Eks 29 - Ndebele Bible (iBhayibhili Elingcwele) 1978

Ukugcotshwa kukaAroni lamadodana akhe

1Yilokhu ozakukwenza kubo ukubahlukanisa ukuba babe ngabapristi bokuphatha umsebenzi wami. Thatha inkabi lenqama ezimbili ezingelasici,Levi 8:1–36

2lesinkwa esingelamvubelo lamaqebelengwana angelamvubelo ahlanganiswe lamafutha, lezinkwa ezincinyane ezingelamvubelo ezigcotshwe ngamafutha, okwenze ngempuphu ecolekileyo;

3ukufake esitsheni sibe sinye, ukulethe ngesitsha kanye lenkabi lenqama ezimbili.

4Usondeze uAroni lamadodana akhe emnyango wethente lokuhlangana, ubagezise ngamanzi;

5uthathe izambatho, ugqokise uAroni ibhatshi, lesambatho esiyingubo yamahlombe, lengubo yamahlombe, lengubo yesifuba, umbophe ngebhanti elalukiweyo lengubo yamahlombe,

6umthwalise iqhiye ekhanda lakhe lomqhele ongcwele phezu kweqhiye.

7Uthathe amagcobo okugcoba, uwathele ekhanda lakhe, umgcobe.

8Usondeze lamadodana akhe uwambathise amabhatshi.

9Ubabophe ngamabhanti uAroni lamadodana akhe, ubathwalise izingowane, baphathe ubupristi ngesimiso esingapheliyo. Ngalindlela uzakugcoba uAroni lamadodana akhe.

10Uzakuletha inkunzi phambi kwethente lokuhlangana, ukuba uAroni lamadodana akhe babeke izandla zabo ekhanda lenkunzi;

11uyihlabe inkunzi phambi kweNkosi ngasemnyango wethente lokuhlangana,

12uthathe igazi lenkunzi, ulininde empondweni zealtare ngomunwe wakho, uthululele lonke igazi eliseleyo phansi ngasealtareni.

13Uzathatha lonke idanga lemibilini, lamahwahwa angaphezu kwesibindi, lezinso zombili lamahwahwa azo, ukutshise ealtareni.

14Kodwa inyama yenkunzi lesikhumba sayo lomswane wayo ukutshise ngomlilo ngaphandle kwezihonqo, ngoba kungumnikelo wesono.

15Uzathatha inqama ibenye; uAroni lamadodana akhe babeke izandla zabo ekhanda lenqama.

16Uyihlabe inqama, uthathe igazi layo, ulikhaphazele ealtareni inxa zonke.

17Uyihlahlele inqama, ugezise imibilini yayo lemilenze yayo, ukubeke ndawonye lezitho zayo lekhanda layo,

18utshise yonke inqama ealtareni, kube ngumnikelo wokutshiswa eNkosini, iphunga elimnandi, lomnikelo owenzelwe iNkosi ngomlilo.Efe 5:2; Fil 4:18

19Uzathatha enye inqama; uAroni lamadodana akhe babeke izandla zabo ekhanda layo.

20Uyihlabe, uthathe igazi layo, ulininde oqwangeni lwendlebe yokunene kaAroni, lasoqwangeni lwezindlebe zokunene zamadodana akhe, lasezithupheni zezandla zabo zokunene, lasemazwaneni amakhulu enyawo zabo zokunene, igazi eliseleyo likhatshazelwe ealtareni inxa zonke.

21Uzathatha igazi elisealtareni lamagcobo okugcoba, umchele ngakho uAroni lezambatho zakhe, lamadodana akhe, lezambatho zamadodana akhe, ukuba abe ngcwele lezambatho zakhe, lamadodana akhe lezambatho zawo.

22Uthathe amahwahwa enqama, lomsila ononileyo, ledanga lemibilini, lamahwahwa angaphezu kwesibindi, lezinso zombili, lamahwahwa azo, lomlenze wokunene, ngoba iyinqama yokugcotshwa kompristi;

23uthathe isinkwa sibe sinye, leqebelengwana libe linye elilamafutha, lesinkwa esincinyane sibe sinye, esitsheni sesinkwa esingelamvubelo esiphambi kweNkosi,

24ukubeke konke ezandleni zikaAroni lasezandleni zamadodana akhe, ukuzunguze ukuba kube ngumnikelo wokuzunguzwa phambi kweNkosi.

