninanda chujchushpa, shimimambash babasta shitashpa, caiman chaiman shitarijurca.

21Huambrapaj taitata Jesús tapushpaca:

“¿Ñachu unaita cashna llaquita apajun?” nircami.

Shina nijpimi:

“Ña huahuamandami chashna causajupan.

22Ayaca, huañuchingapa munashpami, ninacunapi, yacucunapi cutin cutin shitajunlla. Imashpallapash, ñucanchita llaquishpa ¿nachu yanapahuanguiman?” nircami.

23Shina nijpimi Jesusca, cashna nirca:

“¿Canga chaitaca cri ushanguichu? Chashnata crijpica, tucuita rurai ushashcami canga” nirca.

24Shina nijhuanmi chai huambrapaj taitaca, cashna nishpa caparirca:

“Ari, crinipachami. Ashtahuan ali crij cangapa yanapahuai” nircami.

25Ashtaca gentecuna jundamujta Jesús ricushpami, mapata rurachij ayataca ninanda rimashpa cashna nirca:

“Cai huambrata upayachijun, na uyachun saquij aya, ama cutinga tigrashpa yaicungapa cai huambramandaca llujshishpa ri ninimi” nirca.

26Shina nijpimi, chai ayaca ninanda caparishpa, huambrataca ninanda chujchuchishpa llujshishpa rirca. Chai huambraca huañushcashna sirijujpimi, ashtaca gentecuna ricushpaca:

“Huañushcamari” ninajurca.

27Ashtahuangarin, maquimanda aisashpa Jesús jatarichijpica, ali shayarircallami.

28Huasiman Jesús yaicujpimi, Paipaj yachajujcunaca:

“¿Imashpata ñucanchica, chai ayataca na llujchi usharcanchi?” nishpa tapunajurca.

29Shina tapunajujpimi Paica cashna nirca:

“Cashna ayacunaca na llujshingallachu, ashtahuangarin, na micushpa, ninanda Diosta mañashpallami llujchi ushana” nircami.

Jesusca, Pai huañunata cutinmi villashca(Mat. 17:22-23; Luc. 9:43-45)

30Chaimanda llujshishpaca, Galilea llactatami yalinajurca. Chaita rijujtaca, pipash ama yachachunmi munarca.

31Jesusca, Paipaj yachajujcunaman yachachishpandi rijushpami cashna nirca:

“Runa Aichayuj tucushca Ñucataca, runacunapaj maquipimi japichihuanga. Paicunami Ñucataca huañuchihuanga. Huañuchijpipash, quimsa punllahuanga causarishallami” nircami.

32Ashtahuangarin, imamanda chashna nijujtapash na yuyaipi japircachu. Chashna cashpami tapungapapash manllanajurca.

“¿Maijanshi ashtahuan yali jatun canchi?” ninajushcamanda(Mat. 18:1-5; Luc. 9:46-48)

33Jesusca, Capernaúm puebloman, chayamushpami, huasipi cashpa, Paipaj yachajujcunata cashna nishpa tapurca:

“Cangunaca, ¿imatata ñandaca parlashpandi catimurcanguichi?” nircami.

34Ashtahuangarin paicunaca: “¿Maijanshi ashtahuan jatun canchi?” nishpandi, ñanda shamunajushca cashpami, upalla uyanajurca.

35Shinamandami Jesusca tiyarishpa, Paipaj chunga ishcai yachajujcunata cayashpa cashna nirca:

“Maijambash pundapi cangapa munashpaca, tucuicunamanda jipa tucushpami, tucuillapajta ruraj cana canguichi” nircami.

36Shina nishpallami, shuj huahuata paicunapaj chaupiman pushamushpa, chai huahuata marcashpa, Jesusca paicunata cashna nirca:

37“Maijambash Ñuca shutipi, cai huahuatashna chasquishpaca, Ñucatami chasquihuan. Shinallata, maijambash Ñucata chasquishpaca, na Ñucatalla chasquinllu. Ashtahuangarin, Ñucata cachamuj Taitatapashmi chasquijun” nircami.

“Maijambash ñucanchita na fiñashpaca, ñucanchipurami” nishcamanda(Luc. 9:49-50)

38Shina nijujpimi Juanga, cashna nishpa tigrachirca:

“Yachachij, cambaj shutipi rimashpa ayacunata llujchijujtami shuj runataca ricurcanchi. Paitaca, na ñucanchihuan catijuj cajpimi, ama chashna rurachun jarcarcanchi” nircami.

39Shina nijpimi Jesusca cashna nirca:

“Na jarcashpa saquinallami canguichi. Maijan cashpapash, Ñuca shutipi pipash na rurai ushanallata rurajushpaca, Ñucata fiñashpa ima na alitapash na rimai ushangachu.

40Maijambash ñucanchita na fiñashpaca, ñucanchipurallatami.

41Maijan cashpapash: ‘Caicunaca Cristopajmi’ nishpami, shuj vaso yacuguta Ñuca shutipi cangunaman caranga. Na llullashpami cangunataca cashna nini: Paicunaca, Dios carajpi japinataca napacha chingachingachu.

Juchapi urmachinaca jatun llaquimi(Mat. 18:6-9; Luc. 17:1-2)

42Maijambash cai huahuacunashna Ñucata crijcunata pandachijcunataca, jatun molino rumita cungapi huatashpa, mama cuchapi shitashpachari ashtahuan ali canman.

43Cambaj maqui na alita rurachingapa munajpica, muchunguilla. Chashna shujlla maquihuan causaita causangapa rinami, ashtahuan ali canga. Ashtahuangarin, pipash na huañuchi ushanalla, ucu pacha ninaman, ishcandi maquihuan rupangapa rinaca napacha alichu.

44Ucu pachapica, jurucunapash na huañunllu, ninapash na huañushpa rupajunllami.

45Cambaj chaqui na alita rurachingapa apajpica muchunguilla. Chashna shujlla chaquihuan causaita causangapa rinami, ashtahuan ali canga. Ashtahuangarin, pipash na huañuchi ushanalla, ucu pacha ninaman, ishcandi chaquihuan rupangapa rinaca, napacha alichu.

46Ucu pachapica, jurucunapash na huañunllu, ninapash na huañushpa rupajunllami.

47Shinallata cambaj ñavi, na alita rurachingapa munajpica, llujchinguilla. Taita Dios mandajuj llactaman, shujlla ñavihuan yaicunami, cambajca ashtahuan ali. Ashtahuangarin, ishcandi ñavihuan, ucu pachaman shitai tucunaca, napacha alichu.

48Ucu pachapica, jurucunapash na huañunllu, ninapash na huañushpa rupajunllami.

49Tucuicunami cachihuan, ninahuan imashna mapa illajta rurajshna rurai tucunguichi.

50Cachica alimi. Ashtahuangarin cachi amindayashca cajpica, ¿imahuanshi mishquichinguichi? Cangunallatami cachigushna ali cana canguichi. Caishujhuan, chaishujhuan na fiñanajushpami aliguta causana canguichi” nijurcami.