1Profetacunami, Eliseotaca cashna ninajurca:
“Ñucanchi causanajushca, cai huasica uchillagumari.
2Chaimanda cunanga, Jordán yacu manñaman rishpa, chaipi caspicunahuan huasichishpa causagrishunchi” nijpimi, Eliseoca:
“Shina cashpaca richilla” nirca.
3Shina nijpimi shuj runaca, cashna nirca:
“Cambajta ruraj ñucanchihuan ripashun nipanchimi” nijpimi, Eliseoca:
“Ñucapash rishallami” nirca.
4Eliseopash paicunahuan rishpami, Jordán yacuman ña chayashpaca, quirucunata cuchurca.
5Quiruta shuj runa hachahuan ña urmachigrijujpimi, hachaca yacuman huashajugrirca. Shina huashajujpimi:
“¡Aij, ñucata mandajlla, chai hachaca mañashcallamari carca!” nishpa caparirca.
6Shina caparijpimi, Taita Diospaj runaguca:
“¿Maipita urmarca?” nishpa tapujpi, chai runaca, maipi huashajushcata ricuchirca.
Shina ricuchijpimi Eliseoca, shuj caspita fitishpa hacha urmashcaman shitajpi, chai hacha jirruca, yacu jahuaman huambumurca.
7Chashna huambumujpimi:
“Hachata japi” nishpa mandajpi, chai runaca hachata japirca.
Eliseomandapash, Siria llactamanda gentecunamandapash8Siria llactata jatun mandajca, Israelcunahuan macanajuita charishpami, paipajta ruraj macanajuj runacunahuan parlarishpa: “Ñuca carpacunaca, cai pushtupi, chai pushtupimi shayaringa” nijurca.
9Shinamandami Taita Diospaj runaguca, Israel llactata jatun mandajman cashna nichun cacharca: “Ricungui. Chai pushtutaca, ama yalinguichu. Siria llactamanda runacunami chaiman rigrinajun” nichunmi cacharca.
10Shina nijpimi Israel llactata jatun mandajca, Taita Diospaj runagu villashca pushtuta chapachun cacharca. Paicunata ama llaquichij shamuchunga chashnami, cutinbash, cutinbash cachajurcalla.
11Chaimandami Siria llactata jatun mandajca, paipaj shungupi musparijushpallata, paipajta rurajcunata cayashpa cashna nirca:
“Ñucanchipuramandaca, ¿pita Israel llactata jatun mandajman villashpa purin? Chaitaca, ¿nachu villanguichiman?” nircami.
12Shina nijpimi, paipajta rurajpuramanda shuj runaca, cashna nirca:
“Ñucata jatun mandajlla, na chashnachu. Ashtahuangarin, Israel llactapi causaj profeta Eliseomari, Israel llactata jatun mandajmanga villajun. Can puñuna pacalla ucupi imata parlajushcatapash tucuitami villajun” nircami.
13Shina nijpimi jatun mandajca, cashna nirca:
“Chai runata prezu japichun cachangapa, chai runa maipi causajtapash ricungapa richi” nircami.
Shina nijpimi paicunaca:
“Paica Dotán shuti pueblopimi causan” nishpa villanajurca.
14Shina villajpimi, chai jatun mandajca caballocunapi, carretacunapi purij macanajuj runacunata, shinallata chaquilla purij ashtaca macanajuj runacunata, chai puebloman cacharca. Paicunaca tuta shamushpami, chai pueblotaca chaupipi churanajurca.
15Chai tucui macanajuj runacunapash, caballocunapi, carretacunapi tiyarishca gentecunapash chai pueblota chaupipi churashpa muyundi shayanajundaca, Eliseopajta ruraj runami, tutamandata jatarishpa llujshishpa ricurca. Chaita ricushpami, chai runaca:
“¡Aij, ñucata mandajlla! Cunanga, ¿imatashi rurashun?” nirca.
16Shina nijpimi Eliseoca, cashna nirca:
“Ama manllaichu. Ñucanchimi, paicunatapash ashtahuan yali ashtaca canchi” nircami.
17Shina nishpami, Eliseoca: “Mandaj Dioslla, pai ricuchun paipaj ñavita pascapai” nishpa mañarca.
Chashna mañajpimi Mandaj Diosca, chai runapaj ñavita pascarca. Chashna pascajpimi Eliseopaj muyundipica, caballocunapi tiyarishca gentecuna, nina rupajuj carretacuna, chai loma junda shayanajujta ricurca.
18Siria llactamanda macanajuj runacuna ña uriajumui callarijpimi Eliseoca, Mandaj Diostaca: “Cai gentecuna ñausa tucushca cachun” nishpa mañarca. Shina mañajpimi, Eliseo mañashcashnallata paicunaca ñausa tucurca.
