Nani 19 - Ndebele Bible (iBhayibhili Elingcwele) 1978

Ukuhlanjululwa kwalabo abangahlambulukanga

1INkosi yasisithi kuMose loAroni:

2Nansi isimiso lomlayo iNkosi ekumisileyo. Tshelani abakoIsrayeli ukuba balethe kini ithokazi elibomvu elingelasici, lelingelabala, futhi elingazanga libotshelwe ejogweni;

3lilinike uEleyazare umpristi, likhutshelwe ngaphandle kwezihonqo, lihlatshwe phambi kwakhe.

4UEleyazare uzakuthatha igazi lalo ngomunwe wakhe, afafaze kasikhombisa ngegazi lalo ngaphambi kwethente lokuhlangana.

5Ithokazi litshiswe phambi kwakhe; kutshiswe isikhumba salo lenyama yalo, legazi lalo, lomswane walo.

6Umpristi uzathatha umkusu, lehisope, lelembu elibomvu, akuphose emlilweni lapho ithokazi litshiswa khona.

7Umpristi usezakugezisa ingubo zakhe, ageze umzimba wakhe ngamanzi, andubana abuyele ezihonqweni, abe ngongcolileyo kuze kuhlwe.

8Olitshisayo ithokazi uzagezisa ingubo zakhe ngamanzi, ageze umzimba wakhe ngamanzi, abe ngongcolileyo kuze kuhlwe.

9Umuntu ohlambulukileyo uzakubutha umlotha wethokazi, awubeke endaweni ehlambulukileyo ngaphandle kwezihonqo, ukuba ugcinelwe ibandla labakoIsrayeli, usetshenziswe lamanzi ekuhlambululeni; kuyinto yokuhlambulula esonweni.Heb 9:13

10Obuthayo umlotha wethokazi uzagezisa ingubo zakhe, abe ngongcolileyo kuze kuhlwe. Lokhu kuzakuba yisimiso esingelakuphela ebantwini bakoIsrayeli lakwabemzini abahlala phakathi kwabo.

11Othinta isidumbu uzakuba ngongcolileyo insuku eziyisikhombisa.

12Uzakuzihlambulula ngamanzi ngosuku lwesithathu langolwesikhombisa, ahlambuluke. Kodwa uba engazihlambululi ngosuku lwesithathu langolwesikhombisa, kayikuhlambuluka.

13Othinta isidumbu, angazihlambululi, ungcolisa iTabernakeli leNkosi; lowomuntu uzakukhutshwa koIsrayeli, ngoba amanzi okuhlambulula kawaphoselwanga kuye; ungcolile, lokungcola kwakhe kuzakuhlala kuye.

14Nanku umlayo omayelana lomuntu ofele ethenteni. Bonke abangena ethenteni lelo labo bonke ababekulo bazakuba ngabangcolileyo insuku eziyisikhombisa.

15Zonke imbiza ezingelasizibekelo zingcolile.

16Yilowo lalowo othinta umuntu obuleweyo empini egangeni, loba isidumbu sozifeleyo, loba ithambo lomuntu, loba iliba, uzakuba ngongcolileyo insuku eziyisikhombisa.

17Ngomuntu ongcolileyo kuzakuthathwa umlotha walokho okwatshiswayo komnikelo wesono, lamanzi amahle azakuthelwa kanye lawo embizeni.

18Umuntu ohlambulukileyo uzathatha ihisope, ayicwilise emanzini, afafaze ngawo ithente, lempahla yonke, labantu ababekhona, lowathinta ithambo, loba owathinta obuleweyo, loba ozifeleyo, loba iliba.

19Ohlambulukileyo kamfafaze ongcolileyo ngosuku lwesithathu langolwesikhombisa, amhlambulule ngosuku lwesikhombisa; ongcolileyo agezise ingubo zakhe, ageze ngamanzi, ahlambuluke kusihlwa.

20Kodwa uba umuntu ongcolileyo, engazihlambululi, uzakukhutshwa phakathi kwebandla, ngoba engcolisile indlu engcwele yeNkosi; amanzi okuhlambulula kawaphoselwanga kuye, ngakho ungcolile.

21Lokhu kuzakuba yisimiso esingelakuphela kubo. Lowo ofafazayo ngamanzi okuhlambulula uzagezisa ingubo zakhe; lalowo othinta amanzi okuhlambulula uzakuba ngongcolileyo kuze kuhlwe.

22Lokho umuntu ongcolileyo akuthintayo kuzakuba ngokungcolileyo; lalowo okuthintayo uzakuba ngongcolileyo kuze kuhlwe.