JOSUÉ 22 - Quichua Imbabura 2016

Jordán yacu manñapimi altarta rurashca

1Josueca, Rubenbaj, Gadpaj ayllucunatapash, Manasespaj chaupi ayllutapash cayashpami,

2cashna nijurca: “Cangunaca, Mandaj Diospajta ruraj Moisés mandashcatapash, ñuca mandashcatapash tucuita cazushpami aliguta pactachishcanguichi.

3Cangunapaj huauquicunataca, cai tucui huatacunata na saquishpami, cunan punllacaman caipi canguichi. Ashtahuangarin cangunata Mandaj Taita Dios mandashcacunata pactachingapami, aliguta yarishpa causanajunguichi.

4Mandaj Diosca, pai nishcata pactachishpami, cangunapaj huauquicuna samashpa cushilla causachun carashca. Cunanga, Mandaj Diospajta ruraj Moisés, Jordán yacu chimbapi, cangunaman carashca alpacunapi causangapa tigraichilla.

5Cangunaca, Mandaj Diospajta ruraj Moisés mandashca shimicunataca, tucuitapachami pactachishpa causana canguichi. Moisesca: ‘Cangunata Mandaj Diostaca ninandapacha juyashpami Pai mandashcata pactachishpa causana canguichi. Pai mandashca shimicunataca, aliguta cazushpami pactachishpa causana canguichi. Shinallata tucui shunguhuan, tucui almahuanmi Paipajta rurashpa causana canguichi’ nircami” nijurcami.

6Chai jipami, Josueca paicunata bendiciashpa “cayacaman” nishpa cachajpi, paicunapaj carpacunaman tigranajurca.

7Moisesca, Manasespaj chaupi ayllucunamanmi, Basán shuti llactapi alpacunata, cushca carca. Ashtahuangarin caishuj chaupi ayllucunamanga Josuemi, Jordán yacumanda indi huashajunman paicunapaj huauquicunapaj chaupipillata alpacunataca curca. Paicunatapash bendiciashpami Josueca, carpacunaman cacharca.

8Paicunataca, cashnami nijurca: “Cunanga, cangunapaj carpacunaman, cai tucui charishcacunandi tigraichilla. Ashtaca animalcunata, curita, culquita, bronceta, ashtaca churajunacunata apashpa richilla. Cangunata fiñajcunata quichushcataca, cangunapaj huauquicunahuan chaupiringuichilla” nijurcami.

9Shinami Rubenbaj, Gadpaj ayllucunapash, Manasespaj chaupi ayllupash, Israelcunapajmanda anchurishpa Canaán llactapi tiyajuj Silo shuti pueblomandaca Galaad shuti paicunapaj llactaman tigranajurca. Chai llactatami, Mandaj Dios mandashcashna paicunapaj cachun Moisesca cushca carca.

10Rubenbaj, Gadpaj ayllucunapash, Manasespaj chaupi ayllupash, Canaán llactata yalijuj Jordán yacuman chayashpami, chai yacu patapi, tucuicuna ricunalla cachun, shuj jatun altarta ruranajurca.

11Chaitami Israelcunaca: “Rubenbaj, Gadpaj ayllucunapash, Manasespaj chaupi ayllupash, Canaán llacta chimbapuraman, Jordán yacu manñapi shuj altarta rurashca” nijta uyarca.

12Chaita uyashpami Israelcunaca, macanajungapa ringapa, Silo shuti pueblopi tandanajurca.

13Chaimandami Israelcunaca, Eleazar sacerdotepaj churi Finees shuti runataca, Galaad llactapi causajuj Rubenbajman, Gadpaj ayllucunapajman, Manasespaj chaupi ayllupajman cacharca.

14Finees shuti runahuanga, Israel tucui ayllucunamanda shuj shuj agllashpami chunga mandajcunata cacharca. Paicunaca, huaranga huaranga Israelcunapaj taitacunapaj huasi ucupuracunata mandajcunami carca.

15Paicunami, Rubenbaj, Gadpaj ayllucunapajman, Manasespaj chaupi ayllupajman, Galaad llactaman rishpa cashna ninajurca:

16“Mandaj Diospaj tandanajushca Israelcunaca, cashnami ninajun: ‘¿Ima nishpata Israelcunata Mandaj Diostaca na cazushpa fiñachinguichi? ¿Cunanga, Mandaj Diosta catinata saquingapachu, Mandaj Diosta na cazushpa, shuj altartara rurarcanguichi?

17Peor shuti diosta mañashpa na alita rurashpa mapayashcamandaca cunangamanmi mapayashca causanajunchi. Chaimandami Mandaj Diospaj tandanajushca Israelcunaca, ninan llaquicunata aparcanchi.

18Chaicunata cungashpachu, cunanga ¿Mandaj Diosta na cazushpa causanajunguichi? Canguna Mandaj Diosta fiñachishcamandami, caya punllacunapica, tucuilla tandanajushca Israelcunata fiñashpa llaquichinga.

19Canguna causanajushca llactaca ninan mapami yashpaca, Mandaj Dios ñucanchiman carashca llactapi alpacunata japij shamuichi, chaipimi Mandaj Diospaj jatun carpapash shayajun. Ashtahuangarin, ñucanchita Mandaj Diospaj altarpash tiyashca jahua, shuj altarta rurashpami, Mandaj Diostapash, ñucanchitapash fiñachishcanguichi.

