1Job runaca cashnami nirca:
2“Chashna rimashcacunataca, ashtacatami uyashcani.
Tucui cangunaca, cushichingapa randica, fiñachijcunami canguichi.
3Chai yanga shimicunaca, ¿nachu tucurina canga?
¿Imashpata rimashpa catijunguilla?
4Ñucapash, cangunashnallata rimaimanllami.
Canguna, ñucashnallata llaquihuan cajpica,
Ñucapash cangunata fiñashpa maitapash rimaimanllami.
Umatapash cuyuchishpami na alicachishpa ricujuiman.
5Chaipaj randica, aliguta rimashpami cushichiman.
Ñuca rimashca shimihuan cushichishpami, cangunataca samachiman.
6Ñuca rimajujpipash, ñuca nanaica na tucurinllu.
Upalla cajpipash, ñuca nanaica na anchurinllu.
7Shina cajpipash cunanga, Diospash ashtahuanmi llaquichijuhuan.
Tucuilla ñuca huasi ucupuratapashmi tucuchishca.
8Shinallata, ñuca cuerpotapash Canmi rucuyachishcangui.
Chaitaca, ñuca cuerpo jamzi tucushcami ricuchijun.
Ñuca ñavi llaquilla cajta ricushpami juchachishpa rimanajuhuan.
9Dios ninanda fiñarishpami, catiriyashpa llaquichihuarca.
Quirutapash canirishpami fiñahuarca.
Ñucata fiñaj runaca, imahuambash tujsijshnami ricujuhuarca.
10Ñucata fiñashpami rimanajurca.
Ñucata pingaichingapami, ñavipi huajtanajurca.
Ñucata fiñashpami, tucuicuna tandanajurca.
11Taita Diosca, ñucataca na ali runacunamanmi cushca.
Paita na manllajcunapaj maquipimi saquihuashca.
12Ñucaca, tucuipimi ali causajurcani.
Ashtahuangarin ñutushpami saquihuarca.
Ñucataca, cunga tullumanda japishpami caita chaita chafsihuarca.
Llaquichingapami agllashpa churahuarca.
13Flechacunata shitaj paipaj runacunami chaupipi churahuarca.
Ñucataca na llaquishpami vijsapi chugrichihuarca.
Ñuca jayajpash alpapimi talirirca.
14Ñucataca, cati catimi llaquichihuarca.
Macanajuj runashna calpamushpami llaquichihuarca.
15Cañamuhuanmi ñucaca quilparircani.
Ñuca umataca, ñutu alpapimi pambarcani.
16Ninanda huacajpimi, ñuca ñavipash punguirca.
Ñuca ñavipash ña huañunallami ricujuni.
17Ñuca maquihuanga, ima na alitapash na rurashcanichu.
Ali shunguhuanmi, Diosta mañashpa causarcani.
18¡Alpa mamalla, ñuca yahuartaca ama quilpapaichu!
Chashna rurajpica, caparishcapash na uyaringachu.
19Ashtahuangarin, ñucamanda alita villajca jahua pachapimari.
Ñuca imatalla ali rurashcata villajca jahuapimari.
20Ñuca cumbacunaca, ñucata na alicachishpa rimarijcunallami.
Ashtahuangarin Taita Diospaj ñaupajpimi, viquita jichasha.
21¡Runaca, Taita Dioshuan rimari ushashpachari ali canman.
Paipaj cumbahuanshna rimari ushashpachari ali canman!
22Ashtahuangarin, huañuna huatacunami chayamunga.
Ñucaca, cutinga na tigramuna ñanda japishpami risha.
Who We AreWhat We EelieveWhat We Do
2025 by iamachristian.org,Inc All rights reserved.
