Psalms 32 - Quichua Imbabura 2016

Mandaj Diosman, juchata villana cashcamandaDavid rurashca Salmomi. Masquil.

1Diosta na cazushpa juchata rurashcamanda,

Dios perdonajpica, ninan cushijuitami charinga.

2Mandaj Dios perdonashpa,

na juchachijpi causaj runaca, ninan cushijuitami charinga.

Na ali yuyaita na charij runaca, ninan cushijuita charingami.

3Ñuca juchata Diosman na villajpica,

ñuca tullucunapash maucayashpami catirca.

Punllandi huacajujpimi chashna tucurca.

4Punllandi, tutandimi llaquichihuarcangui.

Verdella jihuashna cashpapash,

rupai punllacunapi chaquishca jihuashnami tucurcani. Selah

5Ñuca juchataca, imatapash na pacashpami, Canman villarcani.

Mandaj Dioslla:

“Canda na cazushpa juchata rurashcataca, Canmanllatami villasha” nircanimi.

Canga, ñuca juchataca perdonarcanguimi. Selah

6Chaimandami, Cambajlla causajcunaca, llaqui punllacunapica, Canda mañanajunga.

Ninan llaquicuna shamushpapash, paicunataca napacha llaquichingachu.

7Canmi, ñuca pacajuna cashpa,

ima llaquimandapash huacaichihuangui.

Llaquimanda llujchishcamandaca, shinllita candashpami cushijusha. Selah

8Can maita purinatapash alimi yachachisha.

Ricuriashpami ali ñanda pushasha.

9Na uyangapa munaj, caballoshna, mulashnaca na canachu cangui.

Chaicunataca, huascahuan huatashpa, jirruta amulichishpallami cazuchina.

Na chashna rurajpica, na cazungapa munanllami.

10Diosta na manllaj runaca, ashtaca llaquicunatami japinga.

Ashtahuangarin, Mandaj Diosta crishpa shuyajtaca, Paimi juyashpa charinga.

11Alitalla rurajcuna,

Mandaj Dioshuan ninanda cushijuichi.

Diospajlla causajcuna,

ninanda cushijushpami, Diosman alicachina canguichi.