20¿Nachu Dios tucuchingapa shicanyachishcata, Zera shuti runapaj churi Acán runa pacalla apashcamanda ninanda fiñarishpa, tucuilla Israelcunata llaquichirca? Chai runaca, pai na alita rurashcamandaca, na pailla llaquita aparcachu’ ninajunmi” ninajurcami.

21Shina nijpimi Rubenbaj, Gadpaj ayllucunapash, Manasespaj chaupi ayllucunapash, huaranga huaranga Israelcunata mandajcunataca, cashna ninajurca:

22“Mandaj Diosca, dioscunapaj Diosmi. Paica, tucuitami yachan. Mandaj Dios, dioscunapaj Diosmi, Israelcunamanga tucuita villanga. Ñucanchi, Mandaj Diosta na cazushpa fiñachishca cashpaca cunandallata caipi huañupashunllami.

23Ñucanchica, Mandaj Diosta na cazushpa, animalta cushpa huañuchingapa, animalta cushpa tucuillata rupachingapa, na cashpaca ofrendata cungapa, Dioshuan ali cangapa ofrendata cungapaca shuj altarta rurashca cajpica, Mandaj Diosllata ñucanchitaca cunanda llaquichishca cachun.

24Ashtahuangarin, jipa punllacunapi cangunapaj huahuacuna ñucanchi huahuacunata: ‘Cangunaca, Israelcunata Mandaj Taita Dioshuanga, ¿imata ricunatata charinguichi?’ nishpa tapunata manllashpami chaita rurarcanchi.

25Shinallata, Mandaj Diosca, Jordán yacutami cangunahuan ñucanchihuan mujun cachun churarca. Rubenbaj, Gadpaj miraicunaca Mandaj Dioshuanga imata ricunatapash na charinchu ninajunga yashpami chashna rurarcanchi. Chashna cajpimi cangunapaj huahuacunaca, ñucanchi huahuacunataca Mandaj Diosta manllanata cungachinga.

26Chaimandami cashna ninajurcanchi: Cunanga, shuj altarta rurashunchi, chaipica animalta cushpa rupachingapapash, animalta cushpa huañuchingapapash na cangachu.

27Ashtahuangarin ñucanchipajpash, cangunapajpash, ñucanchipaj jipa miraicunapajpash, shuj ricuchina cachunmi rurarcanchi. Chai altarca, Mandaj Diospaj ñaupajpi animalcunata cushpa tucuillata rupachishpa, animalcunata cushpa huañuchishpa, Dioshuan ali cangapa ofrendata ñucanchipash cui ushanalla cashcatami ricuchijun. Jipa punllacunapi, cangunapaj huahuacunapash, ñucanchi huahuacunata: ‘Cangunaca, Mandaj Diosmandaca imata japinatapash na charinguichica’ nishpa ama rimanajuchunmi, chashna rurarcanchi.

28Chaimandami, cashna nircanchi: ‘Ñucanchita cashpa, ñucanchipaj huahuacunata cashpa, shamui punllacunapi chashna na alicachijpica, cashnami nishun: Ricuichi, ñucanchi taitacunaca Mandaj Diospaj altartashnallami rurashca. Chai altartaca, Diosman animalta cushpa tucuillata rupachingapa, na cashpaca animalta cushpa chaipi huañuchingapaca, na rurashcachu. Ashtahuangarin ñucanchipash, cangunapura cashcata ricuchingapami, chai altartaca rurashca’ ninajushunmi.

29Mandaj Diosta na cazunapash, na cashpaca Mandaj Diosta catijushcata saquinapash, ima punllapash ama chashna tucuchun. Animalta cushpa tucuillata rupachingapa, ofrendata cungapa, animalta cushpa rupachingapaca, Mandaj Taita Diospaj altarta, carpa ñaupajpi rurashca jahuaca, napacha shuj altartaca rurashunllu” ninajurcami.

30Rubenbaj, Gadpaj, Manasespaj miraicuna villashca shimicunaca, Finees shuti sacerdotepaj uyaipipash, tandanajushca Israelcunata mandajcunapaj uyaipipash, huaranga huaranga Israelcunata mandajcunapaj uyaipipash, tucuimi ali uyarirca.

31Chaimandami, Eleazar shuti sacerdotepaj churi Finees shuti runaca, Rubenbaj, Gadpaj, Manasespaj miraicunataca cashna nirca:

“Mandaj Dios ñucanchihuan cajpimi, cangunaca Mandaj Diosta na fiñachina yuyaita charishcata yachanchi. Cunanga, Mandaj Diospaj maquimandami, Israelcunataca quishpichishcanguichi” nircami.

32Eleazar shuti sacerdotepaj churi Finees shuti runapash, caishuj mandajcunapash, Rubenbaj, Gadpaj miraicunata saquishpami, Galaad llactamandaca Canaán llactaman Israelcunapajman tigramunajurca. Paicuna tigramushpami, tucuita villanajurca.

33Paicuna villashcacunaca, Israelcunapipash alimi uyarirca. Chaimandami Israelcunaca, Taita Diosta alicachinajurca. Chai punllamandami Rubenbaj, Gadpaj miraicuna causanajushca llactata macanajushpa tucuchingapa vichai rinataca, cutinga na parlanajurca.

34Rubenbaj, Gadpaj miraicuna rurashca altartaca: “Caimi ñucanchipurapica, Mandaj Diosca, Taita Dios cajta ricuchijun” nishpami, “Ed” shutita shutichinajurca.