Hubo 60 - Ndebele Bible (iBhayibhili Elingcwele) 1978

Umkhuleko wokucela ukusizwa lokunqoba

1Nkulunkulu, usilahlile, wasichitha,

ubuthukuthele, akusivuselele.

2Uwuzamazamisile umhlaba, wawudabula izimfa;

vala izimfa zawo, ngoba uyazamazama.

3Abantu bakho ubazwise izinto ezinzima;

usinathise iwayini elisenza sidayizele.

4Ubanikile labo abakwesabayo isiboniso sempi,

ukuba babuthane kuso lapho bebalekela izitha zabo.

5Ukuze abathandekayo bakho bakhululwe

nqoba ngesandla sakho sokunene, usiphendule.

6UNkulunkulu ukhulumile esendaweni yakhe engcwele, wathi:

Ngokuthaba ngizakulicanda iShekema,

ngisabe isihotsha saseSukothi.

7Ungowami uGileyadi, ungowami uManase,

uEfrayimi uyisivikelo sekhanda lami,

uJuda uyintonga yami yokubusa.

8UMowabi ungumganu wami wokugezela,

phezu kukaEdoma ngiphosela amanyathelo ami,

ngithabe ngokunqoba iFilistiya.

9Ngubani ozakungisa emzini oqinileyo na?

Ngubani ozangiholela eEdoma na?

10Wena, Nkulunkulu, kawusilahlanga na?

Nkulunkulu, kawusaphumi lezimpi zethu.

11Akusisize ezitheni zethu,

ngoba ukusiza komuntu kuyize.

12NgoNkulunkulu sizakunqoba,

kunguye ozakunyathela phansi izitha zethu.