1 CORINTIOS 7 - Quichua Imbabura 2016

Cazarashcacuna imashna causanatami villajun

1Canguna ñucata tapushpa quilcashcatami, cunanga tigrachimuni. Jarica, na cazarashpa causashpachari ali canman.

2Ashtahuangarin, huainayana munaicuna tiyashcamandami, jarica huarmihuan cazarana, huarmipash jarihuan cazarana canguichi.

3Cusaca, cazarashca cashcamandami, paipaj huarmihuan tucuipi pactachishpa causana. Shinallata huarmipash, paipaj cusahuanmi tucuipi pactachishpa causana.

4Huarmica, paipaj cuerpotaca na mandai ushanllu, ashtahuangarin, cusami mandai ushan. Shinallata, cusapash, paipaj cuerpotaca na mandai ushanllu, ashtahuangarin, huarmimi mandai ushan.

5Ishcandimandallata, na mitsarinachu canguichi. Ashtahuangarin, Diosta mañangapallami, ishcandimanda shujlla yuyaita japishpa, ashagucamanlla shican cana canguichi. Na unaita jarcari ushashpaca, Satanás, ama na ali yuyaita cuchunmi, ucha cutin pacta cana canguichi.

6“Chashna causanguichi nishpaca” na mandajunichu. Ashtahuangarin, “shina causashpami ali canga nitallami” nijuni.

7Tucui jaricuna, ñucashnalla causachunmi munaiman. Ashtahuangarin, Taita Diosmi, tucuicunaman imashna causanatapash ushaita carashca.

8Nara cazarashcacunapash, sapalla huarmicunapash, ñucashnalla causachunmi munaiman.

9Ashtahuangarin, na jarcari ushashpaca, cazarachunlla. Cusahuan, huarmihuan pacta cana munaihuanlla puringapa randica, cazaranami ashtahuan ali.

10Shina cajpipash cazarashcacunataca, Apunchi Jesusmi cashna mandajun, na ñuca mandanichu: Huarmica, cusataca na jichunachu.

11Imamandapash jichushpaca, na shujhuan cazaranachu. Na cashpaca, cusahuanllatami ali tucuna. Shinallata cusapash, huarmitaca na jichunachu.

12Shinallata, caitapashmi nini. Apunchi Jesús na mandashcatami, ñucalla nijuni: Maijan crij huauquipaj huarmi na crij cashpa “ali causashunllami” nijpica na jichunachu ninimi.

13Shinallata, Maijan crij panipaj cusa na crij cashpa “ali causashunllami” nijpica na jichunachu ninimi.

14Na crij cusaca, paipaj huarmi crij cajpimi, Dios chasquinalla tucushca. Shinallata, na crij huarmipash, paipaj cusa crij cajpimi, Dios chasquinalla tucushca. Na shina cajpica, cangunapaj huahuacunapash, na crijcunapaj huahuacunashna na alicunami canman. Ashtahuangarin cunanga, cangunapaj huahuacunaca Diospajllami.

15Maijan na crij cashpa “jichusha nijpica” saquinguilla. Shina jichujpica, crij huauqui cashpa, crij pani cashpapash, na ashtahuan gañanshna causangachu. Taita Diosca, cushijushpa causachunmi ñucanchitaca cayashca.

16Maijan huarmipash, ¿cambaj cusataca quishpichi ushashallami yanguichu? Shinallata cusapash, ¿cambaj huarmitaca quishpichi ushashallami yanguichu?

17Ashtahuangarin Apunchi Jesusmi imashna ali causanatapash, tucuicunaman carashca. Shinamandami, Taita Dios cangunata cayashca punllapi imashna cashcashna tucuicuna causana canguichi. Shina causachunmi, tandanajuj tucui crijcunataca mandani.

18Dios cayashca punllapi, circuncisionda rurashca cashpaca, chashnallata saquirichilla. Dios cayashca punllapi circuncisionda na rurashca cashpapash, chashnallata saquirichilla ninimi.

19Circuncisionda rurashca cashpa, circuncisionda na rurashca cashpapash, imapash na canllu. Ashtahuangarin, Taita Dios mandashcacunata pactachinami ali.

20Dios cayashca punllapi imashna causajushca cashpapash, chashnallata tucuicuna catichilla.

