1Ñuca Taita Dioslla,
Candami alicachijusha, ama upalla saquiripaichu.
2Canda na cazuj runapash, umachishpa causaj runapashmi, ñucataca fiñashpa rimanajurca.
Ñucata llaquichingapami, llullashpa rimanajurca.
3Ñucata na ricunayachishpami,
na ali shimicunahuan catiriyashpa rimanajurca.
Yangamandami macangapa shamurca.
4Paicunataca juyajpipash, ñucataca na ricunayachircachu.
Ashtahuangarin ñucaca, Candami mañajurcani.
5Paicunaman alita rurashcamandaca, na alitami tigrachihuarca.
Paicunata juyashcamandaca, ninandami na ricunayachihuarca.
6Paitaca, fiñaj runa llaquichijuchun.
Paihuanga, Satanás pacta purijuchun.
7Juez tapuchijui punllapipash, paica llaquichi tucunapacha cachun.
Paipaj mañashcapash, juchallata ricurishca cachun.
8Paica ama unaita causashca cachun.
Paipaj ruranataca, shujcuna rurashpa catichun.
9Paipaj huahuacunapash, taita mama illaj saquirichun.
Paipaj huarmipash, cusa illaj saquirichun.
10Paipaj huahuacunaca, maipipash mañashpa purinajuchun.
Paicunapaj huasipash illajpi, carucunapi micunata mascashpa purinajuchun.
11Tucui imata charishcatapash, culquita mañachij runa apachun.
Pai imatalla charishcatapash, na rijsishca gentecuna apachun.
12Pipash paitaca ama llaquishca cachun.
Taita mama illaj saquirishca paipaj huahuacunataca, pipash ama llaquishca cachun.
13Paipaj miraicunaca, tucurishca cachun.
Cati miraipica, paipaj shutipash anchuchi tucushca cachun.
14Paipaj taitacuna na alita rurashcataca, Mandaj Diosca ama cungachun.
Paipaj mamapaj juchatapash, ama anchuchishca cachun.
15Chai juchacunataca, Mandaj Diosca ama anchurishca cachun.
Cai pachapi ama ashtahuan yarichunga, Diosllata anchuchishca cachun.
16Shujcunata na llaquishpa causashcamandami chashna tucunga.
Ashtahuangarin llaquilla causaj, imagupash illaj runagutami catiriyashpa llaquichijurca.
Llaquihuan causaj runatami, huañuchingapa catiriyajurca.
17Pitapash llaquicuna japichun munashcamandami, paimanllata tigrarca.
Bendiciondaca na munajpimi, paimandaca anchurirca.
18Chaimandami, ninan llaquicunahuanlla causajurca.
Paipaj vijsamanga, llaquicunaca yacushnami yaicurca.
Tullucunapipash, aceiteshnami yaicurca.
19Llaquicunahuanlla causachun.
Llaqui causanataca, chumbilishcashna causachun.
20Ñucata fiñashpa rimajcunataca, Mandaj Diosllata llaquichijuchun.
Ñucata na alicachishpa rimajcunatapash, chashnallata llaquichijuchun.
21Ñucata Mandaj Jatun Dioslla.
Cambaj ninan juyaita charishcamanda, quishpichihuayari.
Ninanda juyaj cashcamanda, cacharichihuayari.
22Ñucaca, imagupash illaj huajchamari cani.
Ñuca shungupipash, ninan llaquihuanmari cani.
23Llandu yalijujshna, chinganallami cani.
Langosta juruta huaira apanashnami cani.
24Ninan yarjaihuan cashcamandami, ñuca cunguricunapash chujchujun.
Ñucapash, tulluyashpami tucurijuni.
25Gentecunaca, na alicachishpami rimanajuhuan.
Ñucata ricushpaca, umata muyuchishpami asishpa ricunajuhuan.
26Ñucata Mandaj Taita Dioslla, yanapahuayari.
Ñucata ninanda juyaj cashcamanda, quishpichihuayari.
27Chashna rurajpimi, Cambaj ushaihuan yanapaj cashcata yachanajunga.
Chaipimi Mandaj Dios chashna rurashcataca yachanga.
28Ñucata na ali shimicunahuan rimanajujpipash, Canmi bendiciahuangui.
Ñucata llaquichingapa jatarijcunataca pingaichishpa,
Cambajta ruraj ñucataca cushichihuanguilla.
29Ñucata yangamanda juchachijcunaca, ninanda pingai tucushca cachun.
Paicunaca, ninanda pandarishpalla causachun.
30Ñuca shimihuanmi, Mandaj Diostaca ninanda alicachisha.
Ashtaca gentecunapaj chaupipimi jatunyachijusha.
31Diosmi, imagupash illajcunapaj randi shayaringa.
Juchachishpa llaquichigrijujpi quishpichingapami shayaringa.
Who We AreWhat We EelieveWhat We Do
2025 by iamachristian.org,Inc All rights reserved.
