Isam 20 - Ndebele Bible (iBhayibhili Elingcwele) 1978

Ukubotshwa kukaSathane

1Ngasengibona isithunywa sisehla sivela ezulwini siphethe esandleni saso ikhiye yomgodi ongelamkhawulo leketane elikhulu.

2Sawubamba umgobho, inyoka enguSathane loMubi, sawubopha okweminyaka eyinkulungwane;Gen 3:1

3sawuphosela emgodini ongelamkhawulo, sawuvalela, sabeka uphawu phezu kwawo ukuze ungabe usaduhisa izizwe, ize iphele iminyaka eyinkulungwane. Emva kwalokho kumele ukuba ukhululwe okwesikhatshana.

Ukuvuka kokuqala

4Ngasengibona izihlalo zobukhosi; bahlala kuzo abanikwa ukuthonisisa. Ngabona futhi imiphefumulo yalabo ababequnywe amakhanda ngenxa yokufakazela uJesu langenxa yelizwi likaNkulunkulu, ababengasikhonzanga isilo loba umfanekiso waso, bengabekwanga uphawu lwaso emabunzini abo loba ezandleni zabo; bavuka, babusa kanye loKristu iminyaka eyinkulungwane.Dan 7:9, 22

5Abafileyo ababesele kabavukanga yaze yaphela iminyaka eyinkulungwane. Lokhu kuyikuvuka kokuqala.

6Ubusisiwe, ungcwele olesabelo ekuvukeni kokuqala; phezu kwabanjalo ukufa kwesibili kakulamandla, kodwa bazakuba ngabapristi bakaNkulunkulu labakaKristu, bazakubusa kanye laye iminyaka eyinkulungwane.

Ukukhululwa kukaSathane

7Lapho isiphelile iminyaka eyinkulungwane, uSathane uzakukhululwa ekubotshweni kwakhe,

8aphumele ukuduhisa izizwe ezisemagumbini amane omhlaba, azibuthele ekulweni izimpi zikaGogi loMagogi, ubunengi bazo bungangetshebetshebe lolwandle.Hez 7:2; 38:2, 9, 15

9Zaphumela emhlabeni wonke, zeza zazingelezela umuzi wabangcwele lomuzi othandekayo. Kodwa umlilo ovela ezulwini, waziqothula zonke;

10loSathane owayeziduhisile waphoselwa echibini lomlilo lesolufa, lapho kukhona isilo lomprofethi wamanga; zizakuhlupheka khona emini lebusuku kuze kube nini lanini.

Ukwahlulelwa kokucina

11Ngasengibona isihlalo sobukhosi esikhulu lesimhlophe lohlezi kuso; kwanyamalala ebusweni bakhe izulu lomhlaba, kakwaze kusaba khona.Dan 7:9, 10

12Ngabona abafileyo, abakhulu labancinyane, bemi phambi kwesihlalo sobukhosi; lezincwadi zavulwa. Kwavulwa lenye incwadi eyincwadi yokuphila. Abafileyo bahlulelwa ngalokhu okwakulotshiwe ezincwadini langalokho ababekwenzile.

13Lolwandle lwabakhupha abafileyo ababekulo, ukuFa lendawo yabafileyo kwakhupha abafileyo ababekukho; bonke bahlulelwa ngalokho ababekwenzile.

14Kwathi ukuFa lendawo yabafileyo kwaphoselwa echibini lomlilo; lelichibi liyikufa kwesibili.

15Uba ekhona ongafunyaniswanga elotshiwe encwadini yokuphila, waphoselwa echibini lomlilo.