Seb 23 - Ndebele Bible (iBhayibhili Elingcwele) 1978

UPawuli ephambi komphakathi

1UPawuli wasewujolozela umphakathi, wathi: Bazalwane, ngihambile phambi kukaNkulunkulu ngilesazela sonke esihle kuze kube lamuhla.

2UAnaniya umpristi omkhulu walaya labo ababemi khona ukuba bamtshaye umlomo.

3Ngakho uPawuli wathi kuye: UNkulunkulu uzakukutshaya wena mduli oconjiweyo; uhlalele ukungithonisisa ngomlayo, kodwa ngokuphambene lomlayo ulaya ukuba ngitshaywe.Mat 23:27, 28

4Ababemi lapho bathi kuye: Uyamthuka umpristi omkhulu kaNkulunkulu na?

5UPawuli wasesithi: Bengingazi, bazalwane, ukuthi ungumpristi omkhulu; ngoba kulotshiwe ukuthi: Ungakhulumi kubi ngombusi wesizwe sakini.Eks 22:28

6Kwathi uPawuli esebonile ukuthi enye ingxenye yabo ingabaSadusi lenye ingabaFarisi, wamemeza emphakathini, wathi: Bazalwane, mina ngingumFarisi lendodana yomFarisi, ngimangalelwe ngethemba langokuvuka kwabafileyo.Seb 26:5; Fil 3:5

7Esetshilo lokho, kwavela ukuphambana phakathi kwabaFarisi labaSadusi, umhlangano wadabuka phakathi.

8Ngoba abaSadusi bathi kakukho ukuvuka kwabafileyo, lezithunywa, lomoya, kodwa abaFarisi bayakuvuma konke.Mat 22:23; Mark 12:18; Luka 20:27

9Kwasekuvela umsindo omkhulu, kwathi abathile kubabhali behlelo labaFarisi basukuma, baphika kakhulu, besithi: Kasifumani lutho olubi kulumuntu; mhlawumbe umoya kumbe isithunywa kukhulume laye.

10Kwathi sekuvele ukuphikisana okukhulu, induna enkulu yesaba ukuba uPawuli uzakudatshulwa yibo, yalaya amabutho ukuba ehle amhluthule phakathi kwabo, abuyele laye endlini yamabutho.

11Ngobusuku obulandelayo iNkosi yema kuye, yathi: Mana isibindi; njengokuba ufakaza ngami eJerusalema, kunjaloke umelwe ukufakaza ngami laseRoma.

Icebo labaJuda lokumbulala uPawuli

12Kwathi sekusile, abaJuda benza icebo, bazibopha ngesifungo ukuba kabayikudla lokunatha, bengambulalanga uPawuli.

13Babengaphezu kwamatshumi amane abenza lelicebo.

14Baya kubapristi abakhulu labadala, bathi: Sizibophe ngesifungo sokuthi kasiyikuzwa ukudla singakambulali uPawuli.

15Ngakhoke lina kanye lomphakathi yazisani induna enkulu ukuba imthumele kini ngokungathi lizakuzwisisa indaba yakhe; thinake sesilungele ukumbulala engakasondeli.

16Kodwa indodana kadadewabo kaPawuli yezwa ngokumcathamela kwabo, yangena endlini yamabutho, yamtshela uPawuli.

17UPawuli wasebiza enye yezinduna zekhulu, wathi: Sana linsizwa enduneni enkulu, ngoba ilento ezakuyitshela yona.

18Yasiyithathake, yayisa enduneni enkulu, yathi: UPawuli isibotshwa ungibizile, wacela ukuba ngilethe linsizwa kuwe, ilento ezakukutshela yona.

19Induna enkulu yasiyithatha ngesandla, yabuyela eceleni layo, yabuza bebodwa, yathi: Kuyini ozakungitshela khona?

20Yathi: AbaJuda bavumelene ukucela kuwe ukuba wehlisele uPawuli emphakathini kusasa kungathi bazakuhlolisisa indaba yakhe.

21Kodwa wena ungabavumeli, ngoba abanye babo, amadoda adlula amatshumi amane, bamcathamele bazibophile ngesifungo ukuba bangadli banganathi, baze bambulale. Ngakho sebezilungisele balindele isithembiso sakho.

22Ngakho induna enkulu yasiyiyekela insizwa ihamba, yayilaya isithi: Ungatsheli muntu ukuba ungibikele lokhu.

UPawuli usiwa eKesariya

23Yasibiza induna zekhulu ezimbili, yathi: Ngeawa yesithathu yobusuku lungisani abebutho abangamakhulu amabili, labakhweli bamabhiza abangamatshumi ayisikhombisa, labemikhonto abangamakhulu amabili, ukuba bahambe baze bayefika eKesariya:

24njalo lilungisele uPawuli amabhiza ukuze akhwele, limfikise kuhle kumbusi uFelike.

25Waseloba incwadi esithi:

26Mina Klawudiya Lisiya kuye umhlekazi uFelike ngiyabingelela.

27Lindoda ibibanjwe ngabaJuda; ibisizakubulawa yibo, ngasengifika lamabutho, ngayophula lapho sengizwile ukuthi ungumRoma.

28Ngathi ngifuna ukuba ngazi icala abayimangelela ngalo, ngayiletha emphakathini wabo;

29ngafumana ukuba imangalelwe ngezindaba zomlayo wabo, kodwa ingamangalelwanga ngalutho olufanele ukufa loba ukubotshwa.

30Kwathi sekuvelile kimi ukuba kukhona icebo ngaleyondoda, ngasengiyithumela kuwe masinyane, ngibalayile abayimangalelayo ukuba bakhulume ngayo phambi kwakho.

31Kwang’khona abebutho basebemthatha uPawuli njengokulaywa kwabo, bamusa eAntipatri ebusuku.

32Kusasa babuyela endlini yamabutho batshiya abakhweli bamabhiza ukuba bahambe laye.

33Bona sebefikile eKesariya bamnika umbusi incwadi, bammisa uPawuli phambi kwakhe.

34Eseyibalile incwadi wabuza ukuba ungowawuphi umkhono; esezwile ukuba ungowaseKilikhiya,

35wathi: Ngizakuyizwa kuhle indaba yakho, sebefikile abakumangalelayo; walaya ukuba alondolozwe endlini kaHerodi.