MARCOS 2 - Quichua Imbabura 2016

Na cuyuri ushajuj runatami, Jesusca alichishca(Mat. 9:1-8; Luc. 5:17-26)

1Tauca punllacuna jipami, Jesusca Capernaúm puebloman cutin tigrashpa yaicurca. Chaipi, shuj huasipi cajtami yachaj chayarca.

2Shinamandami, ashtaca gentecuna ñapash tandanajushpa huasi pungucaman jundashpa na pactanajurca. Chaipimi Jesusca, Diospaj Shimita villajurca.

3Chaimanmi na cuyuri ushajuj runagutaca, shuj runacuna apashpa shamunajurca. Paitaca, chuscupura tucushpami huandushpa apamurca.

4Paicunaca, gentecuna ninanda jundashca cajpimi, Jesuspaj ñaupajman apaitaca na usharca. Shinamandami, Jesús yachachijuj huasi jahuata pascashpa, na cuyuri ushajuj runataca, pai sirijushcapillata uriajuchirca.

5Tucui shunguhuan paicuna crishcata ricushpami, Jesusca, na cuyurij ushajuj runagutaca:

“Ñuca huahualla, cambaj juchacunataca ñami perdonashca” nirca.

6Chaipimi, mandashca Shimita yachachijpuramanda huaquingunapash tiyanajurca. Paicunaca, shungupillami cashna yarinajurca:

7“¿Imashpata caica shina nijun? Diostami na ali shimicunata rimajun. ¿Juchacunataca, pita perdonai ushanyari? Taita Diosllamari perdonai ushan” yanajurcami.

8Paicunapaj shungu ucupi chashna yarinajujta, Jesús yachashpami cashna nirca:

“¿Imashpata cangunapaj shungupica, chashnatara yarinajunguichi?

9Cai runagutaca: Cambaj juchacunataca ñami perdonashca ¿ninachu ali canga? Na cashpaca, Jatari, can sirijushcata apashpa rilla ¿ninachu ashtahuan ali canga?” nircami.

10Runa Aichayuj tucushca Ñucataca, juchacunata perdonai ushachunmi cai pachaman cachamurca, (na cuyuri ushajuj runataca):

11“Candami cashna nini: Jatari, can sirijushcata apashpa, huasiman rilla ninimi” nircami.

12Shina nijpimi chai runaca ñapash jatarishpa, pai sirijushcata apashpa, tucuicuna ricujta llujshishpa rirca. Shinamandami, tucuicuna ninanda manllarishpa, Taita Diostaca ninanda alicachishpa:

“Chashnataca, napacha ricushcachu canchi” ninajurca.

Leví shuti runata cayashcamanda(Mat. 9:9-13; Luc. 5:27-32)

13Chai jipami, Jesusca Galilea cuchaman cutin tigrarca. Tucui gentecuna Paipajman shamujpimi, paicunaman yachachijurca.

14Jesusca, chaimanda rijushpami, Alfeo runapaj churi Levitaca, gentecunapaj impuestota japishpa tiyarinapi tiyajujta ricurca. Paitami Jesusca:

“Ñucata catihuai” nirca.

Shina nijpica jatarishpa catircallami.

15Levipaj huasipi, micungapa Jesus tiyajujpimi cashna tucurca: Chaipica, impuestota japij ashtaca runacunapash, juchayu gentecunapash, Paipaj yachajujcunapashmi Jesushuan micungapa tiyanajurca. Paitaca, ashtacacunami chaiman catishpa rishca carca.

16Impuestota japijcunahuan, juchayu gentecunahuan micushpa tiyajujta ricushpami, mandashca Shimita yachachijcunapash, fariseocunapash, Jesuspaj yachajujcunataca, cashna ninajurca:

“¿Imashpata Paica, impuestota japijcunahuan, juchayu runacunahuan micushpa, ufiashpa tiyajun?” ninajurcami.

17Chashna ninajujta Jesús uyashpami, paicunataca cashna nirca:

“Nanaita na charijcunaca, jambij runataca na mascanllu, nanaita charijcunallami paitaca mascan. Alitalla rurajcunata cayangapaca na shamurcanichu, ashtahuangarin juchayu gentecunata cayangapami shamurcani” nircami.

Ayunomandami tapushca(Mat. 9:14-17; Luc. 5:33-39)

18Bautizaj Juanbaj yachajujcunapash, fariseocunapaj yachajujcunapashmi, na micushpa Diosta mañanajuj carca. Chaimandami, shujcuna Jesuspajman shamushpa cashna tapunajurca:

“Juanbaj yachajujcunapash, fariseocunapaj yachajujcunapashmi, na micushpa Diosta mañanajuj carca. Cambaj yachajujcunaca, ¿imashpata na chashna pactachin?” ninajurca.

19Shina nijpimi Jesusca, paicunataca cashna nirca:

“¿Boda huasipi, cazarajuj noviohuan tiyanajushpaca, na micushpa chishaita ushanllu? Novio paicunahuan tiyajujpica, paicunaca na micushpa chishaitaca na ushanllu.

20Cusata apana punllacunaca chayamungami. Chai punllacunami na micushpa Diosta mañanajunga.

21Mauca churajuna liquirishcataca, mushuj finduhuanga pipash na siranllu. Shina sirajpica, mauca churajunataca, mushuj finduca yaicurishpami ashtahuan liquinga.

22Shinallata, chairalla rurashca vinotaca, mauca cara muchilapica, pipash na churanllu. Chashna churajpica, chaira rurashca vinoca muchilata liquishpa jicharishpami, muchilandi, vinondi tucuringa. Chaimandami chaira rurashca vinotaca, mushuj cara muchilapi churana” nijurcami.

Jesuspaj yachajujcunaca, samana punllapimi trigo umata fitinajushca(Mat. 12:1-8; Luc. 6:1-5)

23Samana punllapimi Jesusca, Paipaj yachajujcunandi tarpushca pambacunata yalinajurca. Chaipimi, Paipaj yachajujcunaca, trigo umata fitishpandi rinajurca.

24Shinamandami fariseocunaca:

“Ricui, ¿imashpata samana punllapi na ruranalla cashcata ruranajun?” ninajurca.

25Shina nijpimi Jesusca, paicunataca cashna nijurca:

“Davidca, paihuan purijcunandi micunata na tarishpa, ninanda yarjachishpa purinajushpa, ¿imata rurashcataca cunangamanllu nara quilca catishcanguichi?

26Sacerdotecunata mandaj Abiatar mandajui punllacunami, Davidca Taita Diospaj huasiman yaicushpa, Diosman carashca tandacunata micurca. Shinallata, paihuan purijcunamambashmi cararca. Chai tandacunataca, mandashca shimipi nijushcashna, na micunalla cashcamandami, sacerdotecunalla micui ushana carca” nijurcami.

27Cashnatapashmi Jesusca nijurca:

“Samana punllataca, gentecunapaj ali cachunmi Diosca churarca. Na gentecunapaj, ali cachunga na samana punllata churarcachu.

28Runa Aichayuj tucushca Ñucami, samana punlla cajpipash mandai ushani” nijurcami.