Seera Leewwotaa 17 - Kitaaba Woyyuu

Ciincaa Eessatti Akka Dhiyeessuun Barbaachisu

1Rabbi Muuse'een akkana jedhe,

2«Aaroonii fi ijoollee Israa'elii maraa Rabbi akkana jedha jedhii isaanitti himi;

3Namoota Israa'elii keessaa eennullee sangaa'a, hoola'aa fi re'ee yoo qale gandaan alatti yookaan ganda keessatti yoo qale,

4hulee woyyittii Rabbii saanduuqa waada'aa afo'oo fi daasee wol gayi'ii afoo yoo fiduu baate, yakki dhiigaa namicha san irra ta'a; waan dhiiga jisseef nama irraa fooyamee haa baduu.

5«Kanaaf ijoolleen Israa'elii hennaa ciincaa godhatan martinuu gara hulee daasee wol gayi'ii gadichatti fidanii ciincaa fayyinnaa Rabbiif ciinceessan.

6Gadichillee balbala daasee wol gayi'iititti hulee ciincaa Rabbii dhiyeessan sanitti dhiiga facaasa; coomallee akka Rabbii urgaayaa mishaa ta'u ciinceessa.

7Ciincaa ufii worra yaada seexanaa duukaa deemanii seebaranii akka hin dhiyeessine; kun isaanii fi ijoollee ijoollee isaaniitiif seera baraa haga bara baraa haa ta'uu.

8«Ati isaaniin galaa ijoollee Israa'elii keessa jiraatan maraa keessaa namni tokko yoo ciincaa ciincawu dhiyeessu yookaan ciincaa biraa

9Rabbii dhiyeessu'uuf gara daasee wol gayi'ii yoo fiduu baate namni sun banii keessaa fooyamee haa baduu.

Dhiiga Nyaachuun Dhoogga'a

10«Ijoollee Israa'elii keessaa yookaan worra isaanitti galee isaan keessa jiraatu, namni kamuu yoo dhiiga nyaate namni nyaatu sun jibbamaa ta'a; nama san banii keessaa fooyee balleessa.Ser. Uma. 9:4; Ser. Lew. 7:26-29; 19:26; Kes. Deb. 12:16; 23; 15:23

11Lubbuun foonii dhiiga keessa waan jirtuuf dhiinni waan lubbu'uuf araara godhuuf; hulee ciinca'aa irratti ani akka araara isinii ta'uuf isinii kenneera.Ibr. 9:22

12Kanaafuu ijoollee Israa'elii isin keessaa eennullee akka dhiiga hin nyaanne worra isinitti gale keessaallee eennullee akka dhiiga hin nyaanne isiniin jedhe.

13«Ijoollee Israa'eliitii fi galaan isaan jidduu jiraatan keessaa eennullee busaawaa foon isaa nyaattamuu fi simbira dhadhoolee yoo qabe dhiiga isaa jissee biyyee irra haa dhawuu.

14Dhiinni waan foon uffatee maruu tokko waan ta'eef kanaafuu ijoollee Israa'elii jireenni foon maraatuu dhiiga waan ta'eef dhiiga foon maraatuu hin nyaatinaa'a; ka nyaate maruu fooyamee haa baduu waan jedheeruuf.

15«Namni waan ufiin du'ee fi waan bineensi cabsee ajjeese nyaatu maruu nama biyyaa ta'ee'e yookaan galaallee yoo ta'e, uffata ufiitii fi nafa ufii bisaaniin haa miicatuu; inni haga galgalaa battaaya'a; achiin maayessa hin qulqullaaya.

16Yoo nafa ufiitii fi uffata ufii miicatuu baate ammo cubbuun isa irra ta'a.»