1 SAMUEL 28 - Quichua Imbabura 2016

1Chai punllacunapimi filisteocunaca, Israelcunahuan macanajungapa, macanajunata yachaj runacunata tandachinajurca. Chaipimi Aquis runaca, Davidtaca cashna nirca: “Canllata ali yachanguimi. Canga, canda catijcunandi ñucahuan tandanajushpami, macanajuiman rina cangui” nircami.

2Shina nijpimi Davidca, Aquis runataca cashna nirca: “Cunanmi, cambajta ruraj ñuca imata ruranata yachajtapash ricugringui” nirca. Shina nijpimi Aquis runaca, Davidtaca cashna nirca: “Shina cashpaca, tucui ñuca causaipi, ñucata ricuchunmi churasha” nirca.

Saulmandapash, Endor pueblomanda yachaj huarmimandapash

3Samuel, ña huañujpimi, tucuilla Israelcuna huacashpa, pai causajushca Ramá shuti pueblopillata pambashca carca. Shinallata, Saulca, yumbucunata, imapipash ricushpa yachajcunataca, llactamanda llujchishpa cachashcami carca.

4Filisteocunaca tandanajushpa, Sunem shuti puebloman shamushpami, carpacunata shayachishpa tiyanajurca. Shinallata Saulpash, tucuilla Israelcunata tandachishpami, Gilboa shuti urcupi carpacunata shayachishpa tiyajurca.

5Filisteocuna, carpacunata shayachishpa tiyanajujta ricushpami, Saulca shungu junda manllarijurca.

6Chaimandami Saulca, Mandaj Diosta tapujurca. Mandaj Diosca, muscuipipash, Urimhuan yachangapa rurajpipash, profetacunamambash, imatallapash na tigrachircachu.

7Chaimandami Saulca, paipajta rurajcunataca: “Imatapash yachajlla ayata charij huarmita mascagrichi. Chai huarmipajman ñuca rishpa, paita tapusha” nijpimi, paipajta rurajcunaca: “Endor shuti pueblopimi, imatapash yachajlla ayata charij shuj huarmi causan” ninajurca.

8Shina nijpimi Saulca, paita ama rijsichun shuj churajunacunata churajushpa, ishcai runacunata pushashpa, yachaj huarmipajman tuta rirca. Chaiman tuta chayashpaca “Can imatapash ricushpa yachaj ayahuan ñuca ima tucunatapash yachapai nirca. Shinallata maijanda ñuca cayamui nishcatapash cayamupangui” nircami.

9Shina nijpimi chai huarmica, cashna nirca: “Canga, Saúl imatalla rurashcatapash yachanguimi. Paimi, huañushcacunata cayajcunatapash, yachajcunatapash, cai llactamanda llujchishpa cacharca. ¿Imashpata ñucata huañuchihuachun, chashna pandachij shamungui?” nircami.

10Shina nijpimi Saulca, Mandaj Diospaj shutipi cashna nishpa juramenturca: “Mandaj Diosca ricujunmi. Can caita rurashcamandaca, ima llaquipash na japingachu” nircami.

11Shina nijpimi, chai huarmica: “¿Pitata cayai ningui?” nijpi Saulca: “Samuelta cayamui” nirca.

12Chai jipami, Samuelta chai huarmi ricushpaca, ninanda caparishpa Saultaca cashna nirca:

13“¿Imashpata umahuarcangui? Canga, Saulmari cangui” nircami. Shina nijpimi jatun mandaj Saulca, cashna nirca: “Ama manllaichu. ¿Imatata ricurcangui?” nircami. Shina nijpimi, chai huarmica: “Alpa ucumanda, dioscuna vichai shamunajujtami ricurcani” nirca.

14Shina nijpimi, Saulca: “¿Imaman rijchajta ricurinyari?” nishpa tapujpi chai huarmica, cashna nirca: “Shuj rucu runami, jahualla churajunahuan pillurishca shamujun” nirca. Shina nijpimi Saulca, Samuelmi canga yashpa, paita manllashpa alpaman chayajta urai cumurirca.

15Chaipimi Samuelca: “¿Imapata ñucata cayashpa fiñachihuangui?” nijpi Saulca, cashna nirca: “Filisteocuna, ñucata fiñashpa macanajungapa shamujpi, Taita Diospash, ñucamanda anchurijpimi, ninan llaquihuan cani. Ñuca tapushcataca, profetacunapash, muscuicunapash, imatallapash na tigrachihuanllu. Chaimandami, ñuca imata ruranatapash villachun, candaca cayarcani” nircami.

16Shina nijpimi Samuelca, cashna nijurca: “Mandaj Dios canmanda anchurishpa, canda fiñashca cajpica, ¿imapata ñucataca tapuhuanguiyari?

17Mandaj Dios, ñucaman villashcatami candaca rurashca. Mandaj Diosllatami, can mandajushcatapash quichushpa, cambaj cumba Davidman cushca.

18Canllatami, Mandaj Dios rimashcataca na cazurcangui. Shinallata, Amalec gentecunata Dios ninandapacha fiñashpa, tucuillata huañuchi nishcatapash, na pactachircanguichu. Chaimandami Mandaj Diosca, candaca chashna rurashca.

19Cunanga, Israelcunatapash, candapashmi Mandaj Diosca, filisteocunapaj maquipi churanga. Shina churajpimi cayapaca cambash, cambaj churicunapash ñucahuan canguichi. Mandaj Diosca, macanajunata yachaj Israel runacunatapash filisteocunapaj maquipimi churanga” nircami.

20Samuel chashna villajta uyashpami Saulca, jatun runa cashpapash ninanda manllarishpa, alpaman urmarca. Shinallata tucui chai punllapash, tutapash imatallapash na micushca cashcamandami, shinlli tucuitaca napacha ushajurca.

21Saúl ninanda manllarishpa, imata ruraitapash na ushajunda ricushpami, chai huarmica cashna nirca: “Ricui, cambajta ruraj ñucaca, can rimashcatami cazurcani. Can imata rurai nishcatapash uyashpami, huañunatapash na manllashpa tucuita rurarcani.

22Chaimanda cunanga, cambajta ruraj ñuca imata nishcatapash uyapai nipanimi. Can shinlli tucushpa ñanda japishpa richunmi, asha micunata micuchun caragrini” nircami.

23Shina nijpipash, Saulca: “Na munanichu” nishpami, na micungapa munarca. Ashtahuangarin paipajta rurajcunapash, chai huarmipash micuillayari ninajujpillatami, paicunata cazushpa jatarishpa, cama jahuapi tiyarirca.

24Chai huarmica, shuj racu vira shicuta pai charishcatami huañuchirca. Chai jipaca, jacuta japishpa masashpami, levadura illaj tandata rurarca.

25Shina rurashpami Saulmambash, paipajta rurajcunamambash cararca. Ña micushca jipaca, jatarishpami paicunaca chai tutallata rirca.