Hubo 34 - Ndebele Bible (iBhayibhili Elingcwele) 1978

Ukubonga ngokulunga kweNkosi

1Ngizakuyibonga iNkosi ngezibanga zonke;

ukudunyiswa kwayo kuzakuhlala kusemlonyeni wami.

2Umphefumulo wami uyazincoma ngeNkosi;

abahluphekayo kabezwe bathokoze.

3Dumisani iNkosi kanye lami,

asidumise ibizo layo kanyekanye.

4Ngakhuleka eNkosini, yangizwa,

yangikhulula kukho konke ukwesaba kwami.

5Khangelani kuyo, lithokoze,

ubuso benu kabusoze bube lenhloni.

6Lesisihlupheki sakhala eNkosini, yasizwa,

yasikhulula kuzo zonke inkathazo zaso.

7Isithunywa seNkosi siyabavikela labo abayesabayo, sibakhulule.

8Zwanini libone ukuthi iNkosi ilungile.

Ubusisiwe lowomuntu ophephela kuyo.

9Yesabeni iNkosi, lina abalungileyo bayo,

ngoba kabasweli lutho abayesabayo.

10Izilwane ziyaswela zilambe,

kodwa labo abayidingayo iNkosi kabasweli lutho oluhle.

11Wozani, bantwana, lingilalele, ngizakulifundisa ukuyesaba iNkosi.

12Ngubani kini othanda ukuphila,

ofisa insuku ezinengi ukuba abone okuhle na?

13Nqanda ulimi lwakho kokubi,

lomlomo wakho ekukhulumeni inkohliso.

14Suka kukho okubi, wenze okuhle,

dinga ukuthula, ukunxwanele.

15Amehlo eNkosi akubo abalungileyo,

lezindlebe zayo zilalela ukukhala kwabo.

16Kodwa imelana labenza okubi,

ukuba iqede ukukhunjulwa kwabo emhlabeni.

17Lapho abalungileyo bekhala, iNkosi iyabezwa,

ibakhulule kuzo zonke izinhlupheko zabo.

18INkosi iseduze labo abalenhliziyo ezidabukileyo,

iyabasiza abalomoya odabukileyo.

19Zinengi inhlupheko zolungileyo,

kodwa iNkosi iyamkhulula kuzo zonke.

20Iyawalondoloza wonke amathambo akhe,

kakwaphuki lelilodwa kuwo.

21Okubi kuzakumbulala omubi;

abazonda abalungileyo bazalahlwa.

22INkosi iyakhulula ukuphila kwezinceku zayo;

abathemba kuyo ozakulahlwa.