1 Kho 10 - Ndebele Bible (iBhayibhili Elingcwele) 1978

Inkosikazi yaseSheba

1Inkosikazi yaseSheba isizwile ngodumo lukaSolomoni yeza ukumhlola ngemibuzo enzima.Mat 12:42; Luka 11:31 2 Lan 9:1–29

2Yafika eJerusalema lodwendwe olukhulu, lamakamela ethwele amakha legolide elinengi lamatshe amahle; isifikile kuSolomoni yamtshela konke okwakusemcabangweni wayo.

3USolomoni wayiphendula yonke imibuzo yayo, kwakungekho lutho olwayicatshelayo inkosi yehluleka ukuluchasisa.

4Inkosikazi yaseSheba isibonile konke ukuhlakanipha kukaSolomoni, lesigodlo ayesakhile,

5lokudla kwakhe, lezinduna zakhe ezimphahlileyo, lezinceku zakhe zimi ngemuva zigqoke okuhle, labaphathi bezitsha zakhe, leminikelo yokutshiswa ayeyinikela ethempelini, kwayiqeda amandla.

6Yathi enkosini: Yayiliqiniso imibiko engayizwa elizweni lami ngezindaba zakho langokuhlakanipha kwakho,

7kangiyikholwanga leyomibiko ngize ngafika ngazibonela ngamehlo ami. Khangela, bengingatshelwanga ngitsho lengxenye nje; ukuhlakanipha kwakho lokuphumelela kwakho kuyayedlula imibiko engayizwayo.

8Bayadela abafazi bakho. Ziyadela inceku zakho ezikusebenzelayo insuku zonke zizwe ukuhlakanipha kwakho.

9Kayibongwe iNkosi uNkulunkulu wakho ekuthandileyo, yakubeka ukuba ubuse uIsrayeli. Ngoba iyamthanda uIsrayeli kokuphela, ikubekile waba yinkosi ukuze ubuse ngomthetho langokulunga.

10Inkosikazi yaseSheba yasinika inkosi uSolomoni igolide elingamathalenta alikhulu lamatshumi amabili, lamakha amanengi kakhulu, lamatshe amahle. Kakuzanga kulethwe amakha amanengi njengala inkosikazi yaseSheba eyawanika inkosi uSolomoni.

11Futhi imikolo kaHiramu eyayithwala igolide livela eOfiri yathutha lezigodo ezinengi zomkampa, lamatshe amahle.

12Ngezigodo zomkampa inkosi yenza insika zethempeli lezendlu yayo, yenza lemihubhe lamachacho abahlabeleli; kakuzanga kulethwe futhi izigodo zomkampa ezinengi kangaka kuze kube lamuhla.

13Inkosi uSolomoni yanika inkosikazi yaseSheba konke ekufisayo lekucelayo, ngaphezu kwalokho eyayinika khona ngokuphana kwayo. Yasibuyelake elizweni layo lezinceku zayo.

Inotho kaSolomoni lodumo lwakhe

14Ubunzima begolide elalifika kuSolomoni ngomnyaka babungamathalenta angamakhulu ayisithupha lamatshumi ayisithupha lesithupha,

15ngaphandle kwalelo elalivela emithelweni yabathengisi, lenzuzweni yabathengi, lasemakhosini wonke aseArabiya, lakubabusi belizwe.

16Inkosi uSolomoni yenza izihlangu ezinkulu ezingamakhulu amabili ngegolide elikhandiweyo, sisinye senziwe ngegolide elingamashekeli angamakhulu ayisithupha.

17Yenza lamahawu angamakhulu amathathu ngegolide elikhandiweyo, lilinye lenziwe ngegolide elingamashekeli alikhulu lamatshumi amahlanu. Yawafaka endlini ethiwa ngeyeGusu laseLebanoni.

18Yenza lesihlalo sobukhosi esikhulu ngempondo zendlovu, yasinameka ngegolide elihle.

19Isihlalo sasilezikhwelo eziyisithupha, ngemva kwaso kulekhanda lethole, lasemaceleni aso kulezindawo zokubeka izingalo, lezilwane ezimbili eceleni kwendawo zokubeka ingalo;

20kwakumi izilwane ezilitshumi lambili ezikhwelweni eziyisithupha, esinye isilwane singapha lesinye singale kwesikhwelo. Kakwenziwanga isihlalo sobukhosi esinjalo lakuwuphi omunye umbuso.

21Zonke inkezo zokunatha zenkosi uSolomoni zazenziwe ngegolide, lezitsha zonke zendlu ethiwa ngeyeGusu laseLebanoni zazenziwe ngegolide elihle; zazingekho ezenziwe ngesiliva, ngoba isiliva sasiyinto engasilutho ensukwini zikaSolomoni.

22Inkosi yayilemikolo emikhulu yokuthwala impahla olwandle kanye lemikolo kaHiramu; limikolo yokuthwala impahla yayibuya kanye ngeminyaka emithathu ithwele igolide lesiliva lempondo zendlovu lezindwangu lezinkawu.

23Inkosi uSolomoni yawadlula wonke amakhosi omhlaba ngokunotha langokuhlakanipha.

24Wonke umhlaba weza kuSolomoni ukuzwa ukuhlakanipha uNkulunkulu ayekufake engqondweni yakhe.

25Bonke bamlethela izipho, izinto zesiliva lezegolide, lezambatho, lemure, lamakha, lamabhiza lezimbongolo; kwaba njalo iminyaka ngeminyaka.

26USolomoni wabuthanisa inqola zokulwa lamabhiza; wayelizinqola zokulwa ezingamakhulu alitshumi lane, lamabhiza azinkulungwane ezilitshumi lambili; amanye wawabeka emizini yezinqola, lamanye eJerusalema.1 Kho 4:26

27Inkosi yandisa isiliva eJerusalema saba sinengi njengamatshe, lemikusu yaba minengi njengephane laseShefela.Dute 17:17

28Amabhiza kaSolomoni ayevela eGibithe laseKowa; abathengi benkosi babewathenga eKowa.Dute 17:16

29Inqola yokulwa yayithengwa eGibithe ngamashekeli esiliva angamakhulu ayisithupha, ibhiza lithengwa ngamashekeli alikhulu lamatshumi amahlanu. Ngokunjalo abathengi benkosi bawathengisela wonke amakhosi amaHethi laweSiriya.