2 REYES 14 - Quichua Imbabura 2016

Amasías shuti runa mandajushcamanda(2 Crón. 25:1-28)

1Joacaz runapaj churi Joás shuti runaca, ishcai huatatami Israel llactataca mandajurca. Chai huatapimi Joás runapaj churi Amasías shuti runaca, Judá llactata mandai callarirca.

2Amasías runaca, ishcai chunga picha huatata charishpami, mandai callarirca. Paica, ishcai chunga iscun huatatami, Jerusalenbi mandajurca. Paipaj mamaca, Jerusalenmanda Joadán shutimi carca.

3Amasías runaca, Mandaj Diospaj ñaupajpica alita rurajushpapash, paipaj ñaupa taita David rurashcashnaca na pactachircachu, Ashtahuangarin, paipaj taita Joás rurashcashnallami rurajurca.

4Chashna cashpami, lomacunapi altarcunataca, na anchuchirca. Chaicunapimi, gentecunaca animalcunata huañuchishpa, inciensotapash cushnichishpa catinajurca.

5Amasías runa ali mandai callarishpaca, paipaj taita jatun mandajta, paipajta rurajcunallata huañuchishcata yachashpami tucuilla huañuchirca.

6Moisés mandashpa quilcashcapi nijushca pactachunmi paicunapaj churicunataca na huañuchirca. Mandaj Diosca: “Churipaj juchamandapash, taitaca na huañungachu. Taitacunapaj juchamandapash, churica na huañungachu. Ashtahuangarin juchata rurajmi, paipaj juchamanda huañunga” nishcami carca.

7Amasías runaca, chunga huaranga Edom llactamanda runacunatami, Cachi Pambapi huañuchirca. Chai macanajuipi, Sela shuti pueblota quichushpami, Jocteel shutita shutichishca, cunangamanmi chai shutihuan tiyajun.

8Chai jipami Amasías runaca, Israel llactata jatun mandaj Joás runataca: “Ñucapajman shamui” nichun, villaj runacunata cacharca. Joás runaca, Joacaz runapaj churimi carca. Joacaz runaca, Jehú shuti runapaj churimi carca.

9Shina cachajpimi, Israel llactata jatun mandaj Joás runaca, Judá llactata jatun mandaj Amasías runaman cashna nichun cacharca: “Líbano lomamanda cardo shuti cashami, Líbano lomapillata cedro shuti yurataca: ‘Cambaj ushita, ñuca churihuan cazarachun cuhuailla’ nichun cacharca. Ashtahuangarin, cardo shuti cashataca, Líbano urcumanda millai animalcuna sarushpami tucuchirca.

10Ari, Edom llactapi causajcunataca misharcanguimi. Chashna cashpami jariyarijungui. Cambaj munai, jatun tucushpa cushijushpa, cambaj huasipillata tiyajuilla. ¿Imapata cambash, Judá llactapash llaquita apangapa mascajunguiyari” nichunmi cacharca.

11Ashtahuangarin, Amasías runaca na uyanangapa munarcachu. Chaimandami, Israel llactata jatun mandaj Joás runaca vichai shamurca. Shina shamushpami paipash, Judá llactata jatun mandaj Amasías runapash, Judá llactapi tiyajuj Bet-semes shuti pushtupi tuparishpa macanajui callarirca.

12Ashtahuangarin, Judá llactamanda runacunaca, Israelcuna mishajpimi, paicunapaj carpacunaman pacajushpa calpanajurca.

13Israel llactata jatun mandaj Joás runaca, Judá llactata jatun mandaj Amasiastaca, chai Bet-semes shuti pushtupimi prezu japirca. Amasías runaca, Joás runapaj churimi carca. Joás runaca, Ocozías runapaj churimi carca. Judá llactata jatun mandajca, Jerusalenman shamushpami, Jerusalén pircataca, Efraín shuti pungumandaca, pirca tigranapi tiyaj pungucaman, patsaj pusaj chunga metrota urmachirca.

