Eks 26 - Ndebele Bible (iBhayibhili Elingcwele) 1978

ITabernakeli

1Uzakwenza iTabernakeli ngamaveli alitshumi elembu elihle elenziwe ngentambo ephothiweyo eluhlaza leyibubende lebomvu, abe lamakherubi enziwe ngumuntu oyingcitshi.Eks 36:8–38

2Ubude balelo lalelo iveli bube zingalo ezingamatshumi amabili lesificaminwembili, lobubanzi balo bube zingalo ezine, wonke amaveli alingane.

3Kuzahlanganiswa amaveli amahlanu elinye lelinye, lamanye amaveli amahlanu ahlanganiswe ngokunjalo.

4Uzakwenza izihitshela ngokuluhlaza emphethweni weveli elisekucineni kwamaveli amahlanu, uphinde wenze njalo emphethweni weveli elisekucineni kwamanye amaveli amahlanu.

5Wenze izihitshela ezingamatshumi amahlanu kwelinye iveli, lezihitshela ezingamatshumi amahlanu emphethweni weveli elinye, izihitshela zikhangelane.

6Wenze ingwegwe zegolide ezingamatshumi amahlanu, uhlanganise amaveli elinye lelinye ngengwegwe, ukuba iTabernakeli libe linye.

7Wenze amaveli ngoboya bembuzi abe lithente phezu kweTabernakeli, kube lamaveli alitshumi lanye.

8Ubude balelo lalelo iveli bube zingalo ezingamatshumi amathathu, lobubanzi balo bube zingalo ezine, wonke amaveli alitshumi lanye alingane.

9Uzahlanganisa amaveli amahlanu abe wodwa, lamaveli ayisithupha abe wodwa, ilembu lesithupha lipheqelwe ngaphambi kwethente.

10Wenze izihitshela ezingamatshumi amahlanu emphethweni weveli elisekucineni kwamaveli amahlanu, lezihitshela ezingamatshumi amahlanu emphethweni weveli elisekucineni kwamanye amaveli ayisithupha.

11Wenze ingwegwe zethusi ezingamatshumi amahlanu, uzifake ezihitsheleni, uhlanganise ithente libe linye.

12Lokho okwedlulayo kwamaveli ethente, ngitsho ingxenye yeveli eliseleyo, kuzalenga emva kweTabernakeli.

13Ingxenye yobude bamaveli ethente edlulayo emaceleni womabili, elingana lengalo, izalenga emaceleni eTabernakelini inxa zonke ukulisibekela.

14Uzakulifulela ithente ngezikhumba ezibomvu zezinqama lezinzwezwe.

15Uzakwenza amapulanka amiswayo eTabernakelini ngesihlahla somvagazi,

16ubude bamapulanka bube zingalo ezilitshumi, lobubanzi bawo bube yingalo lengxenye.

17Ilelo lalelo ipulanka libe lemisuka emibili yokuhlanganisa; wenze njalo kuwo wonke amapulanka eTabernakelini.

18Uzakwenza amapulanka eTabernakelini, amapulanka angamatshumi amabili ohlangothini lwaseningizimu;

19wenze inyawo ezingamatshumi amane zesiliva ngaphansi kwamapulanka angamatshumi amabili, inyawo ezimbili ngaphansi kwepulanka linye zibe ngezemisuka yalo yomibili, lenyawo ezimbili ngaphansi kwelinye ipulanka zibe ngezemisuka yalo yomibili,

20wenze amapulanka angamatshumi amabili ohlangothini lwesibili lweTabernakeli, uhlangothi lwasenyakatho,

21kanye lenyawo zawo ezingamatshumi amane zesiliva, inyawo ezimbili ngaphansi kwepulanka linye lenyawo ezimbili ngaphansi kwelinye ipulanka.

22Wenze amapulanka ayisithupha ohlangothini olungasemuva ngasentshonalanga,

23lamapulanka amabili azakuba yizingonsi zeTabernakeli ngasemuva,

24womabili ahlanganiswa ngaphansi langaphezulu esongweni lokuqala ukuba abe yizingonsi ezimbili.

25Kuzakuba khona amapulanka aficaminwembili kanye lenyawo zawo zesiliva ezilitshumi lesithupha, inyawo ezimbili ngaphansi kwepulanka elinye lelinye.

26Uzakwenza imithando ngesihlahla somvagazi, imithando emihlanu ibe ngeyamapulanka akolunye uhlangothi lweTabernakeli,

27lemithando emihlanu ibe ngeyamapulanka akolunye uhlangothi, lemithando emihlanu ibe ngeyamapulanka ohlangothini olungasemuva ngasentshonalanga;

28umthando waphakathi udabule phakathi kwamapulanka uze ufinyelele ekucineni inxa zombili.

29Uzawabhada amapulanka ngegolide, uwenzele amasongo egolide ukuba athwale imithando; uyibhade ngegolide.

30Uzalimisa iTabernakeli libe njengesifanekiso salo owatshengiswa sona entabeni.

31Uzakwenza iveli lelembu elihle elentambo ephothiweyo eluhlaza leyibubende lebomvu, libe lamakherubi, kube ngumsebenzi wengcitshi;

32ulilengise ngengwegwe zegolide ensikeni ezine zomvagazi ezibhadwe ngegolide, zime ngenyawo ezine zesiliva.

33Uzalilengisa iveli ezingwegweni, uwufake umtshokotsho wobufakazi ngaphakathi kweveli; iveli lizakwahlukanisa indawo engcwele endaweni engcwele kakhulu.Heb 6:19; 9:3–5

34Usibeke isihlalo somusa phezu komtshokotsho wobufakazi endaweni engcwele kakhulu,

35ubeke itafula ngaphandle kweveli, loluthi lwesibane ohlangothini lwaseningizimu kweTabernakeli maqondana letafula, ubeke itafula ohlangothini lwasenyakatho.

36Uzakwenza iveli lomnyango wethente ngelembu elihle elilentambo ephothiweyo eluhlaza leyibubende lebomvu, kube ngumsebenzi womthungi.

37Ulenzele iveli insika ezinhlanu zomvagazi, uzibhade ngegolide; ingwegwe zazo zibe ngezegolide, uzikhandele inyawo zazo zibe ngezethusi.