JONÁS 2 - Quichua Imbabura 2016

Jonás runa, Diosta mañashcamanda

1Jonasca, chai pijipaj vijsa ucumandami, paita Mandaj Taita Diosta mañashpa,

2cashna nijurca:

“Ñucaca, ninan llaquihuan cashpami, Mandaj Diostaca mañarcani.

Paica uyahuarcami.

Seol ucupi cashpami, caparishpa mañarcani.

Ñuca mañashcataca uyahuarcanguimi.

3Ñucataca, mama cucha chaupimanmi shitahuarcangui.

Ninanda rijuj yacumi, muyundi quilpahuarca.

Cambaj tucuilla yacucunapash, caiman chaiman jatarishpami, ñuca jahuata yalijurca.

4Shinamandami cashna nijurcani:

‘Cambaj ñaupajmandaca, shitai tucushcami cani.

Shina cashpapash, cambajlla huasitaca ricusharami’ nijurcanimi.

5Yacumi tucuilla langahuarca.

Manllanayai ucu ucu yacucunami, muyundi quilpahuarca.

Yacu ucupi jihua angucunami, ñuca umapi pillurirca.

6Urcu callari ucucamanmi huashajurcani.

Alpaca, tucui causaicaman chaipi cachunmi, vichashpa saquihuarca.

Shina cajpipash, ñucata Mandaj Taita Dioslla,

Canmi ñuca causaitaca pambashcamanda llujchihuarcangui.

7Ñuca causaica ña tucurijujpimi, Can Mandaj Diostaca yarircani.

Ñuca mañashcataca, cambajlla huasimandami uyahuarcangui.

8Rurashcalla dioscunata catijcunaca,

Cambaj ninan juyaitami cungashpa saquinajun.

9Ashtahuangarin ñucaca,

Canda alicachishpami, animalcunata cushpa huañuchisha.

Imata ari nishcatapash pactachipashami.

Mandaj Dioslla,

Canllami quishpichi ushangui” nijurcami.

10Mandaj Diosllata cutin mandajpimi, Jonasta langashca chai jatun pijica, chaquishca alpaman shitamurca.