Hlu 5 - Ndebele Bible (iBhayibhili Elingcwele) 1978

Ihubo likaDebora loBaraki

1UDebora loBaraki indodana kaAbinowama basebehlabela ngalolosuku besithi:

2Ngokuba abakhokheli bakhokhela koIsrayeli,

langokuba abantu bazinikela ngenhliziyo,

bongani iNkosi!

3Zwanini lina makhosi, lilalele lani zikhulu,

ngizakuyihlabelela iNkosi,

ngihubele iNkosi, uNkulunkulu kaIsrayeli.

4Nkosi, ekusukeni kwakho eSeyiri,

ekuhambeni kwakho usuka elizweni laseEdoma,

umhlaba wazamazama, lephezulu lanyikinyeka,

yebo, amayezi athontisa amanzi.

5Izintaba zathuthumela phambi kweNkosi, leSinayi uqobo,

phambi kweNkosi, uNkulunkulu kaIsrayeli.

6Ensukwini zikaShamigari indodana kaAnathi,

ensukwini zikaJayeli, izindwendwe zakhawula ukuhamba,

lezihambi zemigwaqo zahamba ngezindledlana.

7Abakhokheli baphela koIsrayeli,

baphela ngaze ngavela mina Debora,

ngaba ngunina koIsrayeli.

8Ekukhetheni kwabo onkulunkulu abatsha

kwaba khona ukulwa elizweni.

Kwakungasabonwa isihlangu lomkhonto

ebantwini abazinkulungwane ezingamatshumi amane koIsrayeli.

9Inhliziyo yami ingasezinduneni zabakoIsrayeli,

labazinikela ngenhliziyo phakathi kwabantu.

Bongani iNkosi!

10Lina eligada obabhemi abamhlophe,

lani elihlala emacansini abuthakathaka,

lani elihamba ngendlela, cabangani ngakho.

11Lalelani, abantu abahlabelayo ezindaweni zokukha amanzi

bayalandisa ngokunqoba kweNkosi,

ukunqoba kwabakhokheli bakoIsrayeli.

Abantu beNkosi behlela emasangweni.

12Vuka, vuka, Debora!

Vuka, vuka, uhlabele ingoma!

Vuka, Baraki, uthumbe abathunjwa bakho,

wena ndodana kaAbinowama.

13Bafika abantu abaqotho ezinduneni zabo,

abantu beNkosi bafika kuyo njengamaqhawe.

14Basuka koEfrayimi behlela esigodini,

belandela wena, Benjamini, lezihlobo zakho.

KuMakiri kwaphuma izinduna,

lakoZebuluni kwaphuma labo abaphatha intonga yenduna.

15Izikhulu zakoIsakari zaziloDebora,

uIsakari wayethembekile kuBaraki;

behlela esigodini bemlandela.

Kodwa uRubeni wayedabuke phakathi,

kwakukhona ukuthandabuza okukhulu.

16Wahlalelani ezibayeni zezimvu

ukuzwa umhlanga wokukhaliselwa izimvu na?

URubeni wayedabuka phakathi,

kwakukhona ukuthandabuza okukhulu.

17AbaseGileyadi bahlala ngaphetsheya kweJordani.

UDani wahlalelani emikolweni na?

UAsheri walibala ngasokhunjini lolwandle,

wazihlalela ngasolwandle.

18AbakoZebuluni bazidela kwaze kwaba sekufeni,

loNafitali laye emagcekeni okulwa.

19Amakhosi afika alwa,

alwa amakhosi aseKanani,

eTanaki ngasemanzini aseMegido,

kawazuzanga impango yesiliva.

20Inkanyezi zalwa zisezulwini,

endleleni zazo zalwa loSisera.

21Amanzi eKishoni abakhukhula, amanzi amanengi omfula iKishoni.

Wena mphefumulo wami, hamba ngamandla!

22Aseduma amasondo amabhiza ngokugadula,

ukugadula kwamabhiza akhe.

23Qalekisani iMerozi, kutsho isithunywa seNkosi,

qalekisani kakhulu abakhileyo kulo,

ngoba kabezanga ukusiza iNkosi,

ukuyisiza iNkosi kanye lamaqhawe.

24Obusisiweyo kwabesifazana nguJayeli umkaHeberi umKeni,

phakathi kwabesifazana abahlala emathenteni ubusisiwe kakhulu.

25USisera wacela amanzi, wamnika uchago,

wamlethela amasi ngomganu oligugu.

26Wathatha ngesandla sakhe isikhonkwane sethente,

ngesandla sokunene wathatha isando sesisebenzi,

watshaya uSisera, wadabula ikhanda lakhe,

watshaya wabhoboza isikhala sobuso.

27Wakhothama wawa, walala phansi ngasenyaweni zakhe,

wakhothamela ngasenyaweni zakhe, wawela khona,

lapha awela khona, wafela khona.

28Unina kaSisera wakhangela ngewindi,

walunguza ngewindi, wamemeza wathi:

Iphuziswe yini inqola yakhe yokulwa na?

Uphuziswe yini umsindo wokugadula kwamabhiza akhe na?

29Amakhosazana akhe ahlakaniphileyo amphendula,

kodwa yena waziphendula wathi:

30Bayabutha impango, bayayeyehlukaniselana,

intombazana, yebo amantombazana amabili kuleyo laleyondoda,

amalembu aphenduliweyo ngakaSisera,

impango yamalembu aphenduliweyo,

ilembu, yebo amalembu amabili aphenduliweyo ngawokucecisa intamo yami.

31Zizabhubha ngokunjalo zonke izitha zakho, Nkosi.

Kodwa bonke abakuthandayo kababe njengelanga lapho liphuma ngamandla alo.

Kwaba khona ukuthula elizweni iminyaka engamatshumi amane.