Eks 18 - Ndebele Bible (iBhayibhili Elingcwele) 1978

UJetro uhambela uMose

1UJetro umpristi waseMidiyani, uyisezala kaMose, wezwa konke uNkulunkulu amenzele khona uMose labakoIsrayeli abantu bakhe, ukuthi iNkosi yayibakhuphile eGibithe.

2UJetro uyisezala kaMose wamamukela uZipora umkaMose emva kokumbuyisela kwakhe uMose,Eks 2:21, 22

3kanye lamadodana akhe amabili; ibizo lenye lalinguGereshoma, ngoba wathi: Ngangihlala elizweni lasezizweni;Seb 7:29

4ibizo lenye linguEliyezeri, ngoba wathi: UNkulunkulu kababa ube ngumsizi wami, wangikhulula emkhontweni kaFaro.

5UJetro uyisezala kaMose wafika kuMose enkangala elamadodana akhe lomkakhe, ngasentabeni kaNkulunkulu lapho wayemise khona amathente akhe.

6Kwabikwa kuMose kwathiwa: UJetro uyihlozala uyeza kuwe kanye lomkakho lamadodana akho amabili.

7UMose waphuma ukumhlangabeza uyisezala, wakhothama, wamanga. Babuzana impilo; bangena ethenteni.

8UMose wasemlandisela uyisezala ngakho konke iNkosi eyayikwenzile kuFaro lakuwo amaGibithe ngenxa yabakoIsrayeli, langezinhlupheko zonke ezazibehlele endleleni, lokuthi iNkosi yayibakhulule.

9UJetro wathokoza ngakho konke okuhle iNkosi ebikwenzele abakoIsrayeli ngokubakhulula kwayo ezandleni zamaGibithe.

10UJetro wathi: Kayibongwe iNkosi elikhulule ezandleni zamaGibithe lasesandleni sikaFaro; yabophula abantu ababecindezelwa ngamaGibithe.

11Khathesi sengisazi ukuthi iNkosi yinkulu kulabo bonke onkulunkulu, yebo kulokho amaGibithe ayezigabisa ngakho.

12UJetro uyisezala kaMose wanikela kuNkulunkulu umnikelo wokutshiswa lemihlatshelo; kweza uAroni labo bonke abalisa bakoIsrayeli, badla loyisezala kaMose phambi kukaNkulunkulu.

Ukubekwa kwabahluleli

13Kwathi kusisa uMose wahlala ukwahlulela abantu; abantu bema kuMose kusukela ekuseni kwaze kwahlwa.

14Kwathi lapho uyisezala kaMose esekubonile konke uMose akwenzela abantu wathi: Kuyini lokhu okwenzela abantu na? Uhlalelani wedwa, abantu bonke bemi kuwe kusukela ekuseni kuze kuhlwe na?

15UMose wathi kuyisezala: Kungoba abantu beza kimi ukubuza kuNkulunkulu;

16nxa belendaba, beza kimi, ngahlulele phakathi komuntu lomakhelwane wakhe, ngibazise imithetho lemilayezelo kaNkulunkulu.

17Uyisezala kaMose wathi kuye: Lokho okwenzayo kakulunganga.

18Impela uzakuzidinisa kanye lalababantu abalawe; ngoba lokhu kuyakusinda, kawulakukwenza wedwa.

19Lalela ilizwi lami; ngizakukweluleka, uNkulunkulu abe lawe. Ube ngumkhulumeli wabantu phambi kukaNkulunkulu, ulethe izindaba zabo kuNkulunkulu,

20ubafundise imithetho lemilayezelo, ubatshengise indlela abamele bahambe ngayo, lezinto abamele bazenze.

21Futhike ukhethe phakathi kwabo bonke abantu amadoda alamandla, amesabayo uNkulunkulu, aqotho, azonda inzuzo engalunganga, uwabeke phezu kwabantu ukuba abe yizinduna zezinkulungwane lezinduna zamakhulu lezinduna zamatshumi amahlanu lezinduna zamatshumi;

22kube yizo ezahlulela abantu ngazo zonke izikhathi, kulethwe kuwe zonke indaba ezinkulu, kodwa indaba ezincinyane zahlulelwe yizo, ukuze kube lula kuwe, zithwalisane lawe.

23Uba usenza lokhu, loNkulunkulu evumelana lakho, uzakuba lamandla okusebenza, labo bonke lababantu bazabuyela endaweni zabo ngokuthula.

24UMose walilalela ilizwi likayisezala, wenza konke akutshiloyo.

25UMose wakhetha amadoda alamandla phakathi kwabo bonke abakoIsrayeli, wawabeka aba yizinhloko zabantu, induna zezinkulungwane lezinduna zamakhulu lezinduna zamatshumi amahlanu lezinduna zamatshumi.

26Zabahlulela abantu ngezikhathi zonke; zaletha kuMose indaba ezinkulu, kodwa indaba ezincinyane zazahlulela zona.

27UMose wamvalelisa uyisezala; wasuka wabuyela elizweni lakibo.