25Ukuthathe ezandleni zabo, ukutshise ealtareni phezu komnikelo wokutshiswa, ukuba kube liphunga elimnandi phambi kweNkosi; ngoba kungumnikelo owenzelwe iNkosi ngomlilo.

26Uzathatha isifuba senqama yokugcotshwa kukaAroni, usizunguze ukuba sibe ngumnikelo wokuzunguzwa phambi kweNkosi, sibe yisabelo sakho.

27Uzakusahlukanisela isifuba somnikelo wokuzunguzwa lomlenze womnikelo wokuphakanyiswa ozunguzwayo, okwenqama yokugcotshwa kompristi ngoba enikelelwa uAroni lamadodana akhe;

28kuzakuba ngokukaAroni lokwamadodana akhe, kube yimfanelo engapheliyo kwabakoIsrayeli; ngoba kuyisabelo sabapristi esivela eminikelweni yokuthula yabakoIsrayeli; kungumnikelo wabo onikelwa eNkosini.

29Izambatho ezingcwele zikaAroni zizakuba ngezamadodana akhe emva kwakhe, ukuba agcotshwe, ahlukaniselwe, embethe zona.

30Indodana engumpristi endaweni yakhe izakuzambatha insuku eziyisikhombisa nxa ingena ethenteni lokuhlangana ukuyakhonza endaweni engcwele.

31Uzakuthatha inqama yokugcotshwa kompristi, upheke inyama yayo endaweni engcwele.

32UAroni lamadodana akhe badle inyama yenqama lesinkwa esisesitsheni ngasemnyango wethente lokuhlangana,

33badle lezozinto okwenziwa ngazo indlela yokubuyisana ekugcotshweni kwabo lekwahlukaniselweni kwabo; kodwa owemzini angazidli ngoba zingcwele.

34Uba kusala inyama yokugcotshwa kompristi lesinkwa kuze kuse, ukutshise ngomlilo, kungadliwa, ngoba kungcwele.

35Uzakwenza njalo kuAroni lamadodana akhe njengokukulaya kami, ukugcotshwa kwabo kuthathe insuku eziyisikhombisa.

36Insuku ngensuku unikele inkunzi ibe ngumnikelo wesono wokubuyisana; futhi uzakunikelela ialtare umnikelo wesono lapho ulenzele indlela yokubuyisana, uligcobe ukuba ulahlukanisele.

37Ulenzele ialtare indlela yokubuyisana insuku eziyisikhombisa, ulahlukanisele ialtare, ukuba libe ngcwele kakhulu; lakho konke okulithintayo kuzakuba ngcwele.

Iminikelo yensuku ngensuku

38Yilokhu ozakukunikela ealtareni; amawundlu amabili alomnyaka munye insuku ngensuku njalonjalo.

39Elinye iwundlu uzanikela ngalo ekuseni, elinye unikele ngalo kusihlwa

40kanye lelinye iwundlu unikele ingxenye yehefa lempuphu ecolekileyo ixubene lokwesine kwehini yamafutha okukhanywa, kanye lokwesine kwehini yewayini kube ngumnikelo wokuthululwa.

41Unikele elinye iwundlu kusihlwa, unikele kanye lalo umnikelo wempuphu lomnikelo wokuthululwa njengasekuseni, kube liphunga elimnandi, umnikelo owenzelwe iNkosi ngomlilo.

42Lo uzakuba ngumnikelo wokutshiswa wensuku zonke ezizukulwaneni zenu zonke, ngasemnyango wethente lokuhlangana phambi kweNkosi, lapho ngizahlangana khona lani, ngikhulume lawe.

43Lapho ngizahlangana labantu bakoIsrayeli; ithente lizakwahlukaniselwa yinkazimulo yami.

44Ngizakwahlukanisela ithente lokuhlangana lealtare, ngibahlukanisele njalo loAroni lamadodana akhe ukuba babe ngabapristi bokuphatha umsebenzi wami.

45Ngizahlala phakathi kwabantu bakoIsrayeli, ngibe nguNkulunkulu wabo.

46Bazakwazi ukuthi ngiyiNkosi uNkulunkulu wabo, eyabakhupha elizweni laseGibithe ukuba ngihlale phakathi kwabo; ngiyiNkosi, uNkulunkulu wabo.