Isa 34 - Ndebele Bible (iBhayibhili Elingcwele) 1978

INkosi ithukuthelela izizwe zonke

1Sondelani, lina zizwe, ukuba lizwe,

lilalele, lani bantu.

Umhlaba kawulalele, lakho konke okukiwo,

ilizwe, lakho konke okuvela kilo.

2Ngoba iNkosi izithukuthelele izizwe zonke,

iyafutheka ngayo yonke impi yazo,

izinikele ekubulaweni.

3Ababuleweyo bazo kabayikungcwatshwa,

zizanuka izidumbu zabo,

legazi labo ligeleze ezintabeni.

4Zonke inkanyezi lelanga lenyanga kuzakuphela,

umkhathi ugoqwe njengomqulu,

lenkanyezi zonke ziwe lanjengamahlamvu awohloka evinini,

njengamahlamvu awohloka esihlahleni somkhiwa.

5Umkhonto weNkosi uyabonakala ezulwini,

uzakwehlela phezu kukaEdoma ngokwahlulela,

phezu kwabantu ebanikele ekubulaweni.

6Umkhonto wayo usugcwele igazi,

usugcwele amafutha legazi lamawundlu lelezimbuzi,

ugcwele amafutha ezinso zezinqama.

Isizanikela lumhlatshelo eBozira,

ihlabe umnikelo omkhulu elizweni laseEdoma.

7Izinyathi zizakuwa kanye lalo,

lezinkunzana kanye lenkunzi ezilamandla.

Ilizwe labo lizagcwala igazi,

lomhlabathi wabo uvundiswe ngamahwahwa.

8Ngoba iNkosi ilosuku lokuphindisela,

umnyaka wokubuyiselwa kwendaba yaseZiyone.

9Imifula yaseEdoma izaphenduka ingcino,

lomhlabathi wakhona uphenduke isolufa:

ilizwe lonke lizakuba yingcino etshisayo.

10Lizakutsha ebusuku lemini, kaliyikucima,

lentuthu yalo izakuthunqa kokuphela.

Lizakuba yinkangala ezizukulwaneni zonke,

kakulamuntu ozadabula phakathi kwalo kuze kube nininini.

11Kodwa kuzakwakha kulo ukhozi lesikhova lewabayi.

INkosi izakwelula phezu kwalo intambo yokulinganisa ukuchitheka,

lentambo yokulinganisa ukudideka.

12Kakusayikuba khona inkosi,

lezikhulu zalo zizabe zingasekho.

13Ameva azakhula ezindlini zamakhosi alo akhona,

imbabazane lokhula kukhule emizini ebiyelweyo,

kube yindawo yamakhanka lezikhova.

14Amagola azahlala khona lezimpisi,

lamagogo azabizana khona;

isipuku sizafika khona sizizuzele indawo yokuhlala.

15Lapho isikhova sizakwakha isidleke,

silalele khona, sichamusele,

sifukamele abantwana baso ngomthunzi waso,

lemizwazwa izabuthana lapho,

ize igcwale khona.

16Funani encwadini yeNkosi, lifunde khona;

kakukho lokukodwa kulezi okuzasweleka,

kakukho lokukodwa okuzaswela umngane wakho.

Ngoba umlomo weNkosi ulayile,

lomoya wayo ukubuthanisile.

17Yiyo ezabele ilizwe,

izinike zonke indawo,

zizahlala khona izizukulwana zonke,

libe ngelazo kokuphela.