ROMANOS 6 - Quichua Imbabura 2016

Juchata ama rurangapaca ñami huañushcashna canchi

1Shina cajpica, ¿imatata nina canchi? Dios ashtahuan juyachunga, ¿juchata rurashpachu catina canchi?

2Napacha shinachu. Juchata ama rurangapaca, ñamari huañushcashna canchi. Shina cashpaca ¿imashnata juchatalla rurashpa causashunchiyari?

3Bautizai tucushcacunaca, Cristo Jesús huañujpimi ñucanchipash bautizarircanchi. Chaitaca ¿nachu yachanguichi?

4Bautizarishpaca, Cristohuan huañushcashnami, Paihuanllata pambai tucurcanchi. Cristotaca, huañushcacunapaj chaupimandami, Paipaj Taitapaj ninan ushaihuan causachirca. Chashnallatami ñucanchipash, mushuj causaihuan causangapa pambai tucurcanchi.

5Imashnami Cristohuan huañushcashna cashpa Paihuan pambai tucurcanchi, chashnallatami Pai causarishcashnalla, ñucanchipash causarina canchi.

6Cashnatami yachanchi: Ñucanchipaj punda na ali causaica, Cristohuanmi cruzpi chacatai tucurca. Shina cashpami, juchataca na ashtahuan rurana canchi.

7Ashtahuangarin, Cristohuan huañushcashna cajpimi, juchaca ñana ashtahuan mandashpa charijun.

8Shinallata, Cristohuan huañushcashna cashpami, Paihuan causagrinatapash crinchi.

9Cristoca, huañushcacunapaj chaupimanda causarishca cashpami, cutinga na huañunga. Paitaca, huañuica cutinga na mandai ushangachu.

10Paica, tucuicunapaj juchamandami shuj cutinlla huañurca. Ashtahuangarin causarishpaca, Taita Diospajllami causajun.

11Chaimandami cangunapash, juchapaca huañushcashna cana canguichi. Shinallata, Apunchi Jesucristomanda, Taita Diospajllami causana canguichi.

12Shina cashpami, cangunapaj huañuna cuerpopi jucha mandachunga, napacha saquina canguichi. Na ali munaicuna yarichijujtapash, napacha cazunachu canguichi.

13Shinallata, cangunapaj cuerpopi imalla tiyajtapash na juchaman saquinachu canguichi. Ashtahuangarin, huañushcacunapaj chaupimanda causarishcashna cashpami, Taita Diospajlla cachun cuna canguichi. Cangunapaj cuerpopi ima tiyajtaca, alitalla rurachunmi, Taita Diosman cuna canguichi.

14Shina rurajpimi, juchaca na ashtahuan mandashpa charinga. Cangunataca, mandashca shimicunaca na mandajunllu, ashtahuangarin, Diospaj ninan juyaipimi causanajunguichi.

Ali cashcatalla ruranamanda

15Dios ninanda juyajujpimi, mandashca shimicunaca na ashtahuan mandai ushanga. Shina cashpaca, ¿juchata rurashpa catinarachu canchi? Napacha shinachu.

16Gañan tucushpaca, ¿nachu mandajta cazungapa gañan tucunguichi? Chaitaca, ¿nachu yachanguichi? Shinallatami, maijanda cazushpa causajushpapash, chaipaj gañan canguichi. Jucha mandajujtara gañajshna cazushpaca, huañushpa chingagrinami canguichi. Diosta cazujushpaca, alitallami ruranajunguichi.

17Ashtahuangarin, Taita Diostami pashi nini. Cangunaca, gañajshna juchatara cazushpa punda causashca cashpapash, Diosmanda yachachijujta tucui shunguhuan chasquishpami cazunajunguichi.

18Shinamandami, juchata ama rurashpa causachun Dios cacharichijpi, alitalla rurajcuna tucushcanguichi.

19Cangunaca na yuyaipi japi ushanalla cajpimi, ñucapash cangunashnalla tucushpa yachachijuni. Pundaca na alita rurangapami, cangunapaj cuerpopi ima tiyajtapash, mapatalla rurachun saquircanguichi. Chashnallatami cunanga, Diospajlla causangapa cangunapaj cuerpopi ima tiyajtapash, alitalla rurachun saquina canguichi.

20Cangunaca, juchapaj gañan cashpami, alitalla rurangapaca napacha munaj carcanguichi.

21¿Shina causashpaca, ima alitata japircanguichi? Cunanbica, chaita yarishpami pingai tucunguichi. Chai rurashcacunaca, huañuimanmi apajurca.

22Cunanga, juchata ama ashtahuan rurachun Dios cacharichijpimi Paipajta rurajcuna tucushcanguichi. Shina cashpami, Diospajlla causashpa, causaita causagrinatapash japircanguichi.

23Juchata rurashpa causashpaca, huañushpa chingagrinatami japinga. Ashtahuangarin, ñucanchi Apunchi Jesucristomandami, Taita Diosca juyashpa, causaita causagrinataca caramujun.