DEUTERONOMIO 2 - Quichua Imbabura 2016

Chaquishca pambapi causashca huatacunamanda

1Chai jipaca, Mandaj Dios mandashcashnami, Puca Cuchaman rina ñandallata tigrashpa, jichushca pambaman llujshircanchi. Shinami, Seir shuti urcuta muyushpa, unai huatacunata purircanchi.

2Shina cajpimi Mandaj Diosca, cashna nihuarca:

3‘Ñami cai urcutaca muyushpa ninanda purishcanguichi. Cunanga janajman richilla.

4Israelcunataca, cashna nishpa mandangui: Cangunapaj ayllupura Esaupaj miraicuna causanajuj Seir shuti llactata yalinajujpica, cangunataca ninandami manllanga. Shina cajpipash, paicunataca ama ima na alita rurashpa yalinguichilla.

5Paicunahuanga na macanajunachu canguichi. Paicunapaj alpataca, cangunamanga chaqui sarunatallapash na cushachu. Seir shuti urcutaca, Ñucami Esaupaj cachun curcani.

6Paicunataca, micunatapash, yacutapash culquipajmi randina canguichi, nishpa mandangui’ nihuarcami.

7Cangunata Mandaj Taita Diosca, canguna imata rurajpipash, ninandami bendiciamurca. Cai jichushca jatun pambapi purinajujtapash, paillata yachanmi. Cangunata Mandaj Taita Diosca, cai chuscu chunga huatata cangunahuan cajpimi, imapash na illaj causarcanguichi.

8Esaupaj mirai ñucanchi ayllucunaca, Arabá llactapi, Elat shuti, Ezión-geber shuti pueblocunaman rina ñambi tiyaj Seir shuti urcucunapimi causanajurca. Shinamandami, paicunamandaca caruta yalinajushpa, Moab llacta jichushca pamba ñanda japishpa shamurcanchi.

9Chaipimi Mandaj Diosca cashna nihuarca: ‘Moab llactapi causajcunataca na fiñachinachu canguichi. Paicunahuan macanajunatapash na yarinachu canguichi. Paicunapaj llactataca, cangunapaj cachunga na cushachu. Ashtahuangarin, Ar shuti pueblotaca, Lotpaj miraicunamanmi curcani’ nihuarcami.

10(Pundaca, Emita gentecunami chaipica causanajurca. Paicunaca, Anac shuti runapaj miraicunashnalla, manllanayai jatun, ashtacapacha gentecunami carca.

11Paicunataca: ‘Anac shuti runapaj miraicunashnalla manllanayai jatun runacunami’ ninajunmi carca. Moab llactapi causajcunaca: ‘Emita gentecunami’ ninajunmi carca.

12Horeo shuti gentecunaca, Seir shuti llactapimi pundaca causanajurca. Paicunatami, Esaupaj miraicunaca llujchishpa cacharca. Shina cachashpami, paicunapaj randi chai llactapi causanajurca. Mandaj Dios carashca llactapi causajcunata, Israelcuna imashna rurashcashnami ruranajurca).

13‘Cunanga ucha jatarishpa, Zered shuti jatun larca yacuta chimbashpa richilla’ nihuarcami. Shina nijpimi ñucanchica, Zered shuti yacuta chimbashpa rircanchi.

14Cades-barnea shuti pueblomanda llujshishpa, Zered shuti jatun larca yacuta chimbangacaman purinajushca huatacunaca, quimsa chunga pusaj huatacunami carca. Mandaj Dios imashna juramentushcashnami, macanajuj runacunapaj tucuilla miraicuna huañushpa tucuringacaman chashna purircanchi.

15Mandaj Diospaj ushaihuan ninanda llaquichishpami, carpacunapi causajcunataca tucuilla tucuchijurca.

16Israelpuracunapi, macanajunata ali yachaj tucuilla runacuna huañushca jipami,

17Mandaj Diosca cashna nihuarca:

18‘Cunanmi canga, Moab llactata yalishpa Ar shuti puebloman rina cangui.

19Amonita gentecunapajman chayashpaca, ama llaquichinguichu. Paicunahuanga, ama fiñanajushpa rimaringuichu. Amón llactapi causajcunapaj llactataca, na canman cushachu. Chai llactataca, Lotpaj miraicunamanmi curcani’ nihuarcami.

20(Chai llactatapash: ‘Manllanayai jatun runacunapaj llactami’ ninajunmi carca. Ñaupa huatacunaca chai llactapica, manllanayai jatun runacunami causan carca. Paicunataca, Amón llactapi causajcunaca: ‘Zomzomeo gentecunami’ ninajunmi carca.

