Kitaaba Faaru'uu 17 - Kitaaba Woyyuu

Iyyata Nama Qulqullu'uuFaatee Daawitii

1Yaa Rabbi!

Iyya kiyya naa dhagayi;

kadhaa kiyya ka qajeellumma'aan dhiyeeffadhe naa caqasi;

kadhaa kiyya ka soba hin qabne dhagayi.

2Balchummaan kiyya si biraa naa haa dhufu;

ijji tee haqa haa argitu.

3Garaa kiyya hin qoratte;

halkan natti siixxee na qorte;

na sakattaate, waan takkallee na irratti hin argine;

afaan kiyya hin dabarsine.

4Hujii namootaa irraa;

jecha afaan keetiitiin,

karaa worra didanii irraa

uf eegeera.

5Deemsi kiyya karaa kee irratti jabaateera,

miillan kiyyallee hin mucucaanne.

6Waandhana! kadhaa kiyya waan naa dhageettuuf si waama;

gurra kee gara kiyya deebisii kadhaa kiyya dhagayi.

7Worra diintota ufii jalaa si jalatti dhokatan;

ka harka kee ka mirgaatiin oolchitu;

jaalala kee jabaa maalalee taasisii ibsi.

8Akkuma gumaa ijaa eeggataniititti na eegi;

gaaddisa koola keetii jalatti na dhossi.

9Diintota na marsanii fi

worra hammeeyyii na rakkisan irraa na eegi.

10Isaan garaa laafuu didda'aaf onnee ufii cufatan;

afaaniin uf jaja'aa dubbatan.

11Diintonni tiyya ari'anii na dhaqqaban;

na marsan;

lafaan na dhayu'uuf ija natti babaasan.

12Isaan akka leencota beelayanii;

akka ilmoo leencaa ka dhokatanii waa eeganiiti.

13Yaa Rabbi! ka'ii isaaniin wodhaansa bayii isaan kuffisi;

guraadee keetiin lubbuu tiyya hammeeyyii jalaa oolchi.

14Yaa Rabbi! namoota hireen isaanii

waan ardii tanaa callaa ta'e jalaa na oolchi;

galmee kee keessaa garaa isaanii guutte;

ijoollee isaaniitiillee baay'ateera;

ijoolleen isaanii qabeenna kuufatan;

15Ani garuu balchumma'aan fuula kee laala;

yoo ulfinna kee argu hin quufa.