1 Kho 16 - Ndebele Bible (iBhayibhili Elingcwele) 1978

1Ilizwi leNkosi uNkulunkulu lafika kuJehu indodana kaHanani ngoBahasha lisithi:

2Ngakuphakamisa othulini, ngakwenza waba ngumphathi wabantu bami uIsrayeli, kodwa ulandele indlela zikaJerobowamu, wenza ukuba abantu bami uIsrayeli bone, bangithukuthelise ngezono zabo.

3Ngakho ngizakhukhula uBahasha lendlu yakhe, ngenze kiyo engakwenza endlini kaJerobowamu indodana kaNebati.

4AbakoBahasha abafela phakathi komuzi bazadliwa yizinja, labafela egangeni badliwe ngamanqe.

5Ezinye indaba zikaBahasha lakho konke akwenzayo lobuqhawe bakhe kulotshiwe ogwalweni lwezindaba zamakhosi akoIsrayeli.

6UBahasha waya kwabaphansi, wangcwatshelwa eTiriza. UEla indodana yakhe waba yinkosi esikhundleni sakhe.

7Ilizwi leNkosi lafika ngomprofethi uJehu indodana kaHanani ngoBahasha lendlu yakhe ngenxa yabo bonke ububi abenza phambi kweNkosi, eyithukuthelisa ngomsebenzi wakhe ngokufanana lendlu kaJerobowamu, langenxa yokuthi wayibulala wayiqeda.

Ukubusa kukaEla

8Ngomnyaka wamatshumi amabili lesithupha wokubusa kukaAsa inkosi yakoJuda uEla indodana kaBahasha waba yinkosi koIsrayeli eTiriza; wabusa iminyaka emibili.

9Kodwa inceku yakhe uZimri, owayeyinduna yengxenye yezinqola zakhe zokulwa, wamenzela amacebo. Kwathi eseTiriza enathe waze wadakwa endlini kaAriza owayengumgcini wesigodlo senkosi eTiriza,

10uZimri wamngenela wamtshaya wambulala ngomnyaka wamatshumi amabili lesikhombisa wokubusa kwakhe koJuda, uZimri waba yinkosi esikhundleni sakhe.

11Kwathi eseyinkosi esaqala nje ukubusa wayibulala yonke indlu kaBahasha, kaze atshiya loyedwa owesilisa ezihlotsheni zakhe lakubangane bakhe.

12UZimri wayibulalake yonke indlu kaBahasha, ngokwelizwi leNkosi eyalikhuluma ngoBahasha ngomprofethi uJehu

13ngenxa yazo zonke izono zikaBahasha lezikaEla indodana yakhe abazenzayo, lezenzo abenza ngazo uIsrayeli ukuba one, bethukuthelisa iNkosi, uNkulunkulu kaIsrayeli, ngezithombe zabo.

14Ezinye indaba zikaEla lakho konke akwenzayo kulotshiwe ogwalweni lwezindaba zamakhosi akoIsrayeli.

Ukubusa kukaZimri

15Ngomnyaka wamatshumi amabili lesikhombisa wokubusa kukaAsa inkosi yakoJuda uZimri wabusa insuku eziyisikhombisa eTiriza. Ngalesosikhathi impi yayimisile ngaphambi kweGibethoni umuzi wamaFilistiya.

16Kwathi kufika umbiko wokuba uZimri uyenzele icebo inkosi wayibulala, bonke abakoIsrayeli ababesezihonqweni basebebeka uOmri induna yempi ukuba yinkosi yabo mhlalokho.

17UOmri wasesuka eGibethoni kanye loIsrayeli wonke, balivimbezela iTiriza.

18UZimri esebonile ukuthi umuzi usuthethwe, wangena enqabeni yesigodlo senkosi, wazitshisela phakathi, wafa.

19Lokhu kwenzeka ngenxa yezono azenzayo esenza okubi phambi kweNkosi, ehamba ngendlela kaJerobowamu, esenza lezono zakhe ezabangela ukuba uIsrayeli one.

20Ezinye indaba zikaZimri lamacebo akhe awenzayo kulotshiwe ogwalweni lwezindaba zamakhosi akoIsrayeli.

Ukubusa kukaOmri

21Abantu bakoIsrayeli basebedabuka phakathi, abanye balandela uTibini indodana kaGinathi ukuba bamenze inkosi, labanye balandela uOmri.

22Kodwa labo abalandela uOmri babehlula abalandela uTibini indodana kaGinathi; uTibini wafa, uOmri waba yinkosi.

23Ngomnyaka wamatshumi amathathu lanye wokubusa kukaAsa inkosi yakoJuda uOmri waba yinkosi koIsrayeli, wabusa iminyaka elitshumi lambili, eyisithupha yayo wabusa eTiriza.

24Wathenga intaba yaseSamariya kuShemeri ngamathalenta esiliva amabili, wakha umuzi phezu kwayo, wawutha ibizo likaShemeri umnikazi wayo wathi yiSamariya.

25UOmri wenza okubi phambi kweNkosi, ukwedlula bonke ababengaphambi kwakhe;

26ngoba wahamba ngazo zonke indlela zikaJerobowamu indodana kaNebati, wenza izono ezenza uIsrayeli one, eyithukuthelisa iNkosi, uNkulunkulu kaIsrayeli, ngezithombe zabo.

27Ezinye indaba zikaOmri azenzayo lobuqhawe bakhe kulotshiwe ogwalweni lwezindaba zamakhosi akoIsrayeli.

28UOmri waya kwabaphansi, wangcwatshelwa eSamariya. UAhabi indodana yakhe waba yinkosi esikhundleni sakhe.

Ukubusa kukaAhabi

29Ngomnyaka wamatshumi amathathu lesificaminwembili wokubusa kukaAsa inkosi yakoJuda uAhabi indodana kaOmri waba yinkosi koIsrayeli; wabusa koIsrayeli eSamariya iminyaka engamatshumi amabili lambili.

30Wenza okubi phambi kweNkosi ukwedlula bonke ababekhona ngaphambi kwakhe.

31Kwakungathi kakwanelanga kuye ukwenza izono zikaJerobowamu indodana kaNebati, wathatha uJezebeli indodakazi kaEthibali inkosi yaseSidoni ukuba abe ngumkakhe. Wakhonza uBali, wakhuleka kuye.

32Wamakhela ialtare ethempelini ayemakhele lona eSamariya.

33UAhabi wamisela lonkulunkulukazi uAshera insika. Wenza okunengi okwayithukuthelisayo iNkosi, uNkulunkulu kaIsrayeli ukwedlula wonke amakhosi kaIsrayeli ayengaphambi kwakhe.

34Ensukwini zakhe uHiyeli waseBetheli wakha iJeriko; ekubekeni kwakhe izisekelo zalo walahlekelwa lizibulo lakhe uAbiramu, lasekumiseni kwakhe amasango alo walahlekelwa lithunjana lakhe uSegubi; kwagcwaliseka ilizwi leNkosi eyalikhuluma ngoJoshuwa indodana kaNuni.