1 kaJohane 2 - Ndebele Bible (iBhayibhili Elingcwele) 1978

UJesu Kristu unguMmeli

1Bantwana bami, ngililobela lokhu ukuba lingoni; kodwa uba umuntu esona, siloMmeli kuBaba, uJesu Kristu olungileyo.

2Yena uyinhlawulo yezono zethu, kungesizo ezethu zodwa, kodwa lezomhlaba wonke.

3Lokho okutshengisa ukuthi siyamazi yikuba sigcine imilayo yakhe.

4Lowo othi: Ngiyamazi; kodwa engagcini imilayo yakhe ungumqambi wamanga, leqiniso kalikho kuye.

5Kodwa lowo ogcina ilizwi lakhe, uthando lukaNkulunkulu luphelelisiwe kuye impela. Lokho okutshengisa ukuthi sikuye yikuthi

6lowo othi uhlala kuye, ufanele yena ahambe njengalokhu ahamba uKristu.

Umlayo omutsha

7Bathandekayo, kangililobeli umlayo omutsha, kodwa ngililobela umlayo omdala elalilawo kusukela ekuqaleni; lumlayo omdala uyilizwi elalizwayo.Joha 13:34

8Kanti ngililobela umlayo omutsha, wona uliqiniso kuye lakini; ngoba umnyama uyadlula, lokukhanya kweqiniso sekukhanya.

9Lowo othi esekukhanyeni abezonda umzalwane wakhe, usesemnyameni kuze kube lakhathesi.

10Othanda umzalwane wakhe uhlala ekukhanyeni; kakukho okungamkhuba.

11Kodwa ozonda umzalwane wakhe usemnyameni, uhamba emnyameni, kakwazi lapho aya khona, ngoba umnyama uwaphumputhekisile amehlo akhe.

12Ngiyalilobela bantwana, ngoba izono zenu zithethelelwe ngenxa yakhe.

13Ngiyalilobela bobaba, ngoba liyamazi yena okhona kusukela ekuqaleni. Ngiyalilobela lani zinsizwa, ngoba limnqobile uSathane. Ngilobele lina bantwana, ngoba liyamazi uBaba.

14Ngilobele lina bobaba, ngoba liyamazi yena okhona kusukela ekuqaleni. Ngilobele lina zinsizwa, ngoba lilamandla, ilizwi likaNkulunkulu lihlala kini, limnqobile uSathane.

15Lingawuthandi umhlaba lezinto zasemhlabeni. Uba umuntu ethanda umhlaba, uthando lukaYise kalukho kuye.

16Ngoba konke okwasemhlabeni, inkanuko zomzimba lokukhanga amehlo lokuziqakisa kwalokhukuphila, kakuveli kuBaba, kuvela emhlabeni owonakeleyo.

17Umhlaba uyadlula kanye lenkanuko zawo; kodwa owenza intando kaNkulunkulu uhlala kuze kube nini lanini.

Ukufika koMphikukristu

18Bantwana, sekuyisikhathi sokucina. Njengalokhu lezwa kuthiwa uMphikukristu uyeza, lakhathesi sebekhona abanengi abaphikukristu; ngalokhu siyazi ukuthi sekuyisikhathi sokucina.

19Baphuma kithi, kodwa babengesibo abakithi; ngoba uba babengabakithi ngabe bahlala lathi; kodwa baphuma ukuze babonakalise ukuthi kabasibo bonke abakithi.

20Kodwa lina ligcotshiwe ngoNgcwele, lilokwazi lonke.

21Kangililobeli ngoba lingalazi iqiniso, kodwa ngoba liyalazi, liyazi ukuthi amanga kawasiwo aweqiniso.

22Ngubani ongumqambi wamanga uba kungesuye ophikayo ukuthi uJesu unguKristu na? Nguye onguMphikukristu, ngoba ephika uBaba leNdodana.

23Ophika iNdodana kalaye uBaba; ovuma iNdodana uloBaba.

24Lokho elakuzwayo kusukela ekuqaleni kakuhlale kini. Uba lokho elakuzwayo kusukela ekuqaleni kuhlala kini, lani lizakuhlala kiyo iNdodana lakuye uBaba.

25Yilokhu asithembisa khona, ukuphila okungapheliyo.

26Ngililobela lokhu ngalabo abalikhohlisayo.

27Kodwa linake, ukugcotshwa elakwamukela kuye kuhlala kini, kalisweli muntu ukuba alifundise. Lokugcoba kwakhe kuyalifundisa ngakho konke, futhi kuqinisile, kakuqambi manga; njengoba lifundile, hlalani kuye.

28Ngakhoke, bantwana, hlalani kuye ukuze kuthi lapho ebonakala, sibe lesibindi, singabi lanhloni simcatshele ekufikeni kwakhe.

29Uba lisazi ukuthi ulungile, yazini ukuthi ilowo lalowo owenza ukulunga uzelwe nguye.