Psalms 40 - Quichua Imbabura 2016

Llaquimanda cacharichijpi Diosta alicachishcamanda(Sal. 70:1-5)Candajcunata mandaj candachijuchun, David rurashca Salmomi.

1Mandaj Diostallami shuyashpa causajurcani.

Paimi, ñuca caparishpa mañajujtaca uyashpa yanapahuarca.

2Ñucataca, yacuta llujchingapa allashca utujupi, turumandashnami llujchihuarca.

Chaimanda llujchishpami, jatun rumi jahuapi shinlli shayachihuarca.

3Chai jipaca, ñucanchi Taita Diosman, mushuj candanata candachunmi yachachihuarca.

Chaita ricushpami, ashtacacuna manllarishpa,

Mandaj Diostalla yarishpa causanajunga.

4Mandaj Diostalla shuyashpa causaj runaca, ninandami cushijun.

Jariyashpa jatun tucushcacunatapash, rurashcalla diosta catishpa pandarijcunatapash, na catinllu.

5Ñucata Mandaj Taita Dioslla,

ashtahuanmi ñucanchiman jatun alicunata rurashcangui.

Ñucanchita juyashpami chashna rurashcangui.

Chaicunataca, na yupai ushanallatami rurashcangui.

Chaicunamanda, ñuca villai callarishpaca, na tucuchi ushaimanllu.

Chaicunataca, na yupai ushanallami.

6Animalcunata, Canman carashpa huañuchishcapash,

ofrendacunata cushcapash, Candaca na cushichinllu.

Ñuca uyachunmi, ñuca rinrita pascahuashcangui.

Animalta cushpa tucuillata rupachijuchumbash,

juchamanda cuchumbash na mañashcanguichu.

7Chaimandami cashna nircani:

“Caipimi capani.

Can quilcachishpa pillushca libropimi, ñucamandaca villajun.

8Ñuca Taita Dioslla,

Cambaj munaita rurashpami cushijushcani.

Can mandashcatapash, ñuca shungupimi charijuni” nijurcanimi.

9Alitalla ruranataca, jatun tandanajuipimi villajurcani.

Ñuca shimihuanga na upalla carcanichu.

Chaitaca, Mandaj Dios, Canllata yachapanguimi.

10Alitalla Can rurashcataca, na ñuca shungu ucupilla charircanichu.

Can tucuita pactachij cajta, quishpichij cajtaca villajurcanimi.

Can llaquij cajta, na llullaj cajtaca, na pacashpami, jatun tandanajuipi villajurcani.

11Mandaj Dioslla,

ñucata juyanataca ama saquihuaichu.

Cambaj ninan juyaipash, Cambaj Shimipash ñucahuan causajushca cachun.

12Ñucataca, ashtaca llaquicunami japihuashca.

Jatun na alicunata rurashcamandami llaquicunaca japihuashca.

Chaimandami, vichai ricuitapash na ushajuni.

Llaquicunaca, ñuca uma ajchacunatapash yalimi mirashca.

Ñucaca ña huañugrijunimari.

13Mandaj Dioslla,

quishpichingapa shamupayari.

Mandaj Dioslla,

ñucata yanapangapaca ucha shamupayari.

14Ñuca causaita tucuchingapa mascajcunaca,

tucuicunallata pingai tucushpa, pandachi tucushca cachun.

Llaquita ñuca apachun munajcunaca, huashaman tigrashpa pingai tucuchun.

15Ñucata, na alicachishpa asijcunaca, tucuchi tucushca cachun.

¡Ja jai! nishpa ñucata asijcunaca, tucuchi tucushca cachun.

16Canda mascajcunaca, tucuicuna ninanda cushijuchun.

Can quishpichijpi juyai causajcunaca, tucui causaipi:

“Taita Diosca jatumbachami” ninajuchun.

17Ñucaca llaquilla cajpipash, imagupash illaj cajpipash,

Mandaj Diosmi yarihuanga.

Canmi, ñucata yanapaj, llaquimanda cacharichij capangui.

Ñuca Taita Dioslla,

uchalla yanapaj shamupailla.