Jobe 14 - Ndebele Bible (iBhayibhili Elingcwele) 1978

UJobe ukhuluma ngokuhlupheka komuntu

1Umuntu ozelwe ngowesifazana insuku zakhe zilutshwana,

zigcwele inhlupheko.

2Uyavela njengeluba, abune,

abaleke njengethunzi, angemi.

3Kambe onje uyamkhangela yini,

uyamletha ekuthonisisweni na?

4Ngubani ongaveza okuhlambulukileyo kokungcolileyo na?

Kakho loyedwa.

5Lokhu insuku zakhe zimisiwe,

lobunengi benyanga zakhe bukuwe,

ummisele imikhawulo ukuba angadluli,

6ungamkhangeli, umyekele,

ukuze azithokozise ngensuku zakhe njengesiqatshwa.

7Ngoba kukhona ithemba esihlahleni uba siganyulwa

ukuthi sizabuya sihlume,

lokuthi amahlumela aso kawayikuphela.

8Lanxa impande yaso iguga emhlabathini,

lesiphunzi saso sifele phansi,

9kanti lapho sisizwa amanzi, siyahluma,

sikhuphe izingatsha njengesihlahla esitsha.

10Kodwa umuntu uyafa aphele,

yebo, uyaphela, ungaphike?

11Njengamanzi atshayo echibini,

lanjengomfula otshileyo,

12ngokunjalo umuntu uyalala phansi angavuki futhi,

lize lingabi khona iphezulu, angavuki sibili,

angaphatshanyiswa ebuthongweni bakhe.

13Nkulunkulu, kungathi ungangifihla endaweni yabafileyo,

ungithukuze kuze kudlule intukuthelo yakho,

umise isikhathi sokungikhumbula.

14Uba umuntu esifa, uzabuya aphile na?

Bengizalinda zonke insuku zokutshikatshika kwami,

kuze kufike usuku lokukhululeka kwami.

15Ubuzakungibiza, mina ngikusabele,

ubuzakufisa ukungibona mina engingumsebenzi wezandla zakho.

16Kanti khathesi uyazibala zonke izinyathelo zami;

kodwa ubuzakuyekela ukuqaphelisa izono zami,

17uthungele isiphambeko sami esakeni,

usibekele isono sami.

18Intaba iyawa, ibhidlike,

ledwala liyasuswa endaweni yalo,

19amanzi ayawagubha amatshe,

impophoma ziyakhukhula ubhuqu lomhlaba.

Ngokunjaloke wena uyachitha ithemba lomuntu,

20uyamahlula kokuphela aze adlule,

uyaphendula ubuso bakhe, umsuse.

21Amadodana akhe anikwa udumo, yena angaze akwazi,

ayeyiswa, kodwa angakuboni.

22Uzwa nje ubuhlungu bomzimba wakhe,

azikhalele yena kuphela.