21Dios cayashca punllapi, gañan cashca cashpaca na llaquirinachu cangui. Shina cajpipash, chaimanda llujshi ushanalla cashpaca, llujshinatami mascana cangui.

22Apunchi Jesusta crichun, Dios cayashca punllapi gañan causanajushca cashpaca, Apunchi Jesuspajta rurangapa cacharishcami cangui. Shinallata, Dios cayashca punllapi na gañan cashca cashpapash, cunanga Cristopaj gañanmi cangui.

23Diosca, cangunataca ashtaca culquipami randishca. Shina cashpami, gentecunapaca na gañan tucuna canguichi.

24Juyashca crijcuna, Dios cayashca punllapi imashna cashca cashpapash, chashnallata Taita Diospajlla causaichilla.

25Nara cazarashca cuitsacunata, huambracunata yachachijuchunga, Apunchi Jesusca na mandahuarcachu. Ashtahuangarin pactachij Apunchi Jesuspaj juyaimandami, cai shimicunataca ñucapi ali cana cajpi cashna nijuni:

26Ninan llaqui punllacunapi causanajushcamandami, imashna causajushpapash, “chashnallata causanami ali canman” yajuni.

27¿Huarmihuan cazarashcachu cangui? Shina cashpaca, jichunata napacha yarinachu cangui. ¿Nara cazarashcachu cangui? Shina cashpaca, cazaranataca na yarinachu cangui.

28Cazarashpaca, juchataca na ruranguichu. Shinallata, cuitsapash cazarashpaca, juchataca na ruranllu. Ashtahuangarin cazarajcunaca, cai causaipi llaquicunatami apanajunga. Chai llaquicunata ama apachunmi munani.

29Juyashca crijcuna, caitallami ningapa munani: Punllacunaca ñami tucurimujun. Shinamandami cazarashca cashpapash, na cazarashcashna Diospajta rurashpa causana canguichi ninimi.

30Shinallata, huacajcunapash, na huacanshnalla purichun. Cushijushpa causajcunapash, na cushijujshnalla purichun. Imata randijcunapash, na charijshnalla causachun.

31Shinallata, cai pachapi imata charishpa cushijushpa causajushpapash, na cushijushcashnallami causana canguichi. Cai pachapi imalla tiyajcunapash tucuringallami.

32Canguna llaquilla causachunga na munanichu. Na cazarashca jaricunaca, Apunchi Jesusta yariajlla cashpami, Apunchi Jesustalla cushichingapa munan.

33Ashtahuangarin, cazarashca jaricunaca, huarmita cushichingapa munashpami, cai pachapi imatapash ruranata yarishpa causana.

34Shinallata, cusayuj huarmipash, jarihuan nara ima tucushca cuitsapash shuj shuj yuyaitami charin. Jarihuan nara ima tucushca cuitsaca, cuerpondi, almandi Diospajlla cangapami, Diospajta rurashpa causana. Ashtahuangarin, cusayuj huarmica, cusata cushichingapami, cai pachapi imatapash ruranata yarishpa causana.

35Caitaca, cangunata llaquichingapaca na nijunichu, ashtahuangarin cangunapaj ali cachunmi cashna nini. Shinallata, imapash na jarcajpi, Apunchi Jesuspajta aliguta rurashpa causachunmi, cashna nini.

36Ashtahuangarin maijan cashpapash, paipaj ushi cazarana huatacuna pactashca cajpica, pai imashna yajushcashnallata cazarachinallami. Shina cashcamanda, cazaranallami chaica na juchachu.

37Ashtahuangarin, jarihuan nara ima tucushca paipaj ushi na cazarashpa ali cana cajpica, pai munashcashnallata na cazarachishpami alita ruran.

38Shina cashpami, maijambash paipaj ushita cazarachishpapash, alita ruran. Na cazarachishpacarin, ashtahuan alitami ruran.

39Cusayuj huarmica, cusa causajujpimi, cusahuan huatashcashna causajun. Cusa huañujpica, pihuan cazarangapa munashpapash cazaranallami. Ashtahuangarin, Apunchi Jesusta crijcunapura cazarachun ninimi.

40Ashtahuangarin maijan huarmi cashpapash na cutin cazarashpaca, cushijushpami causanman yanimi. Ñucapash, Taita Diospaj Espiritutaca charinimi yashpami cashna nijuni.