Kitaaba Weedduu Weedduu Caalu 6 - Kitaaba Woyyuu

Jaalalti Waa Maraa Caalaa FilatamtiHiriyyoota Idaayyitti'ii

1Ati ta dubartoota maraa caalaa bareeddu!

jaalalloon kee garam dhaqe?

nullee akka deemnee si woliin sondhu

gara inni deeme nutti himi.

Idaayyittii

2Jaalalloon kiyya tika hoolotaa bobbaasu'uu fi

abaaboo bareedu muru'uuf

gara hulee biqiltuun urgaayu argamuu bu'eera.

3Inni jaalalloo kiyya; anillee ta isaati;

abaaboo suufi'ii keessatti tika hoolotaa bobbaasa.

Idaayyicha

4Jaalalloo tiyya! ati akka qachaa Teersa'aa bareedda;

akka Yerusaalemii guddiftee bareedda;

gaachenni kee akka duula hiriiree meeshaa woraanaa qabatee

wol faanaa deemuutitti

nama sodaachisa.

5Yabo'oo ijji tee waan na boojiteef na irraa buqqisi;

rifeensi mataa keetii akka tika re'iinii ka gaara Gila'aadii irraa gad hurrisaniiti.

6Ilkaan kee akka ilmoolee hoolotaa ta lakkuu dhalattuutii fi

akka hoolota hin maseennee ta

bisaaniin dhiqaniititti addaatee bareeda.

7Boqoon tee lamaanuu roomaanii baqaqe fakkaatti;

shaashii ati haguuggattu keessaan mudhatti.

8Mootonni jahaatamaa, mata galtoonni saddeettamaatii fi

babbareeddan laakkobsaa olii yoo jiraatanillee,

9Ani garuu takkattima jaaladha;

isiin ta mudaa woyiituu hin qabne

ta akka handari'ii bareedde;

isiin haadha ufiitiif tokkotti'i;

haati isii deettellee maraa caalaa isii jaalatti;

worri babbareeddanillee isii laala'aa jajaniin;

mootonninii fi mata galtoonni moototaa isii jajan.

Hiriyyoota Idaayyitti'ii

10«Tun ta akka ifa bariisa'aa,

ta akka addeessaa addaattu

ta akka adu'uutitti iftu,

ta gaachenni isi'ii akka loltuu hiriiree deemuutitti

nama sodaachisu

isiin tun eennu?» jedhan.

Idaayyicha

11Biqiltuu adda addaa ka dhooqa keessatti dhaabame laalu'uuf

woyiniin muteeruu fi daraaraan roomaani'iillee akka daraare laalu'uuf

gara hulee dhaaba biqiltuu meexxi'ii gad bu'e.

12Uduma ani hin beekin yaanni kiyya na butee

konkolaataa gugurdootaa ka saba kiyyaa irra na kaaye» jedhe.

Hiriyyoota Idaayyichaa

13Ati intala gosa Sulaamii koottuu deebi'i;

akka midhaassinee si laallu koottuu deebi'i.

Idaayyicha

Intala gosa Sulaamii maaf akka loltoonni lamaan wol lolaniititti

isii laaltan?