Hubo 40 - Ndebele Bible (iBhayibhili Elingcwele) 1978

Ukubonga lomkhuleko wokucela ukukhululwa

1Ngayilindela iNkosi ngesineke;

yangilalela yezwa ukukhala kwami.

2Yangikhupha emgodini owesabekayo,

exhaphozini elibi,

yabeka inyawo zami phezu kwedwala,

yaqinisa izinyathelo zami.

3Yafaka ingoma entsha emlonyeni wami,

ingoma yokubonga uNkulunkulu wami.

Abanengi bazakukubona besabe,

bayithembe iNkosi.

4Ubusisiwe umuntu oyithembayo iNkosi,

ongaphendukeli kwabazigqajayo,

kulabo abaduhela kubonkulunkulu bamanga.

5Nkosi, Nkulunkulu wami,

wena wenzile izinto ezinkulu,

lemicabango yakho mihle ngathi;

kakho ongafaniswa lawe.

Uba ngizilandisa ngizitsho,

zinengi zingeke zibalwe.

6Umhlatshelo lomnikelo kawuwudingi,

umnikelo wokutshiswa lomnikelo wesono kawuwubizi;

kodwa unginikile indlebe evulekileyo.

7Ngasengisithi: Khangela, ngiyeza;

emqulwini wencwadi kulotshelwe mina imithetho yakho;

8ngiyathanda ukwenza intando yakho, Nkulunkulu wami,

umlayo wakho usenhliziyweni yami.

9Ngitshumayele ebandleni elikhulu

indaba ezinhle zokukhululwa;

kangiyikuwuvala umlomo wami

njengoba usazi, wena Nkosi.

10Ukusiza kwakho kangikufihlanga enhliziyweni yami;

ngikhulumile ngobuqotho bakho langokukhulula kwakho;

kangilufihlanga uthando lwakho olungapheliyo

kanye lobuqotho bakho ebandleni elikhulu.

11Wena Nkosi, ungangigodleli isihawu sakho;

uthando lwakho olungapheliyo lobuqotho bakho

kakungilondoloze njalonjalo.

12Ngoba ububi obunengi bungihanqile,

leziphambeko zami zingificile, kangisaboni;

zinengi ukwedlula inwele zekhanda lami;

ngiphelelwe yisibindi.

13Vuma, Nkosi, ukungikhulula.

Nkosi, phangisa ungisize.

14Kabayangeke babe lenhloni bonke abafuna ukungibulala;

kabaxotshwe bayangiswe abafuna ukungilimaza.

15Kabatshaqeke ngenxa yehlazo labo abathi kimi:

Hiya belo!

16Kodwa kabathabe bajabule bonke abakudingayo wena;

abathanda ukukhulula kwakho

kabatsho njalo bathi: Yinkulu iNkosi!

17Loba mina ngiyisihlupheki ngiswela,

iNkosi iyanginanzelela;

wena ungumsizi wami lomkhululi wami;

ungalibali, Nkulunkulu wami.