19Chai jipami Eliseoca, chai gentecunataca cashna nirca:
“Canguna mascajushca puebloman chayangapaca, na cai ñanda catinachu canguichi. Ñucata catihuaichilla, canguna mascajushca runapajpi saquigrishami” nirca.
Shina nijpimi, Samaria puebloman catishpa rinajurca.
20Ña chai puebloman chayashpami Eliseoca, cashna nirca: “Mandaj Dioslla, cai gentecuna ricuchun paicunapaj ñavita pascapai” nircami. Shina nijpimi Mandaj Diosca, paicunapaj ñavita pascarca. Shina pascajpi paicuna ricushpaca, Samaria pueblo chaupipi shayanajushcatami ricurca.
21Israel llactata jatun mandajca, paicunata ricushpami Eliseotaca:
“Ñuca taitalla, ¿paicunataca huañuchishallachu?” nirca.
22Shina nijpimi paica, cashna nirca:
“Na huañuchinachu cangui. ¿Cambaj espadahuan, cambaj arcohuan macanajushpa prezu japimushcacunataca huañuchinguimanllu? Ashtahuangarin paicunataca, micushpa, ufiashpa, paicunata mandajcunapajman tigrachun, micunata, yacuta caraichilla” nircami.
23Shina nijpimi, jatun micuita rurarca. Ña micushca, ufiashca jipaca, chai macanajuj runacunaca, paicunata mandajpajman tigrarcallami. Siria llactamanda macanajuj runacunataca, Israel llactamanga cutinga na cachamurcachu.
Eliseomandapash, Samaria pueblota chaupipi churashcamandapash24Chai jipami, Siria llactata jatun mandaj Ben-adad shuti runaca, tucuilla paipaj macanajuj runacunata tandachishpa vichai shamushpa, Samaria pueblota chaupipi churarca.
25Chashna chaupipi churashcamandami, Samaria pueblopica ninan yarjai tiyarca. Chaimandami shuj burru umataca, pusaj chunga culquipaj jatunajurca. Paloma huanutaca, chaupi libratallami, picha culquipaj jatunajurca.
26Chai punllacunallatami, Israel llactata jatun mandajca, jatun pirca jahuata yalijurca. Chaita yalijujpimi, shuj huarmica:
“Ñucata jatun mandajlla, quishpichihuayari” nishpa caparirca.
27Shina caparijpimi jatun mandajca, cashna nirca:
“Mandaj Diospash na quishpichijpica, ¿ñucacarin imashnata quishpichishayari? Granopash illajpi, vinopash illajpica, ¿imatata cushayari?” nircami.
28Jatun mandajca: “¿Imashcatayari?” nircami. Shina nijpimi chai huarmica, cashna nirca:
“Cai huarmimari, ñucataca cashna nihuarca: ‘Cambaj churita cunan huañuchishpa micungapa apamui. Ñuca churitaca, cayapa micushunllami’ nihuarcami.
29Shina nijpimi, ñuca churitaca yanushpa micurcanchi. Ña cutin cayandi punllapaca ñucami: ‘Cambaj churita apamui, micushun’ nircani. Ashtahuangarin paica, paipaj churitaca pacashcami charijun” nircami.
30Chai huarmi chashna nijta jatun mandaj uyashpami, pai churajushcata liquishpa, chai liqui churajunahuanllata pirca jahuata yalijurca. Chaita yalijujpimi gentecunaca, cañamuta ucuman churajushcata ricunajurca.
31Chai jipami, jatun mandajca cashna nirca: “Safat shuti runapaj churi Eliseopaj umata, cunanda na fitijpica, Taita Diosllata ninandapacha llaquichihuachun” nircami.
32Eliseoca, paipaj huasipimi tiyajurca. Mandaj rucucunapash, paihuanmi tiyanajurca. Jatun mandajca, chaimanmi shuj runata cacharca. Ashtahuangarin villangapa shamuj chai runa nara chayajpillatami Eliseoca, mandaj rucucunataca cashna nirca:
“Ñuca umata fitichun, chai huañuchij runapaj churi cachamujujtaca, ¿nachu yachanguichi? Ricuichi, villangapa shamuj runa chayamujpica, punguta vichashpa na yaicuchun saquinachu canguichi. ¿Nachu paita mandajpash, paipaj huashata catishpa shamujuj uyarin?” nircami.
33Eliseo paicunahuan chashna parlajujpillatami, Eliseopajman urai shamuj chai villaj runaca ñapash chayamurca. Pai chayamushpaca, cashnami nirca:
“Na llullashpami nini. Cai llaquicunaca, Mandaj Diosmandami shamun. Shina cashpaca, ¿imapata ashtahuanga Mandaj Diosta shuyashayari?” nircami.
Who We AreWhat We EelieveWhat We Do
2025 by iamachristian.org,Inc All rights reserved.
