Kitaaba Faaru'uu 19 - Kitaaba Woyyuu

Uumamni Maruu Ulfinna Rabbii MudhisaFaaruu Daawitii ka bulchaa faarfattootaatiif dhiyaate

1Samiiwwan ulfinna Rabbii dubbatan;

samiin hujii harka isaa labsa.

2Guyyaan guyyaa itti aanutti dhaamsa hima;

halkan tokko halkan itti aanutti dubbii kana beessisa.

3Dubbatuun hin jiru; jechillee jiru;

laagaan isaanii ka gurraan dhagayamuu miti.

4Garuu dhaamsi isaanii gara adunyaa maraa faca'e

haga daangaa ardii maraa baya;

Rabbi hulee aduun jiraattu samii irra godhe.

5Aduun akka idaayyaa golaa baatuutitti baati;

akka nama fiigee jabaatee

galma gayuutitti gammaddi.

6Baati isaa daangaa sami'iiti;

naannofni isaa haga daangaa biraati;

ka oo'a isaa jalaa dhokatu hin jiru.

Seera Rabbii

7Seerri Rabbii guutu'u;

lubbuu deebisee haarawoomsa;

seerri Rabbii amanama'a;

wollaalaa ogeessa taasisa.

8Seerran Rabbii sirri'i;

garaa namaa gammachiisa;

ajanyi Rabbii hin ifa;

ija namaa ibsa.

9Rabbiin sodaatuun qulqullu'u;

baraa haga bara baraa jabaatee jiraata;

murtiin Rabbii maruu dhuga'a;

guutumatti qajeellumma'a.

10Ka worqii caalaa kabajjame;

ka worqii baay'ee qulqullaaye caale;

damma caalaa mi'aaya;

nadhii dammaa caalaa namatti tola.

11Akkasuma tajaajilaan kee isaan gorfama;

isa eegu'uun gatii guddaa argata.

12Balleessaa ufii eentu arga?

Waaqa kiyya cubbuu dhokatte irraa na qulqulleessi.

13Garbicha kee cubbuu ugguu irraa eegi;

akka na irratti hin moone na gargaari;

yoo san mudaa malee jiraadha;

yakka guddaa irraa hin qulqullaaya.

14Yaa Rabbi! irkoon kiyyaa fi

fayyisaan kiyya si'i;

jechi kiyyaa fi yaanni garaa kiyyaa

si afo'otti bareedaa haa ta'u.