Levi 25 - Ndebele Bible (iBhayibhili Elingcwele) 1978

Umnyaka weSabatha loweJubili

1INkosi yathi kuMose entabeni yaseSinayi:Eks 23:10–11

2Tshono ebantwini bakoIsrayeli uthi: Nxa lifika elizweni engilinika lona, lizakugcinela iNkosi iSabatha.

3Lizakulima amasimu enu iminyaka eyisithupha, lithene amavini enu iminyaka eyisithupha, libuthe izithelo zawo.

4Kodwa ngomnyaka wesikhombisa kuzakuba khona elizweni iSabatha lokuphumula, iSabatha leNkosi. Kaliyikulima amasimu enu, lingatheni amavini enu.

5Kaliyikuvuna umkhukhuzela wamasimu enu, kaliyikukha izithelo zamavini enu angathenwanga. Uzakuba ngumnyaka wokuphumula elizweni.

6Ilizwe lizathela ukudla ngokwalo, kube ngokwenu, lokwezigqili zenu, lokwezigqilikazi zenu, lokwabaqatshiweyo benu, lokwabemzini abahlala kini,

7lokwezinkomo zenu, lokwezinyamazana eziselizweni; konke elikuthelayo kuzakuba yikudla.

8Lizakuzibalela amaviki ayisikhombisa eminyaka, iminyaka eyisikhombisa ephindwe kasikhombisa, ukuze isibanga samaviki ayisikhombisa eminyaka sibe yiminyaka engamatshumi amane lesificamunwemunye.

9Ng’khona lizakukhalisa kakhulu impondo ngosuku lwetshumi lwenyanga yesikhombisa; ngosuku lokubuyisana lizakukhalisa impondo, zizwakale elizweni lonke lakini.

10Lumnyaka wamatshumi amahlanu lizakuwugcina ube ngcwele, limemezele inkululeko elizweni lonke kubo bonke abakhileyo kilo. Kuzakuba liJubili kini; yilowo lalowo wenu abuyele elifeni lakhe lasekhaya lakhe.

11Umnyaka wamatshumi amahlanu uzakuba liJubili kini; lingahlanyeli ngawo, futhi lingavuni umkhukhuzela, lingakhi izithelo zamavini angathenwanga.

12Ngoba uliJubili, uzakuba ngcwele kini; lingadla kuphela lokho ilizwe elikuthelayo ngokwalo.

13Ngomnyaka lo weJubili omunye lomunye wenu kabuyele elifeni lakhe.

14Uba uthengisa ulutho kumakhelwana wakho loba uthenga ulutho kuye, lingadlelezelani.

15Uba uthenga kumakhelwana wakho, khumbula ukuthi mingaki iminyaka edlulileyo kusukela emnyakeni weJubili; ngoba yena uzakubiza kuwe imali ngeminyaka yokuthela ezayo.

16Uba iminyaka iminengi, yandisa imali yakho; uba iminyaka imilutshwana, nciphisa imali yakho; ngoba uthengisa kuwe ngenani lezivuno.

17Lingadlelezelani, kodwa lesabe uNkulunkulu wenu. Ngoba ngiyiNkosi uNkulunkulu wenu.

18Ngakhoke gcinani izimiso zami, lezahlulelo zami, lizenze, ukuba lihlale elizweni livikelekile.

19Ilizwe lizakuthela izithelo zalo, lidle lisuthe, lihlale kulo livikelekile.

20Uba lisithi: Sizakudlani ngomnyaka wesikhombisa uba singavunyelwa ukulima lokuvuna na?

21ngizakwenza ukuba libusiswe ngomnyaka wesithupha, ukuze ilizwe lithele izithelo zeminyaka emithathu.

22Lapho lilima ngomnyaka wesificaminwembili lizabe lokhu lisadla okwezivuno ezindala; yebo, lizakukudla kuze kufike umnyaka wesificamunwemunye, kuze kuvunwe isivuno sawo.

23Kakuvunyelwa ukuba ilizwe lithengiswe kuze kube nininini, ngoba ngelami; lina lingabemzini nje labezizweni kimi.

24Elizweni lonke eliyilifa lenu lizavumela ukuhlengwa kwelizwe.

25Uba umfowenu esehlelwa yibuyanga, athengise ilifa lakhe, isihlobo sakhe sizakufika sihlenge lona umfowabo alithengisileyo.

26Uba umuntu engelaye ongalihlenga, kodwa abesenotha, athole okwanele ukulihlenga,

27kabale iminyaka kusukela ekulithengiseni kwakhe, abuyisele kulowomuntu owalithengayo imali elingene iminyaka eseleyo, abuyele elifeni lakhe.

28Kodwa uba engelamali yokuzibuyisela lona, lelo alithengisileyo lizakuhlala kuye olithengileyo kuze kufike umnyaka weJubili; ngomnyaka weJubili lizakubuyiselwa, yena abuyele elifeni lakhe.

