DEUTERONOMIO 22 - Quichua Imbabura 2016

1Cambaj huauquipaj huagra cashpa, maltun llama cashpa, chingashca purijujta ricushpaca, ama upalla saquiringuichu. Ashtahuangarin huauquipajmanmi apashpa rina cangui.

2Cambaj huauqui carupi causajpi, na cashpaca, na rijsishcapaj cajpica, chai animaltaca cambaj huasiman apashpa charijushpami, tapuj shamujpica tigrachinalla cangui.

3Burruta cajpi, churajunata cajpipash tarishpaca tigrachinami cangui. Cambaj huauqui imata chingachishcata tarishpapash, chashnami tigrachina cangui. Chaitaca na upalla saquirinachu cangui.

4Cambaj huauquipaj burru cashpa, huagra cashpapash ñambi urmashca sirijujta ricushpaca, uchallami jatarichina cangui.

5Huarmica, na jaripaj churajunata churajungachu. Jaripash, huarmipaj churajunataca, na churajungachu. Canda Mandaj Taita Diosca, maijan chashna rurajcunataca millanayachinmi.

6Ñanda rijushpa, yurapi cashpa, pambapi cashpapash, alasyu animalpaj tazindami huahuacunandi, na cashpaca lulundi taringui. Shinallata, chai alasyu animalca, huahuacunata, na cashpaca lulunda ugllashca tiyajujta tarishpaca, mamatapash, huahuacunandica na apanachu cangui.

7Mamataca calpachun saquishpa, huahuacunatallami apana cangui. Shina rurashpaca, tucuipi ali cashpami unaita causangui.

8Mushuj huasita huasichishpaca, huasi jahua muyundipi pircata rurangui. Shina rurashpami, maijambash chai jahuamanda urmashpa huañujpipash, na juchachi tucungui.

9Uvata tarpujushpaca, imapash shuj granocunandica, ama chapushpa tarpunguichu. Chashna tarpujpira, caishuj granopash, uva chagrapash tucuilla chinganman.

10Huagrahuan, burruhuanga na yugushpa yapunachu cangui.

11Llama milmahuan, lino puchahuan chapushpa ahuashca churajunatapash, na churajunachu cangui.

12Cambaj jahualla jatun churajuna chuscundi esquinacunapica, flecocunata churanami cangui.

Chaira cazarashcacunata mandashcamanda

13Maijan cashpapash, cazarashpa paipaj huarmihuan pacta puñushca jipami na ricunayachinga.

14Shinamandami juchachinamandalla, cashna nishpa rimanga: ‘Cai huarmitami, ñuca huarmi cachun japishpa pacta puñurcani. Paitaca, shuj jarihuan ña pacta puñushcatami yachaj chayani’ ningami.

15Shina nijpica, chai cuitsapaj taita mamaca, chai cuitsataca, maijan jarihuambash nara pacta puñushcata ricuchingapami, pueblo pungupi tiyanajuj mandaj ancianocunapajman, shuj ricuchinatapash apashpa ringa.

16Chai cuitsapaj taitaca, chai ancianocunamanmi cashna ninga: ‘Ñuca ushitami, paipaj huarmi cachun, cai runahuan cazarachircani. Paitaca ña na ricunayachijupanllu.

17Shinallata paica, yangata juchachishpami cambaj ushica, shuj jarihuan ña pacta puñushcami cashca nijun. Ashtahuangarin ñuca ushi pihuambash nara tacarishca cajtaca, cai ricunata ricupaichilla’ ningami. Shina nishpami, pueblopi mandaj ancianocunapaj ñaupajpi, chai cuitsapaj churajunata mandashpa ricuchinga.

18Chaita ricuchijpimi, mandaj ancianocunaca, chai juchachij runata japishpa llaquichinga.

19Jarihuan nara pacta puñushca Israel cuitsata, chai runa yanga juchachishcamandami, patsaj culquita japishpa, cuitsapaj taitaman cunga. Shinallata, chai huarmihuanga, tucui causaipimi na jichushpa causanga.

20Ashtahuangarin chai cuitsataca, shuj jarihuan ña pacta puñushcatami ali yachanga.

21Shinamandami paipaj taitapaj huasi punguman pushajpi, chai pueblopi causanajuj jaricuna, rumicunahuan huañuchinga. Paipaj taitapaj huasipi huainayashpa, Israelpuracunapi na alita rurashcamandami, chashna huañuchinga. Chashna rurashpami, cangunapurapi tiyaj na alitaca anchuchinguichi.

22Maijan runatapash, shujpaj huarmihuan pacta sirijujta japishpaca, ishcanditami huañuchina canga. Chai huarmihuan pacta sirijushca runapash, huarmipashmi huañunga. Chashna rurashpami Israelpurapi tiyaj na alitaca anchuchinguichi.

23Jarihuan nara tacarishca shuj cuitsami, cazarangapa ari nirishca canga. Chashna cashca jahuami, pueblopi causaj shuj jarica paihuan pacta puñunga.

24Shinamandami ishcandita, pueblo punguman apashpa, rumicunahuan huañuchinga. Chai cuitsataca na caparishcamanda, jaritaca shuj jaripaj huarmi canata na alita rurashpa pingaichishcamandami, chashna huañuchinga. Chashna rurashpallami, cangunapuramandaca na alitaca anchuchinguichi.

25Ashtahuangarin cazarangapa ari nirishca shuj cuitsata, pambapi shuj runa tuparishpa, munai na munai na alita rurashcamandaca, chai runatallami huañuchina canga.

26Ashtahuangarin cuitsataca, imatapash na ruranachu. Paita huañuchingapaca, ima na alitapash na rurashcachu. Maijambash, paipaj cumba runaguta huañuchishcashnami cai na alita rurashcaca ricurin.

27Cazarangapa ari nirishca cuitsata, pambapi tuparishpa, munai na munai na alita rurajpi, ninanda caparijpipash, paita mitsangapaca pipash na tiyarcachu.

28Maijan runa cashpapash, cazarangapa nara ari nishca, jarihuan nara tacarishca cuitsata maipi tuparishcapi, munai na munai paita na alita rurashcatami yachaj chayanga.

29Shinamandami, chai na alita ruraj runaca, chai cuitsapaj taitamanga, picha chunga culquita cuna canga. Chaipaj jipami, chai cuitsata pingaichishcamanda, paihuanllata cazarashpa, tucui causaipi na jichui ushanga.

30Paipaj taitapaj huarmihuanga, pipash na pacta puñungachu. Taitataca, pipash na yangapi churangachu.