Jobe 15 - Ndebele Bible (iBhayibhili Elingcwele) 1978

Inkulumo yesibili kaElifazi: uthi uJobe uziphakamisile

1Wasephendula uElifazi waseTemani esithi:

2Ohlakaniphileyo angaphendula yini ngamazwi ayize,

azigcwalise ngomoya nje na?

3Angaphikisa ngamazwi angasizi lutho,

langenkulumo engelakumsiza na?

4Wena uyachitha ukumesaba uNkulunkulu,

unciphise ukucabanga ngoNkulunkulu.

5Ngoba ububi bakho buyakutshela ukuthi uzakuthini,

ukhetha ulimi lwabalobuqili.

6Umlomo wakho yiwo okulahlayo, kayisimi;

yebo, lendebe zakho ziyafakaza ngawe.

7Ungumuntu wokuqala owazalwayo na?

Wavela phambi kwezintaba na?

8Wezwa amacebo kaNkulunkulu na?

Nguwe wedwa olokuhlakanipha na?

9Kuyini okwaziyo esingakwaziyo thina?

Kuyini okuqondayo esingakuqondiyo lathi?

10Kukhona phakathi kwethu izimpunga lamakhehla,

amadala kuloyihlo.

11Zincinyane yini kuwe induduzo zikaNkulunkulu,

lelizwi elikhulunywa kuhle kuwe na?

12Kungani inhliziyo yakho ilesibindi esingaka,

lamehlo akho ayavutha,

13ukuba umoya wakho umelane loNkulunkulu,

lomlomo wakho ukhulume amazwi anje na?

14Umuntu uyini ukuba abe ngohlambulukileyo na?

Lozelwe ngowesifazana ukuba abe ngolungileyo na?

15Uba uNkulunkulu engazithembi izithunywa zakhe,

lezulu lingahlambulukanga emehlweni akhe,

16phoke, umuntu yena onengekayo lowonakeleyo,

onatha ububi njengamanzi, uzakuba njani na?

17Ngizakukutshengisa, ungilalele,

lengikubonileyo ngizakukutshela khona.

18— lokho izihlakaniphi ezikubonakalisileyo,

laboyise abangakufihlanga,

19bona bodwa abanikwa ilizwe,

okungadlulanga izihambi phakathi kwazo —

20Omubi uyazijanqa ebuhlungwini insuku zakhe zonke,

leminyaka yonke emiselwe omubi ibaliwe.

21Umsindo owethusayo uzwakala endlebeni zakhe;

lalapho esephumelele, umchithi uyamhlasela.

22Kathembi ukuthi uzaphuma emnyameni,

umiselwe umkhonto,

23aphoswe abe yikudla kwamanqe;

onjalo uyazi ukuba ukuchitheka kwakhe kufikile.

24Usizi lokuhlupheka kuyamethusa,

kumahlule njengenkosi ezilungiselele impi.

25Ngoba uselulile isandla sakhe ukulwa loNkulunkulu,

ezama ukumelana loSomandla,

26emdumela ngamandla akhe esihlangu sakhe esiqinisiweyo.

27Ubuso bakhe bugcwele ngokuzimuka,

lezitho zakhe zinzima zigcwele;

28uhlala emizini echithekileyo,

lezindlini ezingahlalwa muntu,

ezimiselwe ukuchithwa.

29Kayikunotha, lenotho yakhe kayiyikuma,

kayikugxumeka lutho emhlabeni;

30kayikuphuma emnyameni;

ilangabi liyahangula amahlumelo akhe,

lomoya uphephule amaluba akhe.

31Angathembi ize, azikhohlise,

ngoba ize lizakuba ngumvuzo wakhe.

32Izihlahla zakhe zizabuna kungakabi yisikhathi sazo,

lengatsha zakhe zingabi luhlaza futhi.

33Uzawohloza izithelo zakhe ezingavuthwanga njengevini,

athintithe impoko zakhe njengesihlahla seoliva.

34Ngoba ixuku labangamesabiyo uNkulunkulu kalilazithelo,

lomlilo uyaqothula amathente abathengwa ngomvuzo.

35Bamitha ububi, bazale isono,

isizalo sabo sibeletha inkohliso.