14Chai jipami, Mandaj Diospaj huasipi tucui imalla tiyashcatapash, curitapash, culquitapash aparca. Shinallata, mandashpa tiyana huasimandapashmi, tucui imata charishcatapash, paipaj churicunatapash prezu japishpa, Samaria puebloman apashpa tigrarca.

15Joás runa imatalla rurashcapash, pai macanajungapa imatalla rurashcapash, Judá llactata jatun mandaj Amasías runahuan macanajushpa imatalla rurashcapash, ¿nachu Israel llactata jatun mandajcuna imatalla rurashcata quilcashca libropi tiyajun?

16Joás runa huañushpa, paipaj ñaupa taitacunahuan tandanajungapa rijpica, Israel llactata jatun mandajcunata pambashcapimi, Samaria pueblopi pambarca. Paipaj randica, paipaj churi Jeroboam runami mandajurca.

17Judá llactata jatun mandaj Joás runapaj churi Amasías runaca, Israel llactata jatun mandaj Joacaz runapaj churi Joás runa huañushca jipaca, chunga picha huatatami causajurca.

18Amasías runa imatalla rurashcapash, ¿nachu Judá llactata jatun mandajcuna imatalla rurashcata quilcashca libropi tiyajun?

19Amasías runata huañuchingapa, Jerusalenbi pacalla rimarinajujpimi, Laquis shuti puebloman pacajushpa rijpipash, chaipi japigrishpa huañuchirca.

20Paitaca, Davidpaj pueblo Jerusalenman, caballopi apamushpami, paipaj ñaupa taitacunata pambashcapi pambarca.

21Amasiaspaj randi, Judá llactata mandachunga, paipaj churi Azariastami churarca. Azariasca, chunga sucta huatatami charirca.

22Paipaj taita Jatun mandaj huañushca jipaca, Elat shuti pueblota cutin shayachishpami, Judá llactapajllata cachun tigrachirca.

Jeroboam II, Israel llactata mandashcamanda

23Judá llactata jatun mandaj Joás shuti runapaj churi Amasías runa, chunga picha huatata mandajujpimi, Joás runapaj churi Jeroboam runaca, Israel llactata mandai callarirca. Paica, chuscu chunga shuj huatatami, Samaria pueblopi mandajurca.

24Paica, Mandaj Diospaj ñaupajpica, na alitami rurarca. Nabat shuti runapaj churi Jeroboam runa, Israelcunata juchata rurachishcashnami rurachishpa catijurca.

25Paimi, Israel llactapaj punda mujundaca, Hamat puebloman yaicunamanda callarishpa, Arabá shuti mama cucha manñacaman cutin tigrachirca. Israelcunata Mandaj Diospajta ruraj Jonás villashcashnami chaitaca rurarca. Profeta Jonasca, Amitai shuti runapaj churi, Gat-hefer shuti pueblomandami carca.

26Mandaj Diosca, Israelcuna ninan llaquita apashpa causanajujtami ricurca. Israel llactata yanapangapaca, gañangunapash, na gañangunapash, pipash na tiyarcachu.

27Mandaj Diosca, Israelcunata cai pachamanda chingachingapaca na munarcachu. Chaimandami, Joás runapaj churi Jeroboam runa, paicunata quishpichijuchun agllarca.

28Jeroboam runa imatalla rurashcapash, pai ninan shinlli cashcapash, macanajuicunapi mishashcapash, Judá llactapaj Damasco pueblota, Hamat shuti pueblota, Israel llactapajllata cachun cutin tigrachishcapash, ¿nachu Israel llactata jatun mandajcuna imatalla rurashcata quilcashca libropi tiyajun?

29Jeroboam huañushpa, Israelcunata jatun mandajcunahuan tandanajungapa rijpica, paipaj churi Zacariasmi mandajurca.