Hubo 35 - Ndebele Bible (iBhayibhili Elingcwele) 1978

Umkhuleko wokucela ukophulwa ezitheni

1Nkosi, melana labamelana lami,

ulwe labo abalwa lami.

2Thatha ihawu lesihlangu,

uvuke ungisize.

3Hwatsha umkhonto, ungivikele kwabangizingelayo;

tshono kimi ukuthi:

Mina ngiyikukhululwa kwakho.

4Kabayangeke babe lehlazo labo abafuna ukuphila kwami.

Kabahlehliselwe emuva,

bahlatshwe zinhloni labo abangisongelayo.

5Kababe njengomule ophetshulwa ngumoya,

isithunywa seNkosi sibadudule.

6Indlela yabo kayibe mnyama itshelele,

isithunywa seNkosi sibaxotshe.

7Ngoba bangithiya ngingelacala,

ngingelacala bangimbela igodi.

8Ukubhujiswa kakubajume,

lembule abangithiye ngalo libabambe,

bawele kulo, babhujiswe.

9Ng’khonake umphefumulo wami uzakuthokoza eNkosini,

ujabule ngokukhulula kwayo.

10Wonke amathambo ami azakuthi:

Nkosi, ngubani onjengawe,

okhulula ababuthakathaka kubo abalamandla,

ababuthakathaka labaswelayo kubo ababaphangayo na?

11Ofakazi abangalunganga bangivukele,

bangibuza izinto engingazaziyo.

12Bangiphindisela okuhle ngokubi;

umphefumulo wami udabukile.

13Kanti ekuguleni kwabo ngagqoka ezokuzila,

ngazihlupha ngokuzila ukudla,

ngakhuleka ngikhothamise ikhanda lami,

14ngokungathi ngikhalela umngane wami lomfbethu;

ngahamba ngikhotheme njengomuntu olilela unina.

15Kodwa ekukhubekeni kwami bahlekisana ngami,

babuthana ndawonye ukuba bangiklolodele;

abantu engangibazi bangihlasela bengakhawuli,

16bangiklolodela futhifuthi

begedla amazinyo abo.

17Nkosi, uzakukubukela lokhu kuze kube nini na?

Ngophula ekubhubhiseni kwabo,

lokuphila kwami ezilwaneni lezi.

18Ng’khonake ngizakukubonga ebandleni elikhulu,

ngikudumise phakathi kwabantu abanengi.

19Bangajabuli ngami abayizitha zami ngaphandle kwecala,

bangangificeli ilihlo labo abangizonda ngeze.

20Ngoba kabakhulumi okuhle,

kodwa bacabanga amazwi enkohliso

ngabachumileyo emhlabeni.

21Bangikhamisela kakhulu imilomo yabo besithi:

Hiya belo!

amehlo ethu akubonile.

22Nkosi, usukubonile; ungathuli.

Nkosi, ungabi khatshana lami.

23Vuka, umele ilungelo lami,

umele indaba yami, Nkulunkulu wami, Nkosi yami.

24Ngahlulela, Nkosi Nkulunkulu wami, ngokulunga kwakho;

ungavumi ukuba bathokoze ngami.

25Bangatsho ukuthi: Ha, kwaya ngesifiso senhliziyo zethu!

Bangatsho ukuthi: Simginyile.

26Kabayangeke babe lenhloni

abajabula ngenxa yokuhlupheka kwami;

babanjwe zinhloni bayangeke labo abazikhukhumeza ngami.

27Kodwa labo abathokoza ngokuqonda kwami

kabamemeze bathabe kakhulu,

batsho njalonjalo ukuthi:

Yinkulu iNkosi ethokoza

ngokuphumelela kwenceku yayo.

28Umlomo wami uzakutshumayela ngokulunga kwakho langodumo lwakho usuku lonke.