1Kwakukhona umuntu othile wasezintabeni zakoEfrayimi, ibizo lakhe linguMika.
2Yena wathi kunina: Inhlamvu zesiliva eziyinkulungwane lekhulu ezantshontshwa kuwe, engakuzwa uqalekisa ngazo, zikhona kimi, yimi engazithathayo. Unina wathi: INkosi ikubusise, ndodana yami.
3Wasezibuyisela kunina inhlamvu eziyinkulungwane lekhulu zesiliva. Unina wathi: Sengisahlukanisela iNkosi lesisiliva sami sibe ngesendodana yami, ukuba ngenze isithombe.
4Eseyibuyisele imali kunina, unina wathatha inhlamvu zesiliva ezingamakhulu amabili, wazinika umkhandi owenza ngazo isithombe; sabekwa endlini kaMika.
5UMika wayelendlu yokukhonzela, wenza izithombe, wamisa omunye wamadodana akhe ukuba abe ngumpristi wakhe.
6Ngalezonsuku kwakungelankosi koIsrayeli; wonke umuntu wayesenza lokho akubona kulungile kuye.
7Kwakukhona insizwa yaseBetlehema koJuda, eyosendo lukaJuda, yayingumLevi, ihlala khona.
8Lowomuntu wasuka emzini waseBetlehema koJuda ukuyadinga indawo yokwakha. Ekuhambeni kwakhe wafika ezintabeni zakoEfrayimi emzini kaMika.
9UMika wathi kuye: Uvela ngaphi? Yena wathi kuye: NgingumLevi waseBetlehema koJuda, ngidinga indawo yokwakha.
10UMika wathi kuye: Hlala lami, ube ngubaba lompristi, ngizakukunika inhlamvu ezilitshumi zesiliva ngomnyaka, lezigqoko, lokudla kwakho.
11UmLevi wavuma ukuhlala laye, wasesiba njengabantwana bakhe kuye.
12UMika wambeka umLevi waba ngumpristi wakhe, wahlala endlini yakhe.
13UMika wasesithi: Khathesi ngiyazi ukuba iNkosi izangiphumelelisa ngoba ngilomLevi ongumpristi wami.
Who We AreWhat We EelieveWhat We Do
2025 by iamachristian.org,Inc All rights reserved.
