uEsta 8 - Ndebele Bible (iBhayibhili Elingcwele) 1978

AbaJuda bavunyelwa ukuzilwela

1Ngalolosuku inkosi uAhasuweru yanika inkosikazi uEsta indlu kaHamani isitha sabaJuda. UMoridekayi weza phambi kwenkosi ngoba uEsta wayeseyitshelile ukuzalana kwabo.

2Inkosi yasikhupha indandatho yophawu lwayo eyayiyithathele uHamani, yayinika uMoridekayi. UEsta wabeka uMoridekayi ukuba aphathe indlu kaHamani.

3UEsta wasebuya ekhuluma lenkosi, waziwisela ngasenyaweni zayo ekhala inyembezi eyincenga ukuba ivimbele ububi obabenziwe nguHamani waseAgagi, ifilise icebo lakhe ngabaJuda.

4Inkosi yasiselulela intonga yobukhosi yegolide kuEsta, yena wasukuma wema phambi kwayo,

5wathi: Uba kuyithokozisa inkosi, uba ngifumene umusa emehlweni ayo, uba lokhu engikutshoyo kulungile enkosini, uba ngingamukeleka kuyo, kakulotshwe umthetho ozabuyisa incwadi ezakhutshwa nguHamani indodana kaHamedatha waseAgagi ngecebo lakhe lokubhubhisa abaJuda kuwo wonke amazwe enkosi.

6Ngoba ngingakumela kanjani ukubona ububi obuzayo busehlela isizwe sakithi na? Ngingakuthwala kanjani ukubona ukubhujiswa kwendlu yakwethu na?

7Inkosi uAhasuweru yasisithi enkosikazini uEsta lakuMoridekayi umJuda: UEsta sengimnike indlu kaHamani, loHamani uselengisiwe ogodweni ngoba wasongela ukubulala abaJuda.

8Lingaloba ngokuthanda kwenu ngabaJuda ebizweni lenkosi, likunameke ngophawu lwenkosi, ngoba umthetho olotshwe ngebizo lenkosi wananyekwa ngophawu lwayo kawulakudilizwa.

9Ngakho ngosuku lwamatshumi amabili lantathu lwenyanga yesithathu ethiwa nguSivani kwabizwa ababhali benkosi; kwalotshwa umthetho kubaJuda, njengokutsho kukaMoridekayi, lasezikhulwini lakubabusi lakuziphathamandla zamazwe kusukela eIndiya kuze kufike eEtiyopiya, amazwe alikhulu lamatshumi amabili lesikhombisa, kuwo wonke ngokugwala kwawo lakubo bonke abantu ngolimi lwabo, futhi lakubaJuda ngokugwala kwabo langolimi lwabo.

10Umthetho walotshwa ebizweni lenkosi uAhasuweru, wananyekwa ngophawu lwakhe lobukhosi; izincwadi zathunyelwa ngezigijimi ezigade amabhiza avela ezitebeleni zenkosi.

11Ngalezincwadi inkosi yanika imvumo kubaJuda abasemizini yonke ukuba bahlangane bazivikele, babhubhise babulale baqede yonke impi yabantu loba ilizwe elibahlaseleyo, babulale labesifazana labantwana, baphange lempahla zabo,

12kuwo wonke amazwe enkosi uAhasuweru ngasuku lunye, ngosuku lwetshumi lantathu lwenyanga yetshumi lambili ethiwa nguAdari.

13Lokho okulotshiweyo kakumenyezelwe kuwo wonke amazwe lakubo bonke abantu, ukuba abaJuda bazilungisele lolusuku ukuphindisela ezitheni zabo.

14Izigijimi zigade amabhiza enkosi zakhutshwa masinyane ngomlayo wenkosi ngokuphangisa, lomthetho wamenyezelwa eSusa umuzi omkhulu.

15UMoridekayi wasuka phambi kwenkosi egqoke izambatho zobukhosi ezilombala oyibubende lomhlophe, ethwele umqhele omkhulu wegolide, egqoke lesambatho selembu elihle eliyibubende; umuzi waseSusa wamemeza ngokuthokoza;

16kubaJuda balapho kwasekukhona ukukhanya lokuthokoza lokujabula lodumo.

17Kuwo wonke amazwe lakuyo yonke imizi okwafinyelela kuyo umthetho wenkosi lesimemezelo sayo kwaba khona ukuthokoza lokujabula kubaJuda, lamadili, losuku lokuphumula. Abantu abanengi belizwe bazibiza ngokuthi bangabaJuda ngenxa yokwesaba abaJuda.