29Uba umuntu ethengisa indlu emzini obiyelwe ngomthangala, angayihlenga ungakapheli umnyaka emva kokuthengiswa kwayo; uzakuba lelungelo lokuyihlenga umnyaka wonke.

30Uba ingahlengwanga nxa umnyaka usuphelile, leyondlu esemzini obiyelwe ngomthangala izakunikwa lowo owayithengayo, ibe ngeyakhe leyezizukulwana zakhe; kayiyikubuyiselwa ngomnyaka weJubili.

31Kodwa izindlu zemizi engabiyelwanga ngomthangala zizakubalwa lamasimu asemaphandleni; zingahlengwa, zibuyiselwe ngomnyaka weJubili.

32Kanti mayelana lemizi yamaLevi, izindlu ezisemizini yawo, amaLevi angazihlenga loba nini.

33Uba omunye wamaLevi engayihlengi, indlu eyathengiswa emzini wawo izakubuyiselwa ngomnyaka weJubili; ngoba izindlu ezisemizini yamaLevi ziyilifa lawo phakathi kwabantu bakoIsrayeli.

34Kodwa amasimu angaphandle angawemizi yamaLevi kawayikuthengiswa, ngoba ayilifa lawo kuze kube nininini.

35Uba umfowenu ohlala lawe engumyanga, esehluleka ukuzithwala, wena uzakumthwala, ahlale lawe njengowemzini lanjengowezizweni.Dute 15:7–8

36Ungathathi kuye umvuzo lenzuzo, kodwa wesabe uNkulunkulu wakho, umvumele umfowenu ukuba ahlale lawe.

37Ungameboleki umfowenu imali ngenzalo, futhi ungamniki ukudla kwakho ngenzuzo.Eks 22:25; Dute 23:19–20

38NgiyiNkosi uNkulunkulu wakho owakukhupha elizweni laseGibithe ukukunika ilizwe laseKanani, ngibe nguNkulunkulu wakho.

39 Eks 21:2–6; Dute 15:12–18 Uba umfowenu olawe esehlelwa yibuyanga, azithengise kuwe, ungamphathi njengesigqili;

40uzakuba njengoqatshiweyo lonjengowemizi, akusebenzele kuze kufike umnyaka weJubili.

41Ng’khona uzasukake kuwe, yena labantwana bakhe, abuyele ekhaya lakhe, elifeni labokhokho bakhe. —

42Ngoba bayizinceku zami engabakhupha elizweni laseGibithe; kabayikuthengiswa babe yizigqili —

43Ungamphathi nzima kodwa wesabe uNkulunkulu wakho.

44Izigqili zakho lezigqilikazi zakho uzakuzithenga ezizweni ezikuzingelezeyo.

45Futhi ungazithenga kwabemzini abahlala lawe, lakubantwana babo abazalelwa elizweni lakini, babe ngabakho.

46Ungabanika abantwana bakho emva kwakho babe yilifa labo kuze kube nininini; bona ungabenza babe yizigqili. Kodwa phakathi kwabakoIsrayeli, abantu abakini, kakungabi khona umuntu ozakuphatha nzima omunye.

47Uba owezizweni loba owemzini ohlala lawe enothile, umfowenu olaye abe ngumyanga, azithengise kowemzini loba kowezizweni ohlala lawe, ingabe kowakibo,

48angahlengwa nxa esethengisiwe; mhlawumbe omunye wabafowabo angamhlenga,

49loba umalumakhe, loba umzawakhe, ingabe oyisihlobo sakhe esomuzi wakhe angamhlenga; uba enotha, angazihlenga yena.

50Uzakubalisana lowamthengayo, kusukela emnyakeni owazithengisa kuye kuze kufike umnyaka weJubili; imali yentengiso izakulingana lenani leminyaka, lesikhathi sokusebenza kwakhe sibalwe njengesikhathi soqatshiweyo.

51Uba kusasele iminyaka eminengi, enanini layo uzakunika imali yokuhlengwa kwakhe, ayikhuphe emalini amthenga ngayo.

52Uba kusasele iminyaka emilutshwana kuze kufike umnyaka weJubili, uzakubalisana laye, anike imali yokuhlengwa kwakhe njengenani laliminyaka.

53Uzakuba ngaphansi kwakhe njengoqatshiweyo iminyaka ngeminyaka; kayikumphatha nzima emehlweni akho.

54Uba engahlengwa ngalindlela, uzakuphuma ekhululekile ngomnyaka weJubili, yena labantwana bakhe.

55Ngoba kimi abantu bakoIsrayeli bayizinceku, bayizinceku zami engabakhupha eGibithe. NgiyiNkosi uNkulunkulu wenu.