1Media shuti llactamanda Asuero shuti runapaj churi Darío runami, caldeo runacunapaj llactata jatun mandaj tucurca. Paica, ñami shuj huatata mandajurca.
2Pai mandai callarishca huatapimi, Daniel ñucaca, canchis chunga huatacaman Jerusalén pueblo jichushca sirinata, profeta Jeremiasman Mandaj Dios quilcachishcata callarimanda ricujurcani.
3Chaimandami, Mandaj Taita Diosta ninanda mañashpa mascarcani. Na micushpa, cañamuta churajushpa, uchufatapash churarishpami tiyajurcani.
4Ñucata Mandaj Taita Diosta mañashpami, cashna nishpa ñucanchi juchata villajurcani:
“Mandaj Taita Dioslla, canga manllana Diosmi capangui.
Canga imata ari nishpapash, pactachij Diosmi capangui.
Canda juyashpa, can mandashcacunata pactachijcunataca, llaquijmi capangui.
5Ñucanchica, juchatami rurashcanchi.
Jatun na alitami rurashpa causashcanchi.
Imata cashpapash mapatallami rurashcanchi.
Canda na cazushpami, tucui Can mandashcacunata saquishcanchi.
6Shinallata cambajta ruraj profetacunapash na cazushpami causashcanchi.
Paicunaca, ñucanchita jatun mandajcunaman, ñucanchita cati mandajcunaman,
ñucanchi taitacunaman, llactapi causanajuj tucui gentecunaman,
cambaj shutipi villanajujpipash, na cazushpami causashcanchi.
7Jatun Dioslla, alitalla ruranaca cambajmi capan.
Pingai tucushpa, causanaca ñucanchipajmi capan.
Cunanbimi, Judá llactamanda gentecunapash, Jerusalenmanda gentecunapash,
tucui Israelcunapash, pingai tucushpa causanajunchi.
Ñucanchi taitacuna na cazushcamanda paicunata can llujchishpa cachajpi rishpami,
Israel llacta, caipilla cashpa,
carupi causanajushca cashpapash,
cunanga, shuj llactacunapi chashna causanajunchi.
8Mandaj Dioslla, ñucanchipash, ñucanchita jatun mandajcunapash,
cati mandajcunapash, ñucanchi taitacunapash,
Canda na cazushpa juchata rurashcamandami ninanda pingai tucushpa causanajunchi.
9Ñucanchita Mandaj Taita Diosmi, Paita na cazunajujpipash llaquishpa,
ñucanchi na alita rurashcacunata cungan.
10Ñucanchita Mandaj Taita Diostami na cazushcanchi.
Ñucanchica, paipajta ruraj profetacunahuan, villashpa mandashcatami na cazushcanchi.
11Tucui Israelcunami, Pai mandashcata na cazushpa caruyashcanchi.
Na cazushpa juchata rurashcamandami ninan llaquipi urmashcanchi.
Taita Diospajta ruraj Moisesman mandashpa,
quilcachishcapi villajunshnami llaquita apanajunchi.
Ñucanchica, juchatami rurashcanchi.
12Paica ñucanchitapash, ñucanchita mandajcunatapash llaquichishami nishcataca pactachishcami.
Shinamandami, cai jatun llaquicunata cachamushca.
Cai pachapica, Jerusalenda llaquichishcashnaca, ima punlllapash na llaquichishcachu.
13Moisés mandashpa quilcashcapi nijushcashnami,
cai tucui llaquicunaca ñucanchita japirca.
Ashtahuangarin ñucanchi na ali causaita saquishpa,
na llullaj cambaj shimita yachangapaca,
ñucanchita Mandaj Taita Diostapash na mañashpami causashcanchi.
14Chaimandami Mandaj Diosca,
llaquichinata yarijushpallata, cai tucui llaquicunata cachamurca.
Ñucanchita Mandaj Taita Diosca, tucui imata rurashpapash alitallami ruran.
Ñucanchimi na cazushpa causashcanchi.
15Ñucanchita Mandaj Taita Dioslla,
Can agllashcacunataca ninan ushaihuanmi Egipto llactamanda llujchishcangui.
Shina llujchishpami, tucuicuna rijsishca tucushcangui.
Ñucanchimi Canda na manllashpa, juchata rurashcanchi.