21Chai gentecunaca, Anac shuti runapaj miraicunashna manllanayai jatun, ninan ashtacapacha gentecunami carca. Paicunatami, Mandaj Diosca, amonita gentecuna ricujta, ninanda llaquichishpa tucuchirca. Amonita gentecunaca, shinami paicunata tucuchishpa, paicunapaj randi chaipi causai callarirca.

22Mandaj Diosca, Seir shuti llactapi causanajushca Esaupaj miraicuna ricujta, horeo gentecunata tucuchishcashnami tucuchinga. Esaupaj miraicunaca paicunata tucuchijpimi, paicunapaj randi cunangaman chaipi causanajun.

23Aveo shuti gentecunaca, uchilla llactacunapimi, Gaza shuti pueblocaman causanajurca. Caftoreo shuti gentecuna, Caftor shuti llactamanda shamushpa tucuchishpami, chaipica paicuna causanajurca).

24‘Cunanga, Arnón shuti jatun larca yacuta chimbangapa ucha llujshichilla. Amorreo gentecuna causanajuj Hesbón shuti pueblota jatun mandaj Sehón shuti runataca, paipaj llactandimi cambaj maquipi churarcani. Paipaj llactata japi callarishpa, paicunahuan macanajui callarilla.

25Cunanmi, tucui cai pachapi causanajuj gentecunapica, cangunata ninanda manllana yuyaita churagrini. Chaimandami paicunaca, cangunamanda parlajta uyashpallata, ninanda manllashpa chujchunajunga’ nihuarcami.

Israelcunaca, jatun mandaj Sehón shuti runatami mishashca(Núm. 21:21-30)

26Cademot shuti chaquishca pambamandami, Hesbón shuti llactata jatun mandaj Sehón shuti runahuan ama fiñanajui tiyachun, villajcunata cashna nishpa cacharcani:

27‘Cambaj llacta ñandami, ñucanchica yalingapa munapanchi. Chai ñanda yalinajushpaca, alimambash lluquimambash, na llujshishpami ripashun.

28Micunatapash, yacutapash, can culquipaj jatujpillami, ñucanchica randishpa micupashun, ufiapashun. Yalingapalla ñanda mañachihuai.

29Seir shuti llactapi causanajuj Esaupaj miraicunapash, Ar shuti pueblopi causanajuj moab gentecunapash, ñanda mañachijpimi yalimurcanchi. Ñucanchica, ñucanchita Mandaj Taita Dios caragrijun llactamanmi, Jordán yacuta chimbashpa ringapami ñanda mañanajupanchi’ nichunmi cacharcani.

30Ashtahuangarin, Hesbón pueblota jatun mandaj Sehón shuti runaca, paipaj llactata yalichunga na munarcachu. Cangunata Mandaj Taita Diosmi, chai llactata cangunapaj maquipi churangapa paipaj shungutapash, yuyaitapash shinlliyachirca. Chaimandami, cunangaman chai llactapi causanajunguichi.

31Mandaj Diosca cashnami nihuarca: ‘Jatun mandaj Sehón shuti runataca, paipaj llactandimi cangunapaj maquipi churagrini. Cunanga, chai llactataca cangunapaj cachun japigrinallami canguichi’ nihuarcami.

32Sehón shuti runaca, paipash, paipaj llacta gentecunapashmi, Jahaza shuti pueblopi macanajungapa, ñucanchihuan tuparij shamurca.

33Ashtahuangarin, ñucanchita Mandaj Taita Diosmi, paitaca ñucanchi maquipi churarca. Shinamandami paitapash, paipaj churicunatapash, paipaj tucuilla gentecunatapash misharcanchi.

34Shinallata, paipaj tucuilla pueblocunata quichushpami, chai pueblocunapi causaj jaricunata, huarmicunata, huahuacunatapash shujllatapash na saquishpa, tucuillata huañuchishpa tucuchircanchi.

35Chaicunamandaca, paicunapaj animalcunata, tucui imalla chai pueblocunapi quichushcacunatallami, ñucanchipaj cachun japircanchi.

36Arnón shuti jatun yacu manñapi tiyaj Aroer shuti pueblomanda, shinallata, pugru pambapi tiyaj pueblomanda callarishpaca, Galaad llactapi tiyaj pueblocunacaman, ñucanchi maquimandaca, shujllapash na quishpirircachu. Ñucanchita Mandaj Taita Diosmi, tucuillata ñucanchi maquipi churarca.

37Ñucanchica, Amón shuti llactamanllami na chayarcanchi. Jaboc shuti jatun yacu manñacunapi tiyaj llactacunaman, urcupi tiyaj pueblocunaman, ñucanchita Mandaj Taita Diosllata, na llaquichinachu canguichi nishpa mandashca llactacunamambash na chayashpami yalircanchi.