Hubo 25 - Ndebele Bible (iBhayibhili Elingcwele) 1978

Umkhuleko wokucela ukuholwa lokuthethelelwa lokuvikelwa

1Nkosi, ngiphakamisela kuwe umphefumulo wami.

2Nkulunkulu wami, ngithemba kuwe;

ungavumeli ukuba ngiyangeke;

izitha zami kazingathokozi ngami.

3Yebo, kungayangeki loyedwa kulabo abathemba kuwe,

kodwa kabayangeke labo abona ngabomu.

4Ngazisa izindlela zakho, Nkosi,

ungifundise imikhondo yakho.

5Ngiholela eqinisweni lakho, ungifundise,

ngoba wena unguNkulunkulu lomsilisi wami;

ngilindele wena usuku lonke.

6Khumbula isihawu sakho, Nkosi,

ukhumbule uthando lwakho olungapheliyo,

ngoba kwakukhona kusukela endulo.

7Ungazikhumbuli izono zobutsha bami kanye leziphambeko zami;

ngenxa yothando lwakho olungapheliyo ungikhumbule,

ngenxa yokulunga kwakho, Nkosi.

8INkosi ilungile iqondile;

ngakhoke iyazifundisa izoni indlela ezingahamba ngayo;

9abathobekileyo ibaholela kokulungileyo,

ibafundise indlela yayo.

10Zonke indlela zeNkosi ziluthando, leqiniso

kulabo abalondoloza isivumelwano sayo lemithetho yayo.

11Ngenxa yebizo lakho, Nkosi,

ngithethelela ukona kwami, ngoba kukhulu.

12Nguwuphi umuntu oyesabayo iNkosi?

Lowo izakumfundisa indlela ezakuyikhetha.

13Yena uzakuphumelela,

labantwana bakhe bazakulifuya ilizwe.

14Ubuhlobo beNkosi bungobalabo abayesabayo,

iyabazisa isivumelwano sayo.

15Amehlo ami ahlala ekhangele kuyo iNkosi,

ngoba izakukhupha inyawo zami embuleni.

16Ngikhangela, Nkosi, ube lomusa,

ngoba ngilesizungu, ngihluphekile.

17Khulula inhliziyo yami ezinkathazweni,

ungikhuphe ezinhluphekweni zami.

18Khangela ukuhlupheka kwami lenkathazo yami,

ungithethelele zonke izono zami.

19Khangela izitha zami ngoba zinengi,

ziyangizonda ngenzondo enkulu.

20Londoloza ukuphila kwami, ungikhulule,

ungangiyangisi, ngiphephela kuwe.

21Ubuqotho lokulunga kakungilondoloze,

ngoba ngithembele kuwe.

22Khulula uIsrayeli, Nkosi,

kuzo zonke izinkathazo zakhe.