16Jatun Dioslla, alitalla rurashpa pactachijlla cashcashnallata,
Jerusalén pueblomandapash, cambajlla shicanyachishca urcumandapash,
can ninandapacha fiñarishcataca anchuchipailla.
Ñucanchipash, ñucanchi taitacunapash jatun na alita rurashcamandami,
ñucanchi muyundipi causajcunaca Jerusalendapash,
can agllashca gentecunatapash na alicachishpa rimanajun.
17Ñucanchi Taita Dioslla, cambajta ruraj ñuca ninanda mañajujtaca uyahuayari.
Jatun Dioslla, jichushca sirijuj cambajlla huasitaca, ninan juyaihuan ricupayari.
18Ñuca Taita Dioslla, ñuca mañashcataca aligutapacha uyahuayari.
Llaquinayaita ñucanchi causanajujtapash,
Canda mañana pueblo jichushca sirijujtapash, aliguta ricupayari.
Ñucanchica, alitalla rurajcunami canchi yashpaca na mañashpami,
ashtahuangarin Can ninanda llaquij cashcamanda mañapanchi.
19Jatun Dioslla, Jatun Dioslla, ñucanchi mañashcata uyashpa na alita rurashcata cungapayari.
Jatun Dioslla, ñucanchi mañashcata pactachipayari.
Cambaj ninan juyaita charishcamanda, ucha pactachipayari.
Ñuca Taita Dioslla, cambaj pueblomanda can agllashca gentecunamandami, cambaj shutipi mañajuni” nishpami mañarcani.
Canchis chunga semanamanda20Ñucaca, ñucata Mandaj Taita Diospaj ñaupajpimi, ñuca juchatapash, ñuca llactapura Israelcunapaj juchatapash villashpa, cutin cutin mañajurcani. Ñuca Taita Diospajlla shicanyachishca lomamandapashmi, ninanda mañajurcani.
21Shina mañajujpillatami, muscuipishna punda ñuca ricushca Gabriel shuti angelca, jahuata shamushpa ñucapajman chayamurca. Paica, animalta Diosman cushpa huañuchina chishi pachapimi shamurca.
22Paimi, ñucaman aliguta villashpa cashna nihuarca:
“Daniel, cunanga canman ali yachaita, ali yuyaita cungapami shamurcani.
23Can mañai callarijujpillatami ñucataca cachamuhuarca. Canga, ninanda juyai tucushca cajpimi, canda yachachingapa shamurcani. Cunanga, muscuipishna ricushcata yachangapaca, caitami aliguta uyana cangui.
24Cambaj llactapura gentecunapaj,
Diospajlla shicanyachishca cambaj pueblopaj,
yachashpata na cazunata tucuchina,
juchata tucuchina,
juchata perdonangapa pactachina,
causaita causaicaman alitalla rurana,
muscuipishna ricushcacuna, Dios villashca shimicuna tucuilla pactana,
Jucha illaj, tucuita mandanapash pactachunga,
canchis chunga semanami yalinga.
25Caitaca alipachami yuyaipi japina cangui:
Jerusalenda cutin alichinajuchun mandashcamanda callarishpa,
Mandaj Mesías shamunacamanga,
canchis semanapash, sucta chunga ishcai semanapashmi yalinga.
Plazatapash, pueblo muyundi pircatapash, jatun llaqui punllacunapimi alichinajunga.
26Sucta chunga ishcai semana jipami, Mesiastaca huañuchinga.
Napash huañuna cajpitami huañuchinga.
Shuj mandajpaj gentecuna shamushpami,
Jerusalendapash, Diospaj huasitapash tucuillata tucuchinga.
Yacu jundamushpa tucuchijpishnami tucuilla tucuringa.
Jatun macanajui tucuringacamanmi, llaquichishpa tucuilla tucuchinga.
27Shuj semanapica, chai na alita ruraj mandajca, ashtaca gentecunahuanmi pactachingapa ari nijunga.
Shina cashpapash, chaupi semanapica, Diosman animalcunata cushpa huañuchinatapash,
ofrendacunata cunatapashmi anchuchinga.
Chai jipaca, ninan millanayaicunata rurashpami,
Diospajlla huasitaca mapayachinga.
Chai na alita ruraj runata, Dios llaquichingacamanmi, chashna canga” nishpami villahuarca.
Who We AreWhat We EelieveWhat We Do
2025 by iamachristian.org,Inc